თბილისში მუხიანსა და გლდანს შორის ახალი საცხოვრებელი უბნის მშენებლობა, რამდენჯერმე გადაიდო, ბოლო ინფორმაციით კი სამშენებლო სამუშაოები 2019 წლის ბოლომდე უნდა დაწყებულიყო, თუმცა, პროცესი ამ დრომდე ჭიანურდება. „კომერსანტი“ მშენებლობის შეფერხების მიზეზით დაინტერესდა, როგორც გაირკვა პროექტის გადადება ინვესტორების მიერ, ფინანსური ანგარიშის მომზადებას უკავშირდება, რომელზეც დღესაც მუშაობენ.
პროექტის ინვესტორი კომპანიების „ბრუმველისა“ და კომპანია „ბისიდის“, პარტინიორი საქართველოში „გლობალ უნი გრუპის“ დირექტორი დავით ალექსიძე ამბობს, რომ ფინანსურ საკითხებზე მუშაობის დასრულებისთანავე მშენებლობის პროცესი დაიწყება. საუბარია, მუხიანსა და გლდანს შორის 60 ჰექტარის ტერიტორიაზე.
„მერიისგან ნებართვა გვაქვს, პროექტიც დამტკიცებულია და როგორც კი მშენებლობის ზუსტი ღირებულება გვეცოდინება სამშენებლო პროცესს დავიწყებთ. პროექტის მიხედვით, გათვალისწინებული 2 სკოლის, 2 საბავშვო ბაღის, სპორტული და საცხოვრებელი კომპლექსების, სასტუმროს, ასევე საზოგადეობრივი ადგილების, დასასვენებელი და სავაჭრო ცენტრების მოწყობა“-აცხადებს ალექსიძე. მისი განმარტებით, განხორციელდება 230 - 250 მილიონი აშშ დოლარის ინვესტიცია. შედეგად, თბილისს ექნება ეკოლოგიურად სუფთა უბანი, რომელიც სრული თანამედროვე ინფრასტრუქტურით იქნება გამართული.
შეგახსენებთ, რომ კომპანია „გლობალ უნი გრუპი“ უცხოელი ინვესტორების მეშვეობით მშენებლობის დაწყებას ჯერ კიდევ 2017 წელს გეგმავდა, რომელიც სხვადასხვა მიზეზის გამო დღემდე გაჭიანურდა.
როგორც მაშინ, დირექტორმა დავით ალექსიძემ „კომერსანტს“ განუცხადა პროექტის ფარგლებში, აქტიურ ფაზაში იყო შესული საცხოვრებელ უბნამდე მისასვლელი გზის და საკომუნიკაციო სისტემების მშენებლობისთვის პროექტირების ეტაპი. ასევე მუშაობდნენ, GWP-სთან, ყაზტსრანსგაზთან, სილქნეტთან კომუნიკაციების უზრუნველყოფასთან დაკავშირებით.
როგორც „გლობალ უნი გრუპის“ დირექტორი განმარტავს, 2020 წელს ფინანსური მხარე მოწესრიგდება, რაც შეეხება პროექტირებას, დასრულებულია და ტენდერის საფუძველზე სამშენებლო სამუშაოების შემსრულებელი კომპანიების შერჩევა მოხდება.
ინვესტორ კომპანიას „ბრუმველი“, რომელიც მუხიანსა და გლდანს შორის პროექტირების პროცესშია ჩართული, დეველოპმენტის კუთხით გამოცდილება აქვს აშშ-ში, დიდ ბრიტანეთში, ისრაელში, ბოლო პროექტი კი, რომელიც განახორციელა, პრაღაში საცხოვრებელი დასახლების შექმნაა.
რაც შეეხება მის პარტნიორ ქართულ კომპანიან, გლობალ უნი გრუპს (GUG) - ბიზნეს კონსულტაციებსა, ინვესტიციების და ვაჭრობის ხელშწყობაზე ორიენტირებული კომპანიაა. GUG ხელს უწყობს მცირე და საშუალო კომპანიების საქმიანობას, ისეთი მიმართულებებით, როგორიცაა საქმიანი პარტნიორების მოძიება, პროექტების მენეჯმენტი, მარკეტინგი, გაყიდვებისა და სხვა ბიზნეს საქმიანობის დაგეგმარება. კომპანია ხელს უწყობს უცხოურ კომპანიებს ქართულ ბაზარზე შემოსვლაში და დამკვიდრებაში, ასევე ეხმარება ადგილობრივ კომპანიებს საზღვარგარეთ საქმიანობის დაწყებაში. ამ მიზნებისათვის GUG-ი თანამშრომლობს მთელ რიგ პარტნიორ კომპანიებთან აშშ-ში, ევროპაში, ისრაელში და იორდანიაში. GUG-ი დაარსდა 2009 წელს და ამ დროისთვის კომპანია უკვე ცნობილია როგორც საქართველოში ისე ქვეყნის საზღვრებს გარეთაც.
ნათია ლომიძე