წარმოგიდგენათ დასავლეთის მაღალგანვითარებული ქვეყანა, სადაც კორონავირუსი მოგვიანებით გამოჩნდა, სახელმწიფომ კი სწრაფი და წინმსწრები მოქმედება დაიწყო?
სახელმწიფომ ამ ქვეყანაში ტესტირების და კონტაქტების დადგენის ეფექტური სისტემა ჩამოაყალიბა და საბოლოო ჯამში იქ სიკვდილიანობა დასავლეთის სხვა ქვეყნებთან შედარებით დაბალი იყო.
ვირუსის გავრცელების შენელებასთან ერთად ამ ქვეყანამ წერტილოვანი თვითიზოლაციის რეჟიმის შემოიღო და ამით უმუშევრობის ზრდა მინიმუმამდე დაიყვანა.
ეს ქვეყანა არის გერმანია ანგელა მერკელის ხელმძღვანელობით. პანდემიის დროს საკუთარი სახელმწიფოებრიობის საუკეთესო თვისებები სხვებზე მეტად სწორედ გერმანიამ გამოავლინა. ამიტომაც, სავარაუდოდ, მისი მსხვილი ეკონომიკა პანდემიის შემდეგაც აყვავებული იქნება.
კორონავირუსმა ჯერ კიდევ 2008 წლის კრიზისის დროს დაწყებული ეროვნული ეკონომიკების მეტი ავტონომიურობისკენ სვლის ტენდენცია კიდევ უფრო გააძლიერა. ეროვნული მთავრობები ეკონომიკური ცხოვრების სხვადასხვა ასპექტებს სულ უფრო და უფრო მკვეთრად აკონტროლებენ.
კერძოდ, ისინი საგარეო ვალის მოცულობას ეკონომიკის აღდგენისთვის ზრდიან და ასევე იმიგრაციას და საგარეო ვაჭრობას ზღუდავენ.
ინტენსიურად მხოლოდ ვირტუალურ სამყაროსთან დაკავშირებული ეკონომიკის დარგები ვითარდება, რადგანაც ადამიანები ინტერნეთში მუშაობენ, ვაჭრობენ და ერთობიან.
ბერლინის პოზიციებს ისიც აძლიერებს, რომ ტექნოლოგიური ლიდერობის მიუხედავად, აშშ-ს და ჩინეთს ძალიან დიდი ვალები დაუგროვდათ, ხოლო მათ მთავრობების კორონავირუსთან ბრძოლაში არასწორი ნაბიჯების გადადგმის გამო აკრიტიკებენ.
სავარაუდოდ, სწორედ გერმანია იქნება კორონა-რბოლის გამარჯვებული. რეაქციამ პანდემიაზე ქვეყნის მთავარი უპირატესობები გამოავლინა - ეფექტური მთავრობა, დავალიანების დაბალი მაჩვენებელი და უმაღლესი კლასის ეკონომიკა, რომლის რეპუტაციაც მსოფლიო ვაჭრობის შემცირების პირობებში გერმანულ ექსპორტს იცავს.
გერმანიაში მუშათა დიდმა უმრავლესობამ სამსახურის შენარჩუნება მოახერხა - მთავრობის მიერ არასრული დასაქმების სისტემის შექმნის წყალობით, რომელიც ბიზნეს-კომპანიებისთვის დოტაციების გამოყოფას ითვალისწინებს.
გერმანიამ ამ და სხვა სოციალური სისტემების შენარჩუნება და განვითარება მოახერხა განთქმული გერმანული ხელმომჭირნეობის წყალობით.
რამდენიმე წლის წინ, როდესაც ანგელა მერკელი ევროკავშირს მკაცრი ეკონომიის ზომების რეალიზებისკენ მოუწოდებდა, მას ყველა დასცინოდა. თუმცა, დრო მიდის და დღეს მას უკვე არავინ დასცინის.
პანდემიაში გერმანია პროფიციტული ბიუჯეტით შევიდა და ამიტომაც იზოლაციის რეჟიმზე გადასულ ეკონომიკას დიდი მხარდაჭერა გაუწია - უმუშევრად დარჩენილი ოჯახებს შემწეობას უხდიან, ბიზნესს გადასახადები შეუმცირდა და იაფი კრედიტები გამოეყო.
გერმანია პანდემიის ეკონომიკური შედეგების დაძლევისთვის მშპ-ს 55%ის ოდენობის თანხას გამოყოფს, რაც 4-ჯერ მეტია მშპ-სთან მიმართებით რომელიც შტატების მთავრობამ გაიმეტა.
ბერლინმა კრიზისის დასაძლევად სერიოზული ფინანსური დახმარება მეზობელ ქვეყნებსაც გამოუყო - ისინი დიდი ხანია წუწუნებენ, რომ გერმანელების სიძუნწე მთლიანად ევროკავშირს აზარალებს.
გერმანია ექსპორტზე ზედმეტად დამოკიდებული ქვეყანაა, რაც საკმაოდ საშიშია გლობალური კრიზისის პირობებში, ამიტომაც ბერლინი თავის ინდუსტრიის, მაგალითად, მანქანათმშენებლობის მოდერნიზებაზე მუშაობს. კერძოდ, ახალი რეგულაციები ავტომრეწველობას ელექტრომობილების წარმოებისკენ უბიძგებს.
გერმანია დაგვიანებით, მაგრამ მაღალი ტექნოლოგიების სფეროში ლიდერობისთვის ბრძოლას იწყებს - სამეცნიერო კვლევებზე ბერლინი, ისევე როგორს ამერიკა, მშპ-ს 3%-ს ხარჯავს და მას ასევე სილიკონის ველის ტიპის ეკოსისტემის შექმნის გეგმებიც აქვს.
გერმანიის მთავრობის მიერ შემუშავებული ეკონომიკური განვითარების გეგმა სტარტაპებისთვის 56 მლრდ. დოლარის გამოყოფას ითვალისწინებს. ეს თანხები ხელოვნური ინტელექტის და სხვა ციფრული ტექნოლოგიების განვითარებას მოხმარდება.
პანდემია ხელს ციფრული ტექნოლოგიების ზრდას უწყობს, და პარალელურად დეგლობალიზაციის, და ასევე საგარეო ვალების მატების პრობლემებს ამძაფრებს, თუმცა, გერმანია ცალკე დგას - მას ამ ტიპის პრობლემები ნაკლები აქვს, ხოლო მთავრობას მათი დაძლევის უნარი გააჩნია.
წყარო:New York Times
მოამზადა თენგიზ აბლოთიამ