შეერთებული შტატების წარმომადგენელთა პალატის სპიკერის ნენსი პელოსის თვითმფრინავი ტაიბეის აეროპორტში დაეშვა. ამ ვიზიტით, პელოსი გახდა აშშ-ის პალატის პირველი სპიკერი, რომელიც ბოლო 25 წლის განმავლობაში ტაივანს ეწვია.
მანამდე ჩინეთი მას აფრთხილებდა ტავანში არ ჩასულიყო. პარალელურად ჩინეთმა რეგიონში სამხედრო თვითმფრინავები გაგზავნა, რომლებიც მათ შორის მდებარე ტაივანის სრუტესთან განალაგა.
ნენსი პელოსისადმი მისალმებები გამოჩნდა ტაივანის ყველაზე მაღალი ცათამბჯენის, ტაიბეი 101-ის ფასადზე.
პელოსის ტაივანში ოფიციალურ ვიზიტამდე ერთი დღით ადრე, ჩინეთის მთავრობამ 100-მდე ტაივანური ბრენდი და მათი პროდუქციის ექსპორტი აკრძალა. აღნიშნული ქმედება წარმოადგენს აშკარა პოლიტიკურ და ეკონომიკურ ზეწოლას, რომელიც ამავდროულად ატარებს ერთგვარ სიმბოლურ მნიშვნელობას და მიუთითებს იმაზე, რომ კომუნისტური მთავრობა ტაივანში ამერიკელი მაღალჩინოსნის ვიზიტით კმაყოფილი არ არის.
აკრძალული კომპანიების უდიდესი ნაწილი კვების პროდუქტების სექტორშია წარმოდგენილი, მათ შორისაა: ჩაის, ტკბილეულის, თაფლის, ფუნთუშეულისა და ზღვის პროდუქტების ბრენდები.
ჩინეთის საგარეო საქმეთა სამინისტროს ოფიციალურმა წარმომადგენელმა, ჰუა ჩუნინმა განაცხადა, რომ მსოფლიომ იცის, რომ აშშ-ის პროვოკაციამ ტაივანის სრუტეში დაძაბულობის ესკალაცია გამოიწვია და აშშ-მა სრული პასუხისმგებლობა უნდა აიღოს.
მისი თქმით, აშშ-ის კონგრესმა, როგორც აშშ-ის მთავრობის ნაწილმა, მკაცრად უნდა დაიცვას აშშ-ის მთავრობის მიერ აღიარებული საგარეო პოლიტიკა.
თავის მხრივ თეთრმა სახლმა განაცხადა, რომ აშშ-ის წარმომადგენელთა პალატის სპიკერს, ნენსი პელოსის აქვს უფლება ეწვიოს ტაივანს. უსაფრთხოების საკითხებში თეთრი სახლის მრჩეველმა, ჯონ კირბიმ ჟურნალისტებს ბრიფინგზე უთხრა, რომ ტაივანში პელოსის შესაძლო ვიზიტი არანაირად არ ცვლის აშშ-ის პოლიტიკას.
კირბის თქმით, ჩინეთი ბოლო დღეებში უპასუხისმგებლო რიტორიკით გამოდის ამ პოტენციური ვიზიტის თაობაზე. აშშ-ის პრეზიდენტმა, ჯო ბაიდენმა და ჩინეთის პრეზიდენტმა, სი ძინპინმა ტაივანის გარშემო არსებული დაძაბულობა განიხილეს 28 ივლისს, სატელეფონო საუბარში, რომელიც ორ საათზე მეტხანს გაგრძელდა. საუბრის შინაარსის პეკინის მიერ გავრცელებული ანგარიშის თანახმად, სი ძინპინმა ხაზი გაუსვა ჩინეთის პრეტენზიას ამ კუნძულზე, რომელსაც უკვე ათწლეულებია დემოკრატიული მთავრობა ჰყავს. ცეცხლს ვინც ეთამაშება, ცეცხლშივე დაიწვება - ამბობს ჩინეთის პრეზიდენტი ამ დოკუმენტში.
ჩინეთი ტაივანს, რომელიც თვითმმართველი დემოკრატიაა, საკუთარ ტერიტორიად მიიჩნევს. პეკინის გაფრთხილებასთან დაკავშირებით, ვაშინგტონი აცხადებს, რომ არ დაუშვებს ჩინეთის მხრიდან ამერიკის დაშინებას.
ნენსი პელოსი აზიური ტურის ფარგლებში ორშაბათს სინგაპურში ჩავიდა, სამშაბათს კი მალაიზიაში. მისი შემდეგი გაჩერება ტაივანია, სადაც ის ოთხშაბათს ქვეყნის პრეზიდენტს და სხვა ოფიციალურ პირებს შეხვდება. ინფორმაცია ოფიციალურად არაა დადასტურებული, თუმცა ამერიკული გამოცემები წყაროებზე დაყრდნობით აცხადებენ, რომ წარმომადგენელთა პალატის სპიკერი, ტაიპეიში მალე ჩავა.
კვირის დასაწყისში ტაივანის სრუტესთან ჩინეთმა არამარტო სამხედრო თვითმფრინავები, არამედ სამხედრო გემებიც განალაგა. სამხედრო თვითმფრინავები იქ საკონტროლო პროვოკაციულ გაფრენებს დღესაც აწარმოებდნენ. სააგენტო როიტერს ადგილობრივი წყარო ატყობინებს, რომ თვითმფრინავებმა ამ დროისთვის ტერიტორია დატოვეს, მაგრამ გემები ჯერ კიდევ სრუტეში არიან.
ტაივანის თავდაცვის უწყება აცხადებს, რომ სიტუაციას აკონტროლებს და საჭიროების შემთხვევაში მტრის საფრთხის გათვალისწინებით, რეგიონში ძალებს განალაგებს.
ჩინეთი აშშ-ის ოფიციალური პირების ტაივანში ვიზიტს განიხილავს, როგორც კუნძულის დამოუკიდებლობის მომხრე ბანაკისთვის წამახალისებელი სიგნალის გაგზავნას.
შეერთებულ აცხადებს, რომ რჩება “ერთი ჩინეთის” პოლიტიკის ერთგული, რომელიც ვაშინგტონის განმარტებით, ჩინეთსა და ტაივანს შორის არსებულ უთახნმოებაში სტრატეგიული ბუნდოვანების შენარჩუნებას გულიხმობს. ვაშინგტონი ინარჩუნებს არაოფიციალურ ურთიერთობას ტაივანთან და უწევს მას სამხედრო დახმარებას.
მასალის მომზადებისას გამოყენებულია წყაროები: ამერიკის ხმა, რადიო თავისუფლება. Ria, bm.