კომპანია „მწვანე მდელო“ დასავლეთ საქართველოში 35 ჰექტარ მიწას ამუშავებს, რომლის 15 % მოცვის, ხოლო დანარჩენი მწვანილის მოყვანას დაეთმობა.
კომპანიაში მოსავალს აგვისტოს ბოლოს ელოდებიან და მოყვანილი მოსავლის ევროპულ ბაზარზე გატანას გეგმავენ.
„მწვანე მდელომ“ ევროპულ ბაზარზე მუშაობა 2018 წელს დაიწყო და ბულგარეთსა ნიდერლანდებში სავაჭრო პარტნიორები მოიძია, რომლებიც ირანისა და საქართველოსგან მწვანილის შეძენით იყვნენ დაინტერესებულნი.
„სანამ ევროპულ ბაზარზე დავიწყებდით მუშაობას, დაახლოებით 25 წელი რუსეთის ფედერაციაში ქართული და ირანული მწვანილის ექსპორტით ვიყავით დაკავებულები. 2018 წელს კომპანია „მწვანე მდელო“ დავაფუძნეთ და ევროპულ ბაზარზე შევედით. ამას წინ უძღოდა ევროკავშირის მიერ თავისუფალი ვაჭრობის შეთანხმება, რომელიც საქართველოს ევროკავშირის ბაზარზე შესვლის შესაძლებლობას აძლევდა.
რაც შეეხება სავაჭრო პოტენციალს, მე და ჩემი ძმა ბაზრის შესასწავლად ბულგარეთში გავემგზავრეთ, ვხვდებოდით ქსელურ თუ საცალო მაღაზიებს და ირანული და ქართული წარმოების მწვანილს ვთავაზობდით.აქ ჩვენი პროდუქციით Lidl-ის ქსელი დაინტერესდა. ბულგარეთის შემდეგ ყურადღება ნიდერლანდებზე გავამახვილეთ, სადაც ჩვენი პარტნიორი „არტსენი“ გახდა, რომელიც ერთგვარი სავაჭრო პლატფორმაა. ამის მიზანი სუპერმარკეტების დიდ ქსელებთან გაცნობა და კონტაქტის დამყარება იყო.“ - განაცხადა კომპანია „მწვანე მდელოს“ დამფუძნებელმა კახაბერ ყავლაშვილმა.
კახაბერ ყავლაშვილი ევროპული ბაზრის ორ ტიპს გამოყოფს. პირველი არის მცირე ბაზარი, სადაც მოთხოვნები ნაკლებია, თუმცა კომპანიისთვის ფასი საინტერესო არ აღმოჩნდა და მეორე - დიდი საცალო ქსელები, რომლებსაც პროდუქციის ხარისხსა და შეფუთვაზე საკუთარი მოთხოვნები აქვთ.
„პროდუქტი ლაბორატორიაში სხვადასხვა პარამეტრების მიხედვით მოწმდება,რომელთა შორისაა პესტიციდების შემცველობა. სამწუხაროდ ქართულმა მწვანილმა ვერ დააკმაყოფილა შესაბამისი მოთხოვნები, ხოლო ირანულმა შემოწმება წარმატებით გაიარა. აღსანიშნავია, რომ თავდაპირველად ქართულ მწვანილს ადგილობრივი ფერმერებისგან ვყიდულობდით, ირანში კი თავად მოგვყავდა, რამაც ხარისხზე დაკვირვების მეტი შესაძლებლობა მოგვცა.“ - განმარტავს კომპანიის დამფუძნებელი.
ყაველაშვილის ინფორმაციით მწვანილის წარმოების საინვესტიციო მოცულობა დაახლოებით 50 000 ლარი იყო. ევროპული ბაზრის სირთულიდან გამომდინარე, ამ ეტაპზე კომპანიაში სიახლეები არ იგეგმება. მათ მთავარ მიზანს ხარისხიანი პროდუქციის უზრუნველყოფა წარმოადგენს.
„8 ჰექტარი მიწის ნაკვეთის მომზადებასა და დათესვაზე დაახლოებით 50 000 ლარი დაიხარჯა. წელს დაახლოებით 80 ტონა მწვანილის მოსავალს ველოდებით. სად გავყიდით პროდუქტს, დამოკიდებულია ფასებზე. სავარაუდოდ რუსეთის ბაზრით დავიწყებთ, მაგრამ ასევე, პროდუქციის ევროპულ ბაზარზე გატანასაც ვიმედოვნებთ,“ - ამბობს კახაბერ ყაველაშვილი.
East-fruit.com
მოამზადა ანი ცარციძემ
მწვანე მდელო
