ზამთრის კურორტებს წელს რთული სეზონი ჰქონდათ. უჩვეულოდ თბილი და
უთოვლო ზამთრის გამო,საქართველოს სამთო კურორტები ტურისტების შემცირებულ რაოდენობას მასპინძლობენ.
თოვლის გარდა, მთის კურორტები სხვა გამოწვევის წინაშეც იდგნენ, უწყლობის გამო, ბაკურიანსა
და გუდაურში ტურისტები ან არ ჩადიოდნენ ან უკვე დაჯავშნილ სასტუმროებს ტოვებდნენ.
კერძო სექტორის თქმით, უწყლოდ დარჩენილ კურორტზე ზამთრის სეზონი მათთვის თითქმის ჩავარდა. „კომერსანტი“ დაინტერესდა მსგავსი პრობლემების შემდეგ, კიდევ ხომ არ დგას მთიანი რეგიონი მსგავსი რისკების წინაშე. მთავრობის ადმინისტრაციაში რეგიონების მიმართულების ხელმძღვანელი სოზარ სუბარი „კომერსანტან“ აცხადებს, რომ კურორტის მთავარი საფრთხე, მხოლოდ უთოვლობაა, სხვა პრობლემები ბაკურიანმა და გუდაურმა უკან მოიტოვა.
„ზამთრის სეზონის ჩავარდნას ჰქონდა თავისი მიზეზი- უთოვლობა, მესტია იყო ამ მხრივ გამონაკლისი. ახლაც კი არ არის საკმარისი თოვლი ზამთრის კურორტებზე. რაც შეეხება უწყლობას, ბაკურიანისა და გუდაურის მცირე ნაწილში ნამდვილად შეიქმნა პრობლემა და ამას ვაღიარებთ, თუმცა, პრობლემის გამოსასწორებლად დღე ღამის განმავლობაში მუშაობდნენ შესაბამისი ჯგუფები და გამოასწორეს კიდეც.“-აცხადებს სოზარ სუბარი.
როგორც ცნობილია, გუდაურსა და ბაკურიანში არახელსაყრელი ამინდის გამო ვერ ხერხდება ხელოვნური გათოვლიანება. რომლის პირველი ფაზა რეგიონებში 2014 წელს დაიწყო. ხელოვნური გათოვლიანების მიზანია, საკურორტო სეზონის დაწყება-დასრულება მხოლოდ ბუნებრივ ამინდზე არ იყოს დამოკიდებული.
შეგახსენებთ, რომ ახალი წლის პერიოდში გუდაურისა და ბაკურიანის დიდი ნაწილი უწყლოდ ერთი კვირა იყო დარჩენილი. მიმდინარე ამბების გამო, 7 იანვარს ბაკურიანსა და გუდაურში წყალმომარაგების პრობლემის შემდეგ გაერთიანებული წყალმომარაგების კომპანიის დირექტორი, ეკატერინე გალდავა გათავისუფლდა.
ტურისტული სეზონის პიკში, ბაკურიანში სასტუმროების ნაწილს წყალი გრაფიკით მიეწოდებოდა, ნაწილს კი წყალს სახანძრო მანქანები აწვდიდნენ. გუდაურთან დაკავშირებით გაერთიანებული წყალმომარაგების კომპანიამ განაცხადა, რომ პრობლემა გუდაურში მშრალი კლიმატური პირობების გამო წყლის მარაგის შემცირებამ და სეზონზე გაზრდილი მოხმარების შედეგად წნევის ვარდნამ გამოიწვია.
ნათია ლომიძე