საერთაშორისო სარეიტინგო კომპანიამ, „S&P”-მ განიხილა და უცვლელად დატოვა საქართველოს სუვერენული საკრედიტო რეიტინგი BB და რაც ძალიან მნიშვნელოვანია, უცვლელად დატოვა პერსპექტივა „სტაბილური“, - ამის შესახებ ეკონომიკის მინისტრმა, ნათია თურნავამ ბრიფინგზე განაცხადა.

მისი თქმით, მიუხედავად გლობალური გამოწვევისა და რეგიონში არსებული რთული ვითარებისა, საქართველოს ეკონომიკა ინვესტორებისთვის საიმედოა.

„საქართველოს სუვერენული რეიტინგი უცვლელია, მიუხედავად იმისა, რომ არის გლობალური გამოწვევა პანდემიაა და წლის განმავლობაში რამდენიმე ქვეყანას გაუუარესდა სუვერენული საკრედიტო რეიტინგი. მათ შორის არის: სერბეთი, ბულგარეთი, საბერძნეთი, სლოვაკეთი და კიდევ რამდენიმე ქვეყანა. ამ ფონზე საერთაშორისო სარეიტინგო სააგენტომ და მანამდე Fitch​-მაც შესაძლებლად ჩათვალეს, რომ საქართველოს სუვერენული რეიტინგი დარჩეს უცვლელად. ეს იმის მაჩვენებელია, რომ მიუხედავად გლობალური გამოწვევისა და რეგიონში არსებული რთული ვითარებისა, საქართველოს ეკონომიკა ინვესტორებისთვის საიმედოა. ეს არის ინდიკატორი ინვესტორებისთვის, რომ მათ შეუძლია თავისი საინვესტიციო პროექტების გაგრძელება, ან ახალი საინვესტიციო პროექტები განახორციელონ. ეს არის ინდიკატორი იმისა, რომ ჩვენ დაბალი და მართვადი რისკები გვაქვს და საქართველოს ეკონომიკა გადახდისუნარიანია. ეს ძალიან მნიშვნელოვანი ფაქტია და კიდევ ერთხელ ადასტურებს, რომ ეკონომიკური პოლიტიკა, რასაც ჩვენი გუნდი ახორციელებს, სწორი, ეფექტური და დაბალანსებულია. ეს ნიშნავს, რომ ჩვენ ვიპოვეთ ოქროს შუალედი ანტიპანდემიურ შემზღუდავ ღონისძიებებსა და ეკონომიკის მხარდამჭერ ღონისძიებებს შორის, რაც საკმაოდ რთულია, მაგრამ კარგად გამოგვივიდა. აქედან გამომდინარე, პერსპექტივა საკმაოდ პოზიტიურია“, - განაცხადა ნათია თურნავამ.