NDI-ის მიერ თებერვალში ჩატარებული სატელეფონო კვლევის თანახმად, მოსახლეობის 25% ფიქრობს რომ ქვეყანა სწორი მიმართულებით ვითარდება, 44% საპირისპირო აზრზეა, ამის მიუხედავად გამოკითხულთა 50%-ს პანდემიასთან გასამკლავებელი მთავრობის ეკონომიკური გეგმა მოსწონს.
მთავრობის ეკონომიკურ გეგმას ყველაზე ნაკლები მოწონება - 46% თბილისში აქვს, ყველაზე მეტი დადებითი - 54% სხვა ქალაქებში. გეგმა მოსწონს გამოკითხული კაცების 48 და ქალების 52 პროცენტს.
ქვეყნის მასშტაბით იმ ადამიანების 48%, რომლებმაც პანდემიის პერიოდში დახმარება მიიღეს, დახმარების ოდენობით კმაყოფილია, თბილისში ეს მაჩვენებელი 39%-მდე მცირდება.
თუ 2020 წლის ივნისში გამოკითხულთა 33% მიიჩნევდა თავს დასაქმებულად, თებერვალში ის 29%-მდე შემცირდა. უმუშევართა რაოდენობა კი პირიქით 17-დან 22 პროცენტამდე გაიზარდა. 18-დან 15 პროცენტამდეა შემცირებული თვითდასაქმებულთა რაოდენობაც. საქსტატის მიხედვით 2020 წლის მეორე კვარტალიდან 2020 წლის მეოთხე კვარტალამდე უმუშევრობა 18.3%-დან 20.4%-მდე გაიზარდა.