ბოლო დღეების განმავლობაში უმსხვილესი საფონდო ბირჟების ინდექსები რადიკალურ კლებას აჩვენებს. პარასკევს ნიუ-იორკის საფონდო ბირჟაზე 2008 წლის შემდეგ ყველაზე ცუდი შედეგი დაფიქსირდა საფინანსო ორგანიზაციებისათვის და მოვაჭრეების უმეტესობამ იზარალა.
საფონდო ბირჟის ექსპერტმა ჯაბა დიხამინჯიამ „კომერსანტთან“ საუბრისას განაცხადა, რომ ინდექსების კატასტროფული ვარდნა კორონავირუსის გარდა, საუდის არაბეთის მიერ ნავთობის ექსპორტის ფასის დაწევამ გამოიწვია. მისი თქმით, New York Stock ინდექსი 7%-ზე მეტად თუ დავარდა საფონდო ბირჟა დაიკეტება და ვაჭრობა 15 წუთით შეჩერდება, რაც 1929 წლის დიდი დეპრესიის შემდეგ არ მომხდარა.
„S&P 500-ის და Dow Jones-ის ინდექსები კატასტროფულად ვარდება ქვემოთ. S&P 500-ის ფიუჩერსი დაახლოებით 5%-ით დაეცა. ასეთი დიდი 145 პუნქტიანი ვარდნა 2008 წლის ფინანსური კრიზისის დროს იყო და ამას ვუყურებთ დღეს. ეს ძალიან დიდი შიში და იმედგაცრუებაა ინვესტორებისთვის რაც მრავალი ფაქტორით არის გამოწვეული, ერთ-ერთი კორონავირუსია, მეორე კი ის, რომ საუდის არაბეთმა ნავთობის ექსპორტზე ფასი კატასტროფულად დაწია, დაახლოებით 30%-იანი ვარდნაა, რაც განვითარებადი ქვეყნების რომლებიც ამაზე არიან დამოკიდებული დაღმასვლას გამოიწვევს, ეს საერთო ჯამში ბაზარს დააზარალებს. გარდა ამისა თვითმფრინავები ფაქტიურად ცარიელები დაფრინავენ და ჩვენ ვნახავთ რომ ავიაკომპანიების უმეტესობა ამ კვარტალს წაგებით დაასრულებს, ეს იდეაც აქტიურად მუსირებს, რაც ინვესტორებისთვის ერთგვარი შიშის ფაქტორია. ამიტომ ვფიქრობ, ორგანიზაციებმა ჰეჯირებაზე ან დაზღვევაზე უნდა იზრუნონ. ეს არ იქნება ბოლო ვარდნა და ვვარაუდობ, რომ კიდევ გაგრძელდება. New York Stock ინდექსი 7%-ზე მეტად თუ დავარდა საფონდო ბირჟა დაიკეტება და ვაჭრობა 15 წუთით შეჩერდება. ახლა უკვე 5%-იანი ვარდნა არის, 2%-იც და ბირჟა გაჩერდება. აღსანიშნავია, რომ 1929 წლის დიდი დეპრესიის შემდეგ ბირჟა არ გაჩერებულა, ეს არ არის მარტივი საკითხი, ეს ინდექსების გაუთვალისწინებელად დიდი ვარდნაა,“- განაცხადა ჯაბა დიხამინჯიამ.
აღსანიშნავია, რომ S&P 500 (SPX) ფიუჩერსი კვირას 5% -ით დაეცა. Dow (INDU) ფიუჩერსული მაჩვენებლები 1,200 ქულაზე მეტია, ანუ დაახლოებით 4.9% –ით შემცირდა. Nasdaq Composite (COMP) ფიუჩერსები 4,8% –ით შემცირდა, ხოლო S&P / ASX 200 კი 7.3% -ით შემცირდა.
ნინო თამაზაშვილი