„გლობალური რეცესიაა, ვხედავთ რა სჭირს ნავთობის ფასს, დაიწყება ჯაჭვური რეაქცია და ყველა ის კომპანია, რომელიც ნავთობზეა მიბმული, გაკოტრებას დაიწყებს“, - ამის შესახებ „კომერსანტს“ ბიზნესის სამართლის სპეციალისტმა აკაკი ჩარგეიშვილმა განუცხადა. იურისტი ამბობს, რომ კორონავირუსით გამოწვეული პანდემიის გამო, ნავთობიმპორტიორ კომპანიებს დიდი პრობლემების წინაშე აღმოჩნდებიან. მისი თქმით, მაშინ როდესაც ქვეყანაში რამდენიმე გამორჩეული კომპანია ოპერირებს გაკოტრების საფრთხე რეალურად არსებობს.
„კომპანიებს გაყიდვები 40 პროცენტით შეუმცირდათ, პანიკური სიტუაცია რომ დამთავრდება, გაყიდვები შეიძლება 5-10 პროცენტით გაიზრდოს. ყველა იმპორტიორს ნავთობი შეძენილი აქვს იმ პლაცის მიხედვით, რომელიც 2-3 თვის წინ იყო, მაისის პერიოდისთვის, როდესაც სავარაუდოდ ყველაფერი დამშვიდდება და ეკონომიკა გაიხსნება, ნავთობის ფასი დავარდნილი იქნება და იმ ფასში, რომელიც კომპანიას გადახდილი აქვს საწვავს ვეღარ გაყიდიან, რადგან დღეს ნავთობის ფასი მინუსშია გადასული. ჩვეულებრივი ფაქტია ის, რომ კომპანიები უნდა გაკოტრდნენ და რაც უფრო ადრე დაიწყებენ გაკოტრების რეჟიმის პროცედურებს, მით უფრო უკეთესი იქნება, არ იწვალებს ეკონომიკა და სიჯანსაღეს მალე მივაღწევთ“, - განაცხადა აკაკი ჩარგეიშვილმა.
ბიზნესის სამართლის სპეციალისტის განმარტებით, ბაზარზე გამოჩნდებიან წვრილი კომპანიები, რომლებიც სხვადასხვა აქტივებს იყიდიან, რა დროსაც ერთი მეწარმის დონეზე ბევრი პრობლემა მოგვარდება.
„მაგალითად, ვისოლს, ლუკოილს, ან სხვა კომპანიას შეიძლება არ უღირდეს ერთი ბენზინგასამართი სადგურის მოვლა ბაკურიანში, რადგან დიდი კომპანიაა და ერთიანად ხარჯები ყველგან ვერ გაწვდება, თუმცა, შესაძლებელია ბაკურიანში გაჩნდეს კონკრეტული ერთი მეწარმე, ვისაც უღირს ამ ბიზნესის მართვა, იქ ცხოვრობს, მისი მზრუნველობა ამ კონკრეტულ ობიექტზე ნაკლებ დანახარჯს მოითხოვს, ვიდრე მსხვილი კომპანიის, რომელიც ცალკე დაცვას ქირაობს, ცალკე ბუღალტრები ჰყავს და ა.შ. ინდივიდუალური დაყოფიდან გამომდინარე, ახალი დასაქმებულები გაჩნდებიან. ეს რეალურად გველოდება და არ უნდა შეგვეშინდეს. ნებისმიერი კრიზის ეს არის გამოწვევა ახალი და შესაძლებლობების გაჩენა“, - ამბობს აკაკი ჩარეგიშვილი.
შეგახსენებთ, რომ პირველად მსოფლიო ისტორიაში ნიუ-იორკის სასაქონლო ბირჟაზე ამერიკული ნავთობის WTI-ს ღირებულება ნეგატიური გახდა- ეს კი ნიშნავს, რომ ნავთობის მწარმოებლები მყიდველებს თანხას უხდიან, რათა ნავთობი გაყიდონ და არ გადაიტვირთოს თავიანთი საცავები, რისი საფრთხეც მაისის თვეშია მოსალოდნელი. ნავთობის გაუფასურება მას შემდეგ დაიწყო, რაც მარტის დასაწყისში ნავთობის მსხვილი მწარმოებელი სახელმწიფოები და მათი პარტნიორები ყოველდღიურად მოპოვებული ნავთობის მოცულობის შემცირებაზე ვერ შეთანხმდნენ. მოგვიანებით, OPEC-ის წევრებმა შეთანხმება შეძლეს, თუმცა ნავთობის ფასზე კორონავირუსის პანდემია აისახა და ნავთობზე მოთხოვნა მნიშვნელოვნად დაეცა.
ბაჩო ადამია