სასტუმრო „რესპუბლიკაში“ დღეს კომპანია „ENKA”-მ ნამახვანჰესთან დაკავშირებით ფოკუს-სესია გამართა. შეხვედრაზე განიხილს ნამახვანის პროექტის სტატუსი და გამოწვევები, და გაჟღერდა, რომ ნამახვანჰესის კასკადის პროექტის ახალი დირექტორი მერაბ ლომინაძე გახდა, რომელიც აქამდე კომპანია ჯორჯიან მანგანეზის ფინანსური დირექტორის პოსტზე საქმიანობდა.
პრეზენტაციაზე მოწვეულნი იყვნენ საქართველოს საელჩოები, საერთაშორისო ბიზნეს ასოციაციები, არასამთავრობო სექტორი, მთავრობის წარმომადგენლები.
ნამახვანის ახალმა დირექტორმა მერაბ ლომინაძემ დღეს განაცხადა, რომ ნამახვანჰესის“ კაშხლის და წყალსაცავის მშენებლობა არ დაიწყება, სანამ კვლევების გადამოწმება არ მოხდება. ეკონომიკის სამინისტროსთან მიღწეული შეთანხმებით, ასევე შეიქმნება რიონის ხეობის განვითარების 5 მლნ ლარიანი ფონდი და პროექტის ზედამხედველობისთვის შეიქმნება დამოუკიდებელი საბჭო.
მანამ, სანამ არ იქნება დასტური და ვერიფიკაცია იმ კვლევებისა, რომლებიც ჩვენ გვაქვს, იქამდე არ დაიწყება პროექტის ისეთი ნაწილების მშენებლობა, როგორიც არის კაშხალი. რომ ძალიან მოკლე ვადაში შევძლებთ ამ კვლევების მომზადებას. ჩემი აზრით, ამას 6-დან 8 კვირამდე დასჭირდება.
იმხელა არის ამ პროექტის მიმართ ინტერესი, რომ ყველა მხარე იქნება ამაში ჩართული. ცალსახად ამაში იქნება ჩართული საზოგადოება, ცალსახად ამაში იქნებიან ჩართულნი ექსპერტები, აუცილებლად ამაში იქნება ჩართული ხელისუფლება. კიდევ ერთხელ ხაზს ვუსვამ, ეს არის ის პროექტი, რომელზეც დღეს ჩემთვის, რიგითი მოქალაქისთვის გადის ქვეყნის დამოუკიდებლობა- განმარტავს ლომინაძე.
29 მარტს პრემიერ მინისტრმა ირაკლი ღარიბაშვილმა თქვა, რომ 9-დან 12 თვემდე კაშხლის სამუშაოები შეჩერდება. თუმცა როგორც დღეს გაირკვა კვლევის დასრულების შემდეგ შესაძლოა სამუშაოები მალევე განახლდეს.
შეხვედრას თურქეთისა და ნორვეგიის ელჩებიც ესწრებოდნენ, თურქეთის ელჩი ფატმა იაზგანი მედიასთან განმარტავს იმ ანტი თურქული განწყობის მიზეზებს, რაც აქტუალური სწორედ ამ პროექტის გაჟღერებიდან გახდა.
