საქართველოს ეკონომიკისა და მდგრადი განვითარების მინისტრმა ნათია თურნავამ აკადემიურ წრეებთან, ეკონომისტებთან და ფინანსისტებთან ონლაინ შეხვედრის ფორმატში ანტიკრიზისული გეგმა განიხილა.
შეხვედრას ესწრებოდა ეკონომიკის ექსპერტი და ანალიტიკოსი ნიკა შენგელიაც, რომელმაც „კომერსანტთან“ განხილული თემების დეტალებზე ისაუბრა. მისი თქმით, მიუხედავად იმისა, რომ მხოლოდ რამდენიმე მონაწილეს მიეცა აზრის გამოთქმის საშუალება, ყველამ ერთხმად დაიწუნა მთავრობის მიერ ტურიზმის სექტორის პრიორიტეტად მიჩნევა.
„ეს იყო ეკონომიკის მინისტრთან ონლაინ შეხვედრა, 30-35 მონაწილე ვესწრებოდით, მაგრამ მხოლოდ 4-5 ადამიანს მიეცა კითხვის დასმის და აზრის გამოთქმის საშუალება, მომავალ ორშაბათს კიდევ იგეგმება შეხვედრა და ჩვენს აზრს დანარჩენებიც დავაფიქსირებთ. ეს იყო ანტიკრიზისული გეგმის შეფასება, რომელიც მათივე თქმით, პირველ ნაბიჯებს მოიცავს და უფრო ვრცელი ვარიანტი მომდევნო დღეებში იქნება ცნობილი. საქართველოში არასოდეს ყოფილა რაიმე მკაფიოდ დაწრილი გეგმა ეკონომიკური განვითარების კუთხით და ახლა თუ შექმნიან ეს ძალიან კარგია. ერთხმად დაფიქსირდა ის აზრი და დაწუნებული იქნა მთავრობის ინიციატივა, რომ ტურისტული სექტორი პრიორიტეტად დაისახეს. ახლა როდესაც არ ვიცით რა მოხდება შემდომში, რადგან ევროპაში და რუსეთში საიდანაც ტურისტების მოლოდინი გვაქვს, ვხედავთ რა ვითარებაა, ამ დროს კი ჩვენ 1 ივლისიდან ვხსნით საზღვრებს, ამ ყველაფრისთვის მოზიდული სახსრებიდან და ბიუჯეტიდან ვხარჯავთ დიდი რაოდენობის თანხას და არ ვიცით ჩამოგვივა თუ არა ტურისტი. შემდგომში ჩემს აზრს იმასთან დაკავშირებით დავაფიქსირებ, რომ როცა ჩამოსულ ტურისტს ახვედრებ ისეთ სასტუმროს სადაც 90% მოწყობილი არის იმპორტირებული პროდუქციით, ასევე ახვედრებ საკვებს რომლის 80% იმპორტირებულია, ეს ძალიან ცუდია. ამიტომ ჯერ სოფლის მეურნეობაზე უნდა ვიზრუნოთ და შემდეგ სხვა დანარჩენ სექტორებზე, თუნდაც ტურიზმზე. განსაკუთრებული დოკუმენტის შემუშავებას ეს შეხვედრა არ ითვალისწინებს, უბრალოდ მთავრობას მინისტრის სახით აინტერესებდა ჩვენი აზრი და შეხედულებები“,- განმარტა ნიკა შენგელიამ.
მომდევნო ონლაინ შეხვედრა სავარაუდო ორშაბათს, 18 მაისს გაიმართება.
ნინო თამაზაშვილი