ნოემბერში საქართველოს საფონდო ბირჟაზე (GSE) მხოლოდ ერთი გარიგება შედგა, რომელიც „ლიბერთი ბანკს“ უკავშირდება და მისი მოცულობა 166 ლარს შეადგენს.

ნოემბრის განმავლობაში დაფიქსირებული ერთადერთი ტრანზაქციის წყალობით, ბირჟის დღიურმა საშუალო ბრუნვამ 7.5 ლარს მიაღწია, რაც გასული თვეების მაჩვენებლებთან შედარებით მნიშვნელოვანი მაჩვენებელია, რადგან, ძირითადად საქართველოს საფონდო ბირჟაზე არცერთი გარიგება არ ხორციელდება.

ზოგადად, 0-ლარიანი ბრუნვა მიმდინარე და გასული წლისთვის დამახასიათებელი იყო - 2022 წლის ივნისი, ივლისში და 2021 წლის მაისში, აპრილში, ივნისსა და ივლისშიც არცერთი გარიგება არ შემდგარა. საერთო ჯამში, გასულ წელს ბირჟაზე 104 077 ლარის გარიგებები განხორციელდა.

იანვარ-ნოემბერში ლარში განხორციელებული ტრანზაქციის ემიტენტები „ლიბერთი“ და „საქართველოს ბანკი“ იყვნენ. დოლარში ტრანზაქციის ემიტენტები კი „საქართველოს სალიზინგო კომპანია“ და „კახური ტრადიციული მეღვინეობა“. იანვარ-სექტემბერში, ევროში ტრანზაქცია არ განხორციელებულა.

შეგახსენებთ, საქართველოს საფონდო ბირჟა 1999 წელს, USAID-ის ხელშეწყობით დაარსდა და საქართველოში ერთადერთი მოქმედი ორგანიზებული ფასიანი ქაღალდების ბაზარია. მათი საერთო საბაზრო კაპიტალიზაცია 748 მილიონ დოლარს შეადგენს.