„ამ პროექტში ორი მსხვილი ინვესტორი თურქეთი და ნორვეგიაა, არავინ ახსენებს ნორვეგიის მხარეს და ყველა თურქეთზე საუბრობს. საუბრობენ თუ რატომ მიეყიდა მიწა თურქებს(არცაა გაყიდული სხვათა შორის). ეს მხოლოდ აისბერგიის ზედა ნაწილია - 3 წელია აქ ვარ და ყურადღებით ვაკვირდები საქართველოში მიმდინარე პროცესებს. თურქეთში საქართველოს ვხედავთ, როგორც მეგობრულ ქვეყანას. წარსულში ომები გვქონდა, ყველა ერთმანეთს ეომებოდა, მაგრამ ეს ისტორიად დარჩა საქართველოს მიერ დამოუკიდებლობის გამოცხადების შემდეგ . ბოლო 20 წელია სტაბილურად კარგ ურთიერთობას ვაყალიბებთ და ამ ურთიერთობიდან სარგებელს ვიღებთ. მე ვერ ვიფიქრებდი, რომ ასეთი ანტი თურქული განწყობა წამოიწევდა წინ. ნამდვილად ბოლო 3 წელია სოციალურ ქსელებში არიან ადამიანები ვინც კრიზისის გამწვავებას ცდილობენ. მერე ვხედავ ამას რა მოჰყვება. ეს იწყება კონკრეტული სოციალური ქსელების მისამართებიდან და ისინი დაკავშირებულია კონკრეტულ ქსენოფობიურ ვებგვერდებთან. გახსოვთ ალბათ, ახალ ზელანდიაში თავდამსხმელის იარაღზე გამოსახული სიმბოლოები ისტორიიდან - ამ შემთხვევაშიც ისინი იყენებენ ისტორიულ სიმბოლოებს. ჩვენი საზღვრები საქართველოსთან გარკვეულია, რაც ნიშნავს რომ ერთმანეთის სუვერენულობას პატივს ვცემთ. ეს ხელს უშლის ზოგიერთებს საქართველოს ფარგლებს მიღმა და სურთ ურთიერთობის დაძაბვა საქართველოსა და თურქეთს შორის. ვერ გეტყვით ვის ვგულისხმობ რადგან დიპლომატი ვარ, მაგრამ შემიძლია გავასაჯაროვო სოციალური ქსელების კონკრეტული დოკუმენტები და მისამართები. ნამახვანოს პროექტი ამის ილუსტრაცია, ეს აჩვენებს გვჭირდება პრობლემების განხილვა და მათი გადაწყვეტა. ხდება საზოგადოებრივი აზრის მანიპულაცია და პროვოკაცია თურქეთის წინააღმდეგ. მე არ მივცემ მათ ამის უფლებას, არც თურქეთის და არც საქართველოს ხელისუფლება ამას არ დაუშვებს,“ - ამბობს თურქეთის ელჩი.
East Gate ჯგუფის ხელმძღვანელი, ბიზნესმენი ირაკლი იაშვილი განმარტავს, რომ ნამახვანის საკითხთან დაკავშირებით მოსახლეობასთან კომუნიკაცია დაგვიანებულია, თუმცა ეს ინვესტორის პრეროგატივა არ არის და სახელმწიფოსგან უნდა იყოს დარეგულირებული, რომ ინვესტორი პროექტის განხორციელებისას ჩიხში არ შევიდეს.
„მე ხალხისგან დავინახე ჯანსაღი პროტესტის ნაწილი - ადამიანები განიცდიან ეკოლოგიურ ვითარებას და ეს გასაგებია. რა თქმა უნდა, დაგვიანებული იყო კომუნიკაცია ამ ხალხთან, მაგრამ ინვესტორების საქმე არ არის სოციალური საკითხების მოგვარება და ხალხთან ურთიერთობა, ეს სახელმწიფოს საქმეა. როდესაც სახელმწიფო აძლევს ბიზნესმენს მშენებლობის ნებართვას, ეს ნებართვა უნდა მოიცავდეს ყველაფერს, შემდეგ ინვესტორმა უნდა შეაფასოს და მიიღოს გადაწყვეტილება აწყობს თუ არა დამატებითი აქიტიურობა და ხარჯები, რომ განახორციელოს პროექტი. გაიდლაინებია შესაქმენლი იმისთვის, თუ როგორ უნდა იმოქმედოს სახელმწიფომ და ინვესტორმა. როდესაც ინვესტორი მარტო რჩება მოსახლეობის პროტესტის პირისპირ, რა თქმა უნდა ჩიხში შევა. ამიტომ ყველა მხარეს უნდა წარიმართოს სწორი პროცესი,“ - განმარტავს ირაკლი იაშვილი.