არჩევნების შემდეგ მმართველი გუნდის მთავარ გამოწვევას ისევ COVID 19-თან ბრძოლა წარმოადგენს. „კომერსანტი“ დაინტერესდა რა ძირითადი ეკონომიკური ნაბიჯები უნდა გადადგას არჩევნებში გამარჯვების შემდეგ ახალმა მმართველმა გუნდმა, იმისთვის რომ პანდემიის ფონზე ეკონომიკის სწრაფ გაჯანსაღებას შეუწყოს ხელი.
აკადემიკოსი, ეკონომიკურ მეცნიერებათა დოქტორი ლადო პაპავა „კომერსანტთან“ საუბრისას აღნიშნავს, რომ ამ ეტაპზე მთავარი გამოწვევა კორონავირუსია, სწორედ ამიტომ ვინც არ უნდა იყოს მთავრობაში, ისევ და ისევ აქტუალური რჩება თემა - ანტიკრიზისული ღონისძიებები და მზადება პოსტკრიზისული აღორძინებისთვის.
„ვინც არ უნდა იყოს ხელისუფლებაში, მის მთავარ ამოცანას ისევ და ისევ COVID 19-ის პანდემიით გამოწვეული ეკონომიკური კრიზისი წარმოადგენს. თუმცა ეს არ არის წმინდა ეკონომიკური ხასიათის, ის შექმნილია მედიცინაში, ამიტომ სანამ მედიცინა არ დაამარცხებს კორონავირუსს, მანამდე ეკონომიკური კრიზისი არ დასრულდება. სწორედ ამიტომ ვინც არ უნდა იყოს მთავრობაში იმისთვის, ისევ და ისევ აქტუალური რჩება თემა - ანტიკრიზისული ღონისძიებები და მზადება პოსტკრიზისული აღორძინებისთვის. ეს შესაძლოა იყოს ჩვეულებრივი გამეორება იმისა, რაც აქამდე იყო ან თვისობრივად ახალი მოდელის ჩამოყალიბება ქართულ ეკონომიკაში ანუ უნდა მოხდეს ისევ მომხმარებლურ ეკონომიკაზე ორიენტირების აღება, როგორც აქამდე წლების განმავლობაში იყო, თუ როგორმე გავხდეთ მწარმოებელი ერი, მწარმოებელი ქვეყანა. ვფიქრობ, რომ ვინც არ უნდა იყოს მთავრობაში მისი გამოწვევაა, ქვეყანა მომხმარებლური ერიდან გამოიყვანოს და მწარმოებელ ერად გადააქციოს.
ამ ეტაპზე კონკრეტული ნაბიჯების დასახელებისგან თავს შევიკავებ, ერთი მარტივი მიზეზის გამო, რადგან ჩვენ არ ვიცით კორონავირუსით გამოწვეული პანდემია რამდენ ხანს გასტანს. დიდად ოპტიმისტურ გადაწყვეტილებებს და შეთავაზებებს ვერ გავაკეთებ, რადგანაც თვითონ მსოფლიო ჯანდაცვის ორგანიზაციამაც არ იცის ამ პანდემიის მომავალი. ჩვენ მივიღეთ ისეთი გზავნილი ამერიკელი ცნობილი ინფექციონისტ ენტონი ფაუჩისგან, რომ პანდემია 2022 წელს იქნება დაძლეული, ანუ კიდევ სულ ცოტა წელიწადნახევარი უნდა ვიყოთ ანტიკრიზისული ღონისძიებების რეჟიმში. არ მინდა პესიმისტური განცხადება გამომივიდეს, მაგრამ ამ ეტაპზე ვეყრდნობით მედიკოსების დასკვნას, სანამ ისინი ვერ დაამარცხებენ კორონავირუსის პანდემიას, ჩვენ, ეკონომისტები დიდად ოპტიმისტები ვერ ვიქნებით“, - განაცხადა ლადო პაპავამ.
ნინო თამაზაშვილი