იმ შემთხვევაში, თუ რუსეთი დაიწყებს ომს უკრაინაში და დასავლეთი ამაზე სანქციებით უპასუხებს, აშშ-ის ვაჭრობის სამინისტრო გეგმავს აკრძალოს რუსეთში იმ საყოფადცხოვრებლო ტექნიკის ექსპორტი, რომელიც შტატებში წარმოებულ ან დამუშავებულ ტექნოლოგიას შეიცავს.
ეს თითქმის ყველაფერს შეეხება - ტელეფონებს, კომპიუტერებს, მაცივრებს, გაზქურებს, ჭურჭლის სარეცხ მანქანებს და ა.შ.
მნიშვნელოვანი კი ისაა, რომ სანქციები შეეხება არა მხოლოდ თავად პროდუქტს, არამდე მის წარმოებაში გამოყენებულ ტექნოლოგიას - ეს კი ნიშნავს, რომ რუსეთში ვერ გაიყიდება არა მხოლოდ შტატებში, არამედ ევროპაში, სამხრეთ კორეაში და ჩინეთში წარმოებული პროდუქცია.
1 თვის წინ აშშ-ის მრჩეველმა ეროვნული უსაფრთხოების საკითხებში ჯეიკ სალივანმა შექმნა სპეციალური უწყებათშორისი ჯგუფი, რომელიც რუსეთის წინააღმდეგ სანქციების შემუშავებაზე მუშაობს. მასში შედიან ისეთი უწყებების წარმომადგენლები, როგორც აშშ-ის ეროვნული უსაფრთხოების საბჭო, სპეცსამსახურები, თავდაცვის სამინისტრო, სახელმწიფო დეპარტამენტი, ენერგეტიკის სამინისტრო და ეროვნული უშიშროების სამინისტრო.
წინა კვირას თეთრმა სახლმა გააანალიზა ობამას პრეზიდენტობის პერიოდში ყირიმის ანექსიის გამო რუსეთის წინააღმდეგ დაწესებული სანქციების ეფექტიანობა და მივიდა დასკვნამდე, რომ აკრძალვებმა რუსეთის ეკონომიკას მნიშვნელოვანი ზიანი მიაყენეს, თუმცა მთავარ მიზანს ვერ მიაღწიეს - მოსკოვმა უკრაინაზე ზეწოლა არათუ არ შეამცირა, არამედ გაზარდა.
ამერიკელი მაღალჩინოსნები განიხილავენ რუსეთის შეყვანას იმ ქვეყანათა ჩამონათვალში, რომლებზეც ყველაზე მკაცრი სანქციები ვრცელდება - დღეს ასეთი ქვეყანა სულ 4-ა - კუბა, ირანი, ჩრდილოეთ კორეა და სირია.
ინფორმაცია, რომ შესაძლოა სანქციები სმარტფონების ექსპორტს შეეხოს, ჯერ კიდევ დეკემბერში გაავრცელა Reuters-მა.
Bloomberg-ის ცნობით კი, შესაძლოა რუსეთს აეკრძალოს რუბლის გაცვლა დოლარზე, ევროზე და ბრიტანულ ფუნტზე.
ასევე ერთ-ერთ ყველაზე მკაცრ ზომად განიხილება რუსეთის გათიშვა SWIFT-ს საერთაშორისო საგადახდო სისტემიდან.
CNN-ის ინფორმაციით, ამერიკელები პოლიტიკოსები და ექსპერტები ასევე განიხილავენ საპასუხო სანქციების შესაძლო რისკს - მათი აზრით, ეს შესაძლოა იყო რუსული კიბერშეტევების გააქტიურება შტატების და ევროპის უმნიშვნელოვანეს ინფრასტრუქტურაზე და ასევე გაზის გაძვირება.