მთის კურორტები კიდევ ერთი გამოწვევის წინაშე დგანან. არასახარბიელო ზამთრის სეზონის შემდეგ, კორონავირუსით გამოწვეული აკრძალვა, მთიან რეგიონზეც გავრცელდა. შესაბამისად, ზამთრის კურორტები დამსვენებლებს ვეღარ მიიღებენ.სეზონის დახურვის გადაწყვეტილება მთავრობის მიერ გუშინ გამართულ ბრიფინგზე, ეკონომიკისა და მდგრადი განვითარების მინისტრმა მიიღო.
ეკონომიკის მინისტრის განცხადებით, ზამთრის კურორტებზე სეზონის დახურვა სწორი და აბოსლუტურად გამართლებული ნაბიჯია ვირუსის გავრცელების პრევენციასთან მიმართებაში.
ზამთრის კურორტებზე სეზონის ნაადრევ დახურვას, საოჯახო ტიპის სასტუმროებიც ეხმაურებიან. ბაკურიანი საოჯახო სასტუმრო premier house-ის მეპატრონე გიორგი გორჯოლაძე „კომერსანტთან“ აცხადებს, რომ კორონავირუსისგან გამოწვეული შეზღუდვა, ზამთრის სეზონის დახურვას დაემთხვა, თუმცა, რამდენიმე კვირით ადრე კურორტებზე მუშაობის შეწყვეტა ადგილობრივ ბაზარზე მაინც აისახება.
„სეზონის დასრულებას დაემთხვა მიმდინარე მოვლენები. ამ დროს ისედაც სიმცირეა დამსვენებლების, თუმცა მაინც იგრძნობა კორონავირუსის გავლენა და ხალხი კიდევ უფრო შემცირებულია. იანვარში რომ ყოფილიყო ეს ამბავი ყველაზე დიდ ზარალს მაშინ მივიღებდით, რადგან ტურისტული პიკი წინა თვეებში იყო. დღეს ჩვენმა სასტუმრომ სეზონი უკვე დახურა და ახლა ამ რეჟიმზე გადავალთ, დროებით შევაჩერებთ მუშაობას.“-ამბობს გიორგი გორჯოლაძემ.
„მთის კურორტებზე სეზონის ნაადრევი დახურვა ადგილობრივ ბიზნესზე უარყოფით გავლენას მოახდენს და ამას ჩვენ ვიგრძნობთ,“-ასე ეხმაურება გუდაურში მდებარე სასტუმრო „ედელვაისის“ წარმომადგენელი, ზამთრის კურორტების ნაადრევ დახურვას.
„ჯერ ისედაც ცუდი სეზონი გვქონდა იმ მხრივ, რომ ძალიან ცოტა ტურისტი მივიღეთ. ჯავშნების დიდი ნაწილი გაგვიუქმდა, რამაც გარკვეული ფინანსური პრობლემები შეგვიქმნა. რაც შეეხება კორონავირუსის გამო შექმნილ მდგომარეობას საკმაოდ მძიმეა, რადგან რამდენიმე დღეში დაცალეს დამსვენებლებმა კურორტი და წავიდნენ. ჩვენ ჯერ ვმუშაობთ, რამდენიმე სტუმარი გვყვავს, ხვალ ისინიც დატოვებენ სასტუმროს და დროებით შევწყვეტთ მუშაობას.“- ამბობს „ედელვეისის“ წამომადგენელი.
შეგახსენებთ, რომ ზამთრის კუროტების ვადაზე ადრე დახურვის გადაწყვეტილება საქართველოს ეკონომიკის და მდგრადი განვითარების მინისტრმა ნათია თურნავამ მთავრობის მიერ გამართულ ბრიფინგზე მიიღო. ზამთრის კურორტების ნაადრევად დახურვის მიზეზი, გუდაურში მყოფი ორი ჩეხი ტურისტია, რომლებსაც კორონავირუსი დაუდგინდათ.
ნათია ლომიძე