ახალგორიდან დევნილი 25 წლის მეწარმის ზაური კუდუხოვის მიერ დაწყებული ბიზნესი ფართოვდება. სოფელ ხურვალეთის დევნილთა დასახლებაში მცხოვრები მეწარმის ამბიციაა, მწყრის კვერცხის წარმოებაში ლიდერი პოზიცია დაიკავოს.


4 წლის წინ მცირე ფერმის მოწყობის მიზანი ოჯახის რჩენა და ფეხზე დადგომა იყო, რაშიც დიდი შრომა ჩადო. თავისი რესურსით გამოიკვლია ქართული ბაზარი და გადაწყვიტა ნაკლებად დომინანტური პროდუქტის: მწყრის ხორცის და კვერცხის წარმოება დაეწყო. მისი მცდელობა ყურადღების მიღმა არ დარჩენილა, საქმიანობის დაწყებიდან მალევე გახდა პროექტის „საქართველოში ახალგაზრდების სამეწარმეო უნარ-შესაძლებლობების, დასაქმებისა და შემოსავლის გენერირების მხარდაჭერის პროგრამის’’ მონაწილე, რომლის ფარგლებშიც ცოდნასთან ერთად გრანტიც მოიპოვა.


USAID-ის პროექტ Yes-Georgia-ს ფარგლებში მიღებული ფინანსური მხარდაჭერით შეიძინა ყველა საჭირო ინვენტარი, რომელიც აუცილებელი იყო წარმოებისთვის და ბიზნესის უკეთ წარმართვისათვის. როგორც ზაურ კუდუხოვი ამბობს, ბიზნესის დაწყების დღიდან საკმაოდ რთული გზა გაიარა, თუმცა ინოვაციურმა მიდგომამ, რომელიც პროდუქტის პოპულარიზაციის მიზნით თავად მოიფიქრა, გაამართლა და მისი რეალიზაციაც გააორმაგა.


,,წარმოება დავიწყე 4 წლის წინ, როცა ბიზნეს ადმინისტრირების ფაკულტეტის მეორე კურსზე ვსწავლობდი. ვცდილობდი, ჩემი საქმიანობა დამეკავშირებინა ისეთ ბიზნესთან, რომელიც პირველ რიგში საინტერესო იქნებოდა, შემოსავლიანი და ამავდროულად მოთხოვნადი. საკუთარი ძალებით ჩავატარე ბაზრის მცირე კვლევა და აღმოვაჩინე, რომ მწყრის ხორცის და კვერცხის დეფიციტი შეინიშნებოდა. მცირე საოჯახო ფერმის მოწყობა 1500 ლარით დავიწყე, ავაშენე მინი შენობა და შევიძინე აუცილებელი ინვენტარი, რაც წარმოების დასაწყებად აუცილებელი იყო. USAID-ის პროექტ Yes-Georgia-ს ფარგლებში მიღებული ფინანსური მხარდაჭერით შევიძინე ყველა საჭირო ინვენტარი, რომელიც აუცილებელი იყო წარმოებისა და ბიზნესის უკეთ წარმართვისათვის. ცხადია, წარმოების პირველი ნაბიჯები საკმაოდ რთული იყო იმ ფონზე, რომ ხალხის უმეტეს ნაწილს ინფორმაცია არ ჰქონდა მწყრის კვერცხის სასარგებლო თვისებების შესახებ, თუმცა თანდათან გაიზარდა ცნობადობაც და მომხმარებელთა წრეც გაფართოვდა“, - ამბობს ახალგაზრდა მეწარმე.







ამ ეტაპზე ზაურ კუდუხოვის ბიზნესი კიდევ უფრო წარმატებულია. იგი კვერცხისა და მწყრის ხორცით უკვე გორის რაიონის სავაჭრო ობიექტების გარდა, თბილისის რამდენიმე სუპერმარკეტსაც ამარაგებს. წარმატების მთავარ ფაქტორად კი შრომისმოყვარეობას, მიზანდასახულობასა და რისკს მიიჩნევს, რის გარეშეც წარმოების დაწყება გაუჭირდებოდა.


რაც შეეხება პანდემიური ვითარების გავლენას, ამ მხრივ ვერც მწყრის ბიზნესი აღმოჩნდა გამონაკლისი. კუდუხოვის თქმით, ხარჯი დაახლოებით 30%-ით გაეზარდა, რაც გლობალურ ბაზრებზე მიმდინარე ტენდენციას - ლოგისტიკის გაძვირებას უკავშირდება. დახლებზეც მწყრის კვერცხის პოზიციები შესუსტდა, ის არ არის ისეთი მოთხოვნადი პროდუქტი, როგორიც პანდემიამდე იყო, თუმცა ამას მეწარმის სამომავლო გეგმები არ შეუცვლია.


,,ამჟამად 900-მდე მწყერი მყავს, ხოლო კვერცხის დღიური წარმოება 300-400 ცალია. სამომავლოდ ვაპირებ მსხვილ ობიექტებშიც შევიტანო ჩემი პროდუქტი და გავხდე ერთერთი ლიდერი მწარმოებელი საქართველოს ბაზარზე. ვცდილობ, ჩემი პროდუქტი ყველასთვის ხელმისაწვდომი იყოს და შიდა ბაზარი სრულად მოვიცვა. მესმის, ამ მიზნის მიღწევა უზარმაზარ შრომას მოითხოვს, მაგრამ ნებისმიერი გამოწვევისთვის მზად ვარ“, - ამბობს ახალგაზრდა მეწარმე.


ამავდროულად იგი ეძებს პოტენციურ ინვესტორს, რომელიც დაეხმარება ბიზნესის გაფართოებაში და მიზნის მიღწევაში.


რაც შეეხება მწყრის კვერცხის სასარგებლო თვისებებს, ცნობილია, რომ ჩინელი მეცნიერები მას სხვადასხვა დაავადების სამკურნალოდ ჯერ კიდევ 300 წლის წინ უწევდნენ რეკომენდაციას. შემდეგში იაპონელებმა საფუძვლიანად შეისწავლეს ამ პროდუქტის თვისებები. მეცნიერული გამოკვლევები ჩაატარეს და დაასკვნეს, რომ მწყრის კვერცხი აუმჯობესებს ნერვული სისტემის ფუნქციას, ზრდის გონებრივ შესაძლებლობებს, გამოაქვს ორგანიზმიდან რადიონუკლიდები, რაც იაპონელებისთვის ყველა სხვა ქვეყნის მოსახლეობაზე მნიშვნელოვანია.


დღესდღეობით მწყრის კვერცხი იაპონიის ყოველ კუთხე-კუნჭულში იყიდება. მოსწავლეთა რაციონში მას განსაკუთრებული ადგილი უკავია.


მწყრის კვერცხი ფართოდ გამოიყენება კოსმეტიკურ მრეწველობაში.

მარი ჩიტაია