2019 წელს საქართველოდან მსოფლიოს 53 ქვეყანაში 94 მილიონამდე ბოთლი ღვინო იყო ექსპორტირებული, რაც 2018 წლის რაოდენობას 9%-ით აღემატება და დამოუკიდებელი საქართველოს ისტორიაში ყველაზე მაღალი მაჩვენებელია.
როგორც პრემიერ-მინისტრმა გიორგი გახარიამ მთავრობის სხდომაზე განაცხადა, უკიდურესი აუცილებლობის შემთხვევაში, ხელისუფლება შესყიდვებშიც ჩაერთვება.
„მთავრობამ მიიღო გადაწყვეტილება, რომ მოხდება რთველის სუბსიდირება. განსაკუთრებით ისეთი ჯიშების, როგორიც არის რქაწითელი და კახური მწვანე, რომლის ფასიც არ იქნება 80 თეთრზე ნაკლები. ამისთვის ბიუჯეტი უკვე გამოყოფილია. შესაბამისი დავალება სოფლის მეურნეობის სამინისტროს აქვს მიღებული“, - განაცხადა მთავრობის სხდომაზე გიორგი გახარიამ.
წელს ყურძნის საპროგნოზო მოსავალი ჭარბია და დაახლოებით 300 000 ტონას შეადგენს: რქაწითელი და კახური მწვანე 180 ათასი ტონას, საფერავის მოსავალი კი 90 ათასი ტონის ფარგლებში იქნება.
სახელმწიფოს მხრიდან უკანასკნელ წლებში განხორციელებულმა სწორმა დარგობრივმა პოლიტიკამ მევენახეობა-მეღვინეობის დარგი მნიშვნელოვნად გააძლიერა: გაშენდა ახალი ვენახები, შეიქმნა ახალი საწარმოები, გაუმჯობესებულია ღვინის ხარისხი, ამუშავდა „აგროკრედიტისა“ და „აგროდაზღვევის“ სისტემა, გაფართოვდა საექსპორტო ბაზრების არეალი, რეკორდულ რაოდენობამდე გაიზრდა ღვინის ექსპორტი.
2018 წელი იყო პირველი, რომელიც სრულად საბაზრო პირობებში ჩატარდა. ეს ბოლო 10 წლის განმავლობაში პირველი შემთხვევა იყო, როდესაც სახელწიფო სრულად გამოვიდა ყურძნის სუბსიდირების რეჟიმიდან.
„კოვიდ-19“-ის პანდემიის შედეგად შექმნილმა კრიზისულმა ვითარებამ კი ღვინის სექტორი მნიშვნელოვნად დააზარალა - შემცირდა ექსპორტი, ტურისტული სეზონის ჩავარდნამ მინიმუმადე დაიყვანა ღვინის გაყიდვები შიდა ბაზარზე.
Imedinews
რთველი
