„ეკონომიკური თანამშრომლობისა და განვითარების ორგანიზაციის (OECD) კვლევაში საქართველომ 80-ზე მეტ ქვეყანას შორის დაიკავა მე-8 ადგილი საინვესტიციო გარემოს მიმზიდველობის თვალსაზრისით. საქართველოს ეკონომიკა დასახელდა ერთ-ერთი ყველაზე ღია და მიმზიდველი პირდაპირი უცხოური ინვესტიციებისა და უცხოელი ინვესტორებისთვის,“ - განაცხადა ეკონომიკისა და მდგრადი განვითარების მინისტრის მოვალეობის შემსრულებელმა ნათია თურნავამ მთავრობის ადმინისტრაციაში გამართულ ბრიფინგზე. ინფორმაციას ეკონომიკის სამინისტრო ავრცელებს.

საქართველოს მაჩვენებელი აღნიშნულ კვლევაში აისახა საქართველოს საინვესტიციო პოლიტიკის შეფასებიდან გამომდინარე, რომელიც ეკონომიკური თანამშრომლობისა და განვითარების ორგანიზაციამ (OECD) მოამზადა. კვლევა მოიცავს ქვეყანაში არსებული 22 ეკონომიკური სექტორის შესწავლას და პირდაპირ უცხოურ ინვესტიციების მოზიდვასთან დაკავშირებული ბარიერების იდენტიფიცირებას. საქართველოს მთავრობამ ეკონომიკური თანამშრომლობისა და განვითარების ორგანიზაციას აღნიშნული კვლევის დასაწყებად 2019 წლის დასაწყისში მიმართა. მსგავსი კვლევა აღნიშნული ორგანიზაციის მხრიდან პირველად ჩატარდა. კვლევა მოიცავს ინფორმაციას ქვეყანაში არსებულ საინვესტიციო გარემოზე და რეკომენდაციებს გასატარებელი რეფორმების შესახებ.

ნათია თურნავას განცხადებით, კვლევისას შესწავლილი იქნა საქართველოს 22 ეკონომიკური სექტორი, მათ შორის, რა ბარიერები არსებობს და როგორი პრაქტიკაა ინვესტორებთან თანამშრომლობის მიმართულებით. „სწორედ ამ კვლევის შედეგად დადგინდა, რომ საქართველო არის მსოფლიოში ერთ-ერთი ყველაზე მიმზიდველი ქვეყანა ინვესტორებთან მიმართებაში. რამდენიმე თვის წინ ასევე საქართველოს საინვესტიციო გარემომ დადებითი შეფასება მიიღო ამერიკის სახელმწიფო დეპარტამენტის მიერ გამოქვეყნებულ ანგარიშშიც, როგორც ერთ-ერთი ღია და ინვესტორებისთვის მიმზიდველი ქვეყანა და ეს არის ძალიან კარგი საწინდარი იმისა, რომ 2021 წელს, როდესაც მსოფლიო არსებითად დაძლევს პანდემიას, ჩვენ უცხოური ინვესტიციების ახალ ნაკადებს ველოდოთ,“ - განაცხადა ნათია თურნავამ.

მინისტრის მოვალეობის შემსრულებელის ინფორმაციით, პანდემიის მიუხედავად, მიდის აქტიური მუშაობა ქვეყანაში ინვესტიციების მოზიდვის მიმართულებით. „ბევრი ახალი პროექტი დაიწყო IT ინდუსტრიაში, საპორტო ინფრასტრუქტურაში, ენერგეტიკაში, ბევრ სხვა დარგში, მაგრამ ეს პროცესი გაძლიერდება 2021 წელს. ჩვენ ამისთვის, მთავრობასთან ერთად, ახალი ბერკეტები შემოგვაქვს იგივე პროგრამის „აწარმოე საქართველოში კომპონენტის სახით. ამით ჩვენ შემოვიტანეთ წამახალისებელი მექანიზმი უცხოელი ინვესტორებისთვის, რომლებიც საქართველოში 150-ზე მეტ ადამიანს დაასაქმებს და განსაზღვრული რაოდენობის ინვესტიციას განახორციელებს,“ - განაცხადა ნათია თურნავამ.

„ყველაფერი ეს ერთობლიობაში მუშაობს იმის სასარგებლოდ, რომ საქართველოში 2021 წელს, როდესაც დაიწყება ჩვენი ეკონომიკის აღდგენა, უცხოური ინვესტიციები ერთ-ერთი მამოძრავებელი ძალა იყოს,“ - განაცხადა ეკონომიკის მინისტრის მოვალეობის შემსრულებელმა.