„ნატახტარის“ მწარმოებელი კომპანია „ეფეს საქართველო“ პროდუქციის ასორტიმენტს აფართოებს. უკვე ჩამოისხა და გაყიდვაშია ახალი სპეციალური გამოშვება „ნატახტარი გრინი - 3 სვიის გემო“, რომელიც დამზადებულია განსაკუთრებული Dry Hopping ტექნოლოგიით, 3 სახეობის სვიის გამოყენებით.
Dry Hopping ტექნოლოგია გულისხმობს ლუდში სვიის ხარშვის პროცესის შემდეგ დამატებას, რაც სითხეს სვიის ცოცხალ არომატს უნარჩუნებს. „ნატახტარი გრინი“ გაყიდვაში იქნება შეზღუდული დროით. როგორც „კომერსანტს“ „ეფეს საქართველოს“ კორპორატიულმა დირექტორმა ნიკოლოზ ხუნძაკიშვილმა განუცხადა, ლუდის სეზონზე მნიშვნელოვანი იქნება ისიც, რომ არსებულ სასმელებზე, კომპანია ფასებს დააკორექტირებს.
„განახლებული პროდუქციით ვგეგმავთ გამოვჩნდეთ ბაზარზე და დავიწყოთ ლუდის სეზონი, წინა წელს ახალი ბრენდი გვქონდა „ნატახტარი პლატინუმის“ შეზღუდული რაოდენობა, წელს გვაქვს ბევრად განსხვავებული ლუდი, რომელიც 3 სახეობის სვიის გამოყენებით მზადდება. რაც შეეხება ფასებს, შეიძლება იყოს მცირე მატება, მაგრამ არავითარ შემთხვევაში არ გასცდება ქვეყანაში არსებულ ინფლაციას“-განაცხადა ხუნძაკიშვილმა.
ახალი პროდუქციის პარალელურად „ეფეს საქართველოს“ კორპორატიულ საქმეთა დირექტორმა ლუდის სეზონის დაწყებაც შეაფასა და განაცახდა, რომ პანდემიის მიუხედავად, რასაც ტურისტული სეზონის ჩავარდნა მოჰყვა, ბაზარზე სრული დატვირთვით გამოჩენას გეგმავენ.
„ქვეყანაში შექმნილი მდგომარეობის მიუხედავად, ჩვენი კომპანია სრული დატვირთვით მუშაობდა. ასე ვაპირებთ შევხვდეთ ლუდის სეზონს. ბაზარზე მსყიდველუნარიანობა, დაახლოებით 1¬5-20%-მდეა შემცირებული, ამ პირობებში შევძელით ყველა თანამშრომლის შენარჩუნება. ლუდის სეზონისთვის სრულ მზადყოფნაში ვართ, მიუხედვად იმისა, რომ არ არის გახსნილი რესტორნები, კაფეები, ბარები და ტურიზმის სეზონიც შეზღუდულია, მაინც სეზონს ოპტიმისტურად ვუყურებთ ,“ - აცხადებს ნიკოლოზ ხუნძაკიშვილი.