გუშინ საქართველოში კორონავირუსის პირველი შემთხვევა დაფიქსირდა, რის შემდეგაც მოსახლეობის ნაწილმა სუპერმარკეტებში პროდუქტების მომარაგება დაიწყო. სოციალურ ქსელში ვრცელდებოდა ფოტოები, სადაც ჩანს თუ როგორ იმარაგებენ საკვებ პროდუქტებს მომხმარებლები. გთავაზობთ ფოტო-კოლაჟს:
„კომერსანტი“ დაუკავშირდა ჰიპერმარკეტების წარმომადგენლებს და შეეცადა გაერკვია რა ვითარებაა ამ ეტაპზე, არის თუ არა საკვები პროდუქტების დეფიციტი და არსებობს თუ არა შესაბამისი რაოდენობის მარაგები იმისათვის, რომ მომხმარებლების გაზრდილი მოთხოვნა დააკმაყოფილოს.
„აგროჰაბის“ მარკეტინგის მენეჯერი სალომე გველესიანი „კომერსანტთან“ საუბრისას აცხადებს, რომ გუშინ დახლებზე საკვები პროდუქტების დეფიციტი საგრძნობლად გაზრდილმა მოთხოვნამ შექმნა და ასეთი სიტუაცია მხოლოდ ერთ საათს გაგრძელდა.
„სიმშვიდეა, პანიკა მხოლოდ მას შემდეგ შეიქმნა, რაც გამოცხადდა ინფორმაცია კორონა ვირუსის საქართველოში დაფიქსირების შემდეგ. ამ ეტაპზე ნორმალური სიტუაციაა, ის პატარა მონაკვეთი იყო გუშინ, რომ ძალიან დიდმა მოთხოვნამ დეფიციტი შექმნა, ეს დაახლოებით ერთი საათის განმავლობაში გაგრძელდა, თუმცა, ამ ეტაპზე ყველაფერი ჩვეულ რეჟიმშია. მოთხოვნა ძირითადად მშრალ პროდუქტებზეა, თუმცა მარაგები გვაქვს“, - განმარტა სალომე გველესიანმა.
„გუდვილის“ მარკეტინგისა და პიარ სამსახურის ხელმძღვანელი ნატა წერეთელი ამბობს, რომ საშიშროება იმისა, რომ პროდუქციის დეფიციტი შეიქმნას არ არსებობს.
„მოთხოვნა გაიზარდა, მომხმარებლები ძირითადად ფქვილს და ბურღულეულს იმარაგებენ. თუმცა არანაირი საშიშროება იმისა, რომ დეფიციტი შეიქმნას არ არსებობს, ჩვენ მზად ვართ მომატებული მოთხოვნა დავაკმაყოფილოთ. პანიკის საფუძველი არ არსებობს, მომწოდებლებთანაც პრობლემა არ შეგვქმნია, ჩვეულებრივად ვიღებთ პროდუქციას, იმპორტიორ კომპანიებთანაც ჩვეულ რეჟიმში ვაგრძელებთ თანამშრომლობას. სრული ასორტიმენტით ვართ წარმოდგენილები, არანაირი დეფიციტი არცერთ პროდუქტზე არ შექმნილა და არც მომავალში შეიქმნება“, - განაცხადა ნატა წერეთელმა.
„კარფურის“ საზოგადოებასთან ურთიერთობის მენეჯერი ნინო რამიშვილიც ამბობს, რომ მიუხედავად გაზრდილი მოთხოვნისა, ჯერჯერობით არცერთ პროდუქტზე დეფიციტი არ შექმნილა.
„არანაირი დეფიციტი ჩვენთან არ არის, არცერთ პროდუქტზე. მარაგების მხრივაც ყველაფერი წესრიგშია. მოთხოვნა გუშინდელი დღის შემდეგ ნამდვილად მნიშვნელოვნად გაზრდილია, თუმცა მარაგი გვაქვს და დეფიციტი ჯერჯერობით არცერთ პროდუქტზე არ შექმნილა“, - განაცხადა ნინო რამიშვილმა.
ნინო თამაზაშვილი