ევროზონის ეკონომიკა 2021 წლის 3 თვეში 0,6%-ით შემცირდა, რაც ახალი რეცესიის საფრთხეს სულ უფრო და უფრო რეალურს ხდის. ამავე დროს, ანალოგიურ პერიოდში აშშ-ს ეკონომიკა 1,6%-ით გაიზარდა და ეს ატლანტიკის ორ მხარეზე შექმნილი ვითარების კონტრასტს ნათლად წარმოაჩენს.
ეკონომიკის სტიმულირების შთამბეჭდავი ზომების და დაჩქარებული ვაქცინაციის წყალობით, ამერიკის მსოფლიოში უმსხვილესი ეკონომიკა ბოლო 3 თვის მანძილზე სწრაფად იზრდება. ევროკავშირს კი რეცესიის მეორე ტალღამ გადაუარა, ეს სტიმულირებაზე გაცილებით ნაკლები დანახარჯების და წარუმატებელი ვაქცინაციის შედეგია.
თუმცა, მონაცემები მშპ-ს ვარდნის თაობაზე წინა თვეების მდგომარეობას ასახავს, ბოლო პერიოდში კი დამაიმედებელი ნიშნები გამოჩნდა, გერმანიაში და საფრანგეთში პანდემია შესუსტდა, ქარხნებმა მუშაობა განაახლეს, ქალაქების ქუჩებში ადამიანების რაოდენობამ აშკარად იმატა.
გერმანიის ეკონომიკა იანვარ-მარტში 1,7%-ით, ესპანეთის 0,4%-ით, იტალიის კი 0,5%-ით შემცირდა. საფრანგეთის მშპ მოკრძალებული 0,4%-ით გაიზარდა, თუმცა, სამომავლოდ სტატისტიკის გაუარესებაა მოსალოდნელი. აპრილში საფრანგეთის მთავრობამ დაინფიცირების მასშტაბების ზრდის გამო ახალი კარანტინი შემოიღო, რაც ეკონომიკის ზრდაზე უარყოფითად აისახება.
2020 წელს კარანტინებმა ეკონომიკური აქტიურობის თითქმის მთლიანი შეწყვეტით, ევროკავშირს სერიოზული პრობლემები მოუტანეს. 2021 წლის ლოკდაუნები გაცილებით უფრო მიზნობრივი და დახვეწილია, ხოლო ინფორმაცია კორონავირუსის გავრცელების თაობაზე გაცილებით მეტია.
მაგალითად, რესტორნები მთლიანად არ იხურება, მათ ვერანდებზე მუშაობის საშუალება ეძლევა, ხელოსნებმაც მუშაობა განაახლეს უსაფრთხოების შესაბამისი ზომების დაცვით.
„ჩვენ ნელა-ნელა ვირუსთან თანაცხოვრებას ვეჩვევით“, - განაცხადა BCA Research-ის სტრატეგმა დხავალ ჯოშიმ.
ექსპერტების უმრავლესობის და ევროპის ცენტრალური ბანკის პროგნოზით წლის დარჩენილი პერიოდის მანძილზე ევროკავშირის ეკონომიკა გაჯანსაღებას განაგრძობს და წლის ბოლოსთვის 4%-ით გაიზრდება.
თუმცა, ყველაზე უკეთეს შემთხვევაშიც ევროპის გამოჯანმრთელება აშშ-ს ჩამორჩება, მკურნალობის განსხვავებული მეთოდების გამო.
საერთაშორისო სავალუტო ფონდის მონაცემებით, სტიმულირების პროგრამის ფარგლებში აშშ-მ საბიუჯეტო ხარჯები 25%-ით, ხოლო გერმანიამ მხოლოდ 10%-ით გაზარდა.
nytimes.com
მოამზადა თენგიზ აბლოთიამ