ქართული საწარმო, რომელიც უცხოური ბრენდებისთვის ტანსაცმელს კერავდა, გაკოტრდა. საწარმოს გაკოტრების შესახებ ინფორმაცია რეესტრში უკვე აისახა. სამკერვალო კომპანია MGMTex-მა თბილისის საქალაქო სასამართლოს სამოქალაქო საქმეთა კოლეგიას გადახდისუუნარობის საქმის წარმოების დაწყების შესახებ მოთხოვნით მიმდინარე წლის მაისში მიმართა.
„საჯარო რეესტრის ეროვნული სააგენტოს მიერ მიღებულ იქნა განცხადება, რომლითაც მოთხოვნილია გადახდისუუნარობის (გაკოტრება, რეაბილიტაცია) საქმის წარმოების დაწყება. სამართლებრივი ფორმა: შეზღუდული პასუხისმგებლობის საზოგადოება; დასახელება: შპს ემჯიემტექსს. “საჯარო რეესტრის შესახებ“ საქართველოს კანონის შესაბამისად, მიღებულ იქნა გადაწყვეტილება მოთხოვნის დაკმაყოფილების თაობაზე“, - აღნიშნულია რეესტრში.
„კომერსანტი“ დაინტერესდა რატომ დადგა კომპანია გაკოტრების წინაშე მაშინ როცა MGMTex მთავრობის ერთ-ერთი მსხვილი კონტრაქტორი იყო და ერთ-ერთმა პირველმა დაიწყო პირბადის წარმოება. მედია ჰოლდგინის არაერთი მცდელობისა საწარმოს დირექტორთან დაკავშირება ვერ მოხერხდა. აღსანიშნავია ისიც, რომ MGMTex „აწარმოე საქართველოში“ ფინანსებზე ხელმისაწვდომობის კომპონენტით სარგებლობდა, სწორედ ამიტომ კომპანიის გაკოტრების საკითხზე ეკონომიკის სამინისტროს დავუკავშირდით, თუმცა პასუხი ამ ეტაპზე ვერც სახელმწიფო უწყებისგან მივიღეთ.
კორონავირუსის პანდემიის გამო საწარმომ მუშაობა 16 აპრილს შეაჩერა, შეჩერებული შეკვეთების შემდეგ, MGMTex-მა პირბადეების წარმოება დაიწყო, თუმცა მაშინ კომპანიაში აცხადებდნენ, რომ საწარმოს ფუნქციონირებას ვერც პირბადეების სახელმწიფო პროგრამამ შეუწყო ხელი. მაშინ MGMTex-ის დირექტორი აცხადებდა, რომ კომპანიის ზარალი დიდი იყო, რის გამოც მუშაობა შეუძლებელი იყო, შედაგად საწარმო მთლიანად დაიხურა, 320 თანამშრომელი კი უხელფასო შვებულებაში გაუშვეს.
საჯარო რეესტრის ამონაწერის მიხედვით, კომპანიის მეწილეები არიან:
ელიზბარ ლომინაძე - 10%;
მიქალაკის ლიკარგო (ბრიტანეთის მოქალაქე) - 50%;
ნოდარ საბანაძე - 40%.
შეგახსენებთ, რომ MGMTex-ის ქუთაისის საწარმო 2018 წლის აპრილში გაიხსნა. კომპანია წარმოადგენდა ქართულ-რუმინული ინვესტიციით შექმნილ საწარმოს. MGMTex-ი იყო რუმინული ტანსაცმლის მწარმოებელის „Ottorose” შვილობილი კომპანია, რომელიც პროდუქციას მსოფლიოში ისეთი ცნობილი ბრენდებისთვის აწარმოებდა, როგორებიცაა: H&M, Next, Zara, Coast, Colveta, United Collors of Benneton, Tommy Hilfiger, Marks&Spencer და სხვა. ქართულ საწარმოში ტანსაცმელი მთლიანად ევროპის ქვეყნებისთვის მზადდებოდა.
კომერსანტი