ნაყინის მწარმოებელმა კომპანიებმა პროდუქციის ფასი გაზარდეს. როგორც „კომერსანტისთვის“ გახდა ცნობილი სეზონურ პროდუქტზე ფასი საშუალოდ 10 პროცენტით გაიზარდა. „თოლიას“ დირექტორი გიორგი ჭყონია აცხადებს, ფასის ზრდა ქვეყნებში მიმდინარე ინფლაციური პროცესებითაა გამოწვეული. მისი თქმით, ბიზნესს კორონავირუსმა სერიოზული პრობლემები შეუქმნა, თუმცა ეპიდემიოლოგიური სიტუაციის გაუმჯობესებასთან და ტემპერატურის მატებასთან ერთად მდგომარეობა ნელ-ნელა დასტაბილურდა.
„კამპანიამ მაისი-ივნისის ახალი გეგმა შეიმუშავა და მივყვებით ამ გეგმას. კორონავისურის პანდემიამ 2 თვე ჩაგვიგდო, ჩვენ ადრე ვიწყებთ მომზადებას და სეზონსაც ადრე ვხსნით ხოლმე. წინა წელთან შედარებით გაყიდვების კუთხით კლება არ გვაქვს, მივდივართ სტაბილურად. ამინდი თუ შეიცვლება და ვირუსის მეორე ტალღა გავრცელდა, ალბათ ჩვენც დაგვეტყობა. ჯერჯერობით ყველაფერი ნორმალურადაა. რაც შეეხება ფასს, პროდუქცია გაძვირდა შარშანაც, წელსაც და მომავალ წელსაც გაძვირდება, რადგან ნედლეულის ფასი ყოველწლიურად იმატებს. სხვადასხვა ნედლეულზე სხვადსხვა პროცენტით გაიზარდა, შემიძლია გითხრათ, რომ საშუალოდ 10 პროცენტით გაძვირდა“, - განაცხადა გიორგი ჭყონიამ.
ფასები საშუალოდ 10 თეთრით გაიზარდა გურჯაანის ნაყინზეც. ჭყონიას მსგავსად შპს „აისი-გურჯაანის ნაყინის“ გენერალური დირექტორმა გურამ ბერიკაშვილიც აცხადებს, რომ ნაყინის წარმოებისთვის საჭირო ინგრედიენტების ფასი საგრძნობლადაა გაზრდილი, რის გამოც ბიზნესი იძულებული გახდა, საფასო პოლიტიკა გადაეხედა.
„თავიდან კორონავირუსმა ბიზნესზე უარყოფითი გავლენა იქონია, ხალხი ვერ გადაადგილდებოდა, გაყიდვები დაახლოებით ათჯერ შემცირდა, ჩვენც შეზღუდულები ვიყავით. პრაქტიკულად კომპანია გაჩერებული იყო, ახლა მდგომარეობა გაცილებით გაუმჯობესდა, გასულ წელთან შედარებით გაყიდვები თითქმის იდენტურია. ფასები შეიცვალა, პროდუქტების ფასი საგრძნობლად გაძვირდა, ინგრედიენტები რომელიც ჩვენ გვჭირდება კარაქი, შაქარი, რძის ფხვნილი გაძვირებულია, რის გამოც დაახლოებით 10 თეთრით მოიმატა ნაყინზე ფასმა. სეზონს ბევრი სიახლით შევხვდით, ასორტიმენტი გავზარდეთ, ვირუსის არ გვეშინია ვმუშაობთ 24 საათი“, - აცხადებს გურამ ბერიკაშვილი.
ბაჩო ადამია