ნატო–ს სამიტზე საქართველოსა და უკრაინის ალიანსში გაწევრიანებასთან დაკავშირებით არავითარი თარიღები და შესაძლო ვადები არ დასახელდება, მხოლოდ დადასტურდება, რომ ნატო–ს კარი ღიაა და ამ პროცესში რუსეთს ვეტოს უფლება არ გააჩნია. ამის შესახებ ჩრდილოატლანტიკური ალიანსის გენერალურმა მდივანმა იენს სტოლტენბერგმა გერმანიის მარშალის ცენტრში ონლაინ–დისკუსიის დროს განაცხადა, რომელიც ნატო–ს სამიტის დაწყებას უძღოდა წინ.
„საქართველოსა და უკრაინასთან მიმართებაში ჩვენ ბუქარესტის სამიტზე (2008 წლის აპრილი. რედ.) მიღებულ გადაწყვეტილებას დავადასტურებთ, რომ ნატო–ს კარი ღიაა და რუსეთი ამ პროცესზე გავლენას ვერ მოახდენს. ჩვენ მაშინაც არაფერი გვითქვამს გაწევრიანების ვადებზე და არც ახლა ვგეგმავთ ამის თქმას“, – განაცხადა გენმდივანმა.
სამიტის დაწყებამდე სტოლტენბერგმა ასევე განაცხადა, რომ ნატო–რუსეთს შორის ურთიერთობები, „რუსეთის აგრესიული ქმედებების“ გამო, ცივი ომის პერიოდიდან ყველაზე დაბალ ნიშნულზეა.