2021 წელს თანაინვესტირების ფონდის, რამდენიმე მნიშვნელოვანი პროექტის დასრულებას გეგმავს, მათ შორისაა: მტკვარი ჰესის ძირითადი სამუშაოების დასრულება, რომლის წლიური გამომუშავება საქართველოს მთლიანი ელექტროენერგიის მოხმარების 1.9%-ს შეადგენს; მარიოტის უმაღლესი კლასის ბრენდის „Luxury Collection“ 101 მლნ დოლარის ინვესტიციის სასტუმროს და აქსის თაუერსში სასტუმრო „პულმანი“-ს გახსნა.
როგორც „კომერსანტს“ „თანაინვესტირების ფონდში“ უთხრეს, ფონდი სხვადასხვა სექტორში 9 პროექტს აერთიანებს. სოფლის მეურნეობის მიმართულებით სამი პროექტია, კერძოდ: „საქართველოს სათბურის კორპორაცია“, „გეოაგრო“ და „ქართული აგრო სახლი“. უძრავი ქონების მიმართულებით საქართველოს თანაინვესტირების ფონდის პროექტების ნუსხაში წარმოდგენილია 2 პროექტი: „ აქსის თაუერსი“ და „გალერია თბილისი“, მრეწველობის მიმართულებით ფონდი წარმოდგენილია 1 პროექტის სახით, კერძოდ: „ჰაიდელბერგ ცემენტით“, ხოლო ენერგეტიკის მიმართულებით ახორციელებენ სამ მსხვილ პროექტს, კერძოდ: „მტკვარი ჰესი“, „ონი 1“ და „ლენტეხი ჰესი“.
„2021 წელს ვიმედოვნებთ ამოქმედდება საერთაშორისო ავიარეისები და ტურიზმის სექტორი კვლავ გააგრძელებს ზრდას. პანდემიასთან დაკავშრებული მდგომარეობის გაუმჯობესებასთან ერთად, 2021 წელს მიზნად ვისახავთ, თავისუფლების მოედანზე, მარიოტის უმაღლესი კლასის ბრენდის „Luxury Collection“ სასტუმროს გახსნას, ხოლო აქსის თაუერსში სასტუმრო „პულმანი“-ს და საფეხმავლო ქუჩის გახსნას, რომელიც ჭავჭავაძის გამზირს აბულაძის ქუჩასთან დაააკავშირებს და მომხმარებლებს მრავალფეროვან კაფეებსა და რესტორნებს შესთავაზებს. 2021 წელსვე იგეგმება სიღნაღში არსებული სასტუმროს მშენებლობის დასრულებაც, ხოლო ენერგეტიკის მიმართულებით 2021 წლის ბოლოსთვის იგეგმება მტკვარი ჰესზე ძირითადი სამუშაოების დასრულება.
მტკვარი ჰესის პროექტი ერთ-ერთი ყველაზე მნიშნელოვანია საქართველოს თანანინვესტირების ფონდის ნუსხაში. 2014 წელს თანაინვესტირების ფონდმა მრავალი წლის მანძილზე გაჩერებული პროექტი სრულად შეისყიდა და მშენებლობა განაახლა. აღნიშნული პროექტის ჯამური დადგმული სიმძლავრე 53 მგვტ-ია, ელექტროენერგიის საშუალო წლიური გამომუშავება 251.5 მლნ კვტ.სთ. აღსანიშნავია, რომ პროექტის სავარაუდო წლიური გამომუშავება შეადგენს საქართველოს მთლიანი ელექტროენერგიის მოხმარების 1.9% -ს (2019 წელს 13.4TWh). 2020 წლის თებერვლის თვის დასაწყისში, „მტკვარი ჰესის“ ფარგლებში, საქართველოში Double Shield TBM-ით გაყვანილი ყველაზე გრძელი და დიდი დიამეტრის მქონე გვირაბის ექსკავაცია დასრულდა, გვირაბის სიგრძე 9,6 კმ-ია, ხოლო ექსკავაციის დიამეტრი 6 მეტრი. გვირაბის ექსკავაცია პროექტის ერთ-ერთი ყველაზე მნიშვნელოვანი და ხანგრძლივი ეტაპი იყო, მოცემული ფაზის დასრულებით მშენებლობა დასკვნით ეტაპზე გადავიდა“, - განმარტეს „თანაინვესტირების ფონდში“.
ნინო თამაზაშვილი