„მთავრობას მინდა შევთავაზო საგადასახადო საშეღავათო პაკეტის შემუშავება, რომელიც რითეილის სექტორს გამოაცოცხლებს“, - ამის შესახებ საქართველოს სავაჭრო ცენტრების ასოციაციის ხელმძღვანელმა ლევან ყარალაშვილიმა დღეს გამართულ ბრიფინგზე განაცხადა, სადაც 12 ბიზნესასოციაციამ პრემიერთან შეხვედრა მოითხოვა. თბილისი ცენტრალის“ დირექტორი აცხადებს, რომ აუცილებელია ბიზნესთან მჭიდრო თანამშრომლობა და მუშაობა ყოველდღიურ პრობლემატიკაზე და არა გრძელვადიან- რამდენიმეწლიან გეგმებზე.
„უკვე ერთი წელიწადია ფაქტობრივად ფორსმაჟორის რეჟიმში ვცხოვრობთ, ამ პერიოდში ძალიან ბევრი რთული ეტაპი გავიარეთ და მწარე გამოცდილებიდან გამომდინარე შევიკრიბეთ დღეს, რომ კიდევ ერთხელ გავაჟღეროთ ის თემატიკა რომელიც გვაწუხებს. მე ფოკუსს გავაკეთებ ორ საკითხზე - ერთი რაც არის ყველასთვის საერთო პრობლემა და ერთი დარგისთვის სპეციფიკური პრობლემა. ეს არის ე.წ. კომენდანტის საათი რომელიც ერთი წელია ქვეყანაში არის და დღეს თუ ეკონომიკის გამოცოცხლებაზე ვლაპარაკობთ აუცილებელია ამ მიმართულებით პოლიტიკის გადახედვა იქნება ეს კომენდანტის საათის მოხსნა თუ ვადის გაგრძელება. ზაფხული იწყება ტურისტული სეზონი უნდა აღდგეს და ამისთვის კრიტიკულია, რომ საღამოს მეტი დრო და სივრცე არსებობდეს
რაც შეეხება კონკრეტულად სავაჭრო ცენტრებს, ჩვენ არა ერთხელ ვისაუბრეთ იმაზე, რომ ე.წ. დარგობრივი პაკეტები რაც იყო დამუშავებული არ შეხებია ამ სექტორს რომელიც ასევ ძალიან დაზარალებული სეგმენტია. ჩვენი სპეციფიკიდან გამომდინარე მთავრობას მინდა შევთავაზო საგადასახადო საშეღავათო პაკეტის შემუშავება რომელიც ამ დარგს გამოაცოცხლებს და თითქმის 25 000 ადამიანი რომელიც ამ სექტორშია დასაქმებული შეძლებს დაუბრუნდეს სამუშაო ადგილებს და უფრო სწრაფად აღვადგინოთ ჩვენი ეკონომიკა და ჩვენი ბრუნვა. გვახსენდება შარშანდელი 28 ნოემბრის ჩაკეტვის პერიოდი, როდესაც 24 საათში გავიგეთ, რომ მთელი სექტორი იკეტებოდა და იმედს ვიტოვებ, რომ მსგავსი პრობლემა აღარ იქნება, რადგან აუცილებელია კომუნიკაცია, მჭიდრო თანამშრომლობა ბიზნესთან და მუშაობა ყოველდღიურ პრობლემატიკაზე და არა გრძელვადიან, რამდენიმეწლიან გეგმებზე. ჩვენი შეთავაზებაა კიდევ ერთხელ დავსხდეთ და ჩვენ ჩვენი გამოცდილება გავუზიაროთ იმ ხალხს რომელიც გადაწყვეტილების მიღების პროცესშია ჩართული“, - განაცხადა ლევან ყარალაშვილიმა.