„საყოველთაო ინტერნეტიზაციის პროექტი“, რომელსაც ა(ა)იპ OPEN NET-ი ახორციელებს და რომელიც ეკონომიკისა და მდგრადი განვითარების სამინისტროს “ინოვაციების და ტექნოლოგიების სააგენტოს” მიერ 2015 წლის 21 ივლისს დააფუძნდა, “ქართული ოცნების” ხელისუფლების მიერ 2015 წელს დაანონსდა, ხოლო 2016 წელს ოფიციალურად უნდა დაწყებულიყო მისი განხორციელება, დღემდე მივიწყებული იყო. პირვანდელი გეგმის მიხედვით 2020 წელს საქართველოს მოსახლეობის 90%-ს უნდა ჰქონოდა მინიმუმ 15 MB-იან ინტერნეტთან წვდომა, მაგრამ დადგა 2020 წელი და ინტერნეტიზაციის პროექტის დასრულების ნაცვლად მისი დაწყების შესახებ თავიდან დაანონსდა.
ეს არის პროექტი, რომლითაც ხელისუფლება 2014 წლის არჩევნების შემდეგ მუდმივად თავს იწონებდა, თუმცა დღემდე ისე მოვიდა, რომ მის განსახორციელებლად არცერთი ქმედითი ნაბიჯი არ გადაუდგამს. ასევე, როგორც ცნობილი იყო, „საყოველთაო ინტერნეტიზაციის პროექტს“ ფონდი „ქართუ“ აფინანსებდა და მის განსახორციელებლად 100 მილიონი დოლარი უნდა დახარჯულიყო, თუმცა როგორც აღმოჩნდა, გაურკვეველი მიზეზების გამო, ბიძინა ივანიშივილის ფონდი ამ პროექტს ჩამოშორდა და ახლა სახელმწიფო თავად იზრუნებს შესაბამისი ფინანსების მოზიდვაზე.
დღემდე „ოფენ ნეტი“ მხოლოდ ფორმალურად არსებობდა და სახელმწიფო ბიუჯეტიდან მიღებული თანხა მხოლოდ იქ დასაქმებული ადამიანების მაღალ ანაზღაურებას ხმარდებოდა. ახლა კი, როგორც აღმოჩნდა, შეიცვალა ორგანიზაციის დირექტორი და „ოფენ ნეტს“ მარიამ სულაბერიძე უხელმძღვანელებს, რომელიც წინა ხელმძღვანელისგან განსხვავებით მედიაშიც გამოჩნდა და განაცხადა, რომ „საყოველთაო ინტერნეტიზაციის“ პროექტის განხორციელება კვლავ იგეგმება და სახელმწიფო მოიცავს იმ რეგიონების დაფარვას, რომელშიც დღეს კერძო სექტორს არ აქვს გამოხატული ინტერესი.
„აქტიურად ვმუშაობთ მსოფლიოს ბანკთან, რომ დროულად დავიწყოთ მთლიანად ინტერნეტიზაციის პროექტი, რომელიც მთლიან საქართველოს მოიცავს. მოიცავს საქართველოს იმ რეგიონებს, რომლებში დღეს არ არის ფართოზოლოვანი ინფრასტრუქტურა და რომლის მოსახლეობაც მოკლებულია ინტერნეტ მომსახურეობას.
სახელმწიფო მოიცავს იმ რეგიონების დაფარვას, რომელშიც დღეს კერძო სექტორს არ აქვს გამოხატული ინტერესი. ანუ მათ არ აქვთ იქ ინფრასტრუქტურა და ასევე გააჟღერეს ინფორმაცია, რომ მომდევნო 3 წლის განმავლობაში არ აპირებენ მის აშენებას. შესაბამისად, სწორედ იმ რეგიონებში, სადაც დღეს ინფრასტრუქტურა არ არის, მას ააშენებს სახელმწიფო. ეს არის ამ პროექტის ძირითადი მიზანი. საპილოტე პროცესი უნდა დამთავრდეს წლის ბოლოს. სამწუხაროდ პანდემიამ შეგვიშალა ხელი. იმედი გვაქვს ხელის შემშლელი ფაქტორი აღარ გვექნება“, – განაცხადა მარიამ სულაბერიძემ.
ასევე, მარიამ სულაბეძის განცხადებით, ოზურგეთი იქნება პირველი რეგიონი, საიდანაც საპილოტე პროექტი დაიწყება.
„ჩვენ გადავწყვიტეთ, რომ სანამ მსოფლიო ბანკი ჩაერთვება საქმეში და გავივლით ყველა პროცედურას, გადაიდგას გარკვეული ნაბიჯები. საქართველოს მთავრობამ მიზანშეწონილად მიიჩნია, რომ პირველი ნაბიჯი გადაგვედგა და შეგვერჩია ერთ-ერთი რეგიონი საპილოტედ, სადაც მოხდებოდა ინფრასტრუქტურის განვითარება. ამ მიზნით შეირჩა ოზურგეთის რაიონი. ამ რეგიონში 49 დასახლებული პუნქტია და ეს მოიცავს 48 ათასზე მეტ მოსახლეს. მოსახლეობის რაოდენობამ განსაზღვრა, რომ რაც შეიძლება მეტი მოსახლეობა მოეცვა ამ საპილოტე პროექტს. გარდა ამისა, გეოგრაფიულად ეს არეალი გვაძლევს საშუალებას, რომ შედარებით შეზღუდულ ვადებში ჩვენ მოვახერხოთ და შევასრულოთ ეს სამუშაოები“, – განაცხადა მარიამ სულაბერიძემ.
პროექტის მნიშვნელობაზე ასევე ისაუბრა პრემიერ-მინისტრმა გიორგი გახარიამ.
„ოზურგეთის რაიონის 49 სოფლის ინტერნეტიზაციის პროექტი განხორციელდება. ეს იქნება მაღალი ხარისხის ინტერნეტის მიწოდება. ეს არის გამოწვევა, რომელიც ჩვენ ეპიდემიამ და კრიზისმა დაგვანახა. მაღალი ხარისხის ინტერნეტი თითოეულ ქართულ სოფელში – ეს არის ამოცანა, რომელიც უნდა გადავწყვიტოთ. ეს უბრალოდ ყოველდღიური ცხოვრების აუცილებლობა ხდება იმისთვის, რომ ფერმერებმა იმუშაონ, ჩვენმა ბავშვებმა მიიღონ განათლება და ცხოვრების ჩვეულებრივი დონე, რომელიც არის ქალაქში, მივიტანოთ სოფლად“, – აცხადებს გახარია.
აღსანიშნავია, რომ „ოფენ ნეტის“ ახალი დირექტორის დანიშვნამდე მთავრობამ საქართველოს ინტერნეტიზაციის პროექტის ფარგლებში, ფართოზოლოვანი ქსელების განვითარების 2020-2025 წლების სტრატეგიაც დაამტკიცა, რომლის მიხედვითაც 2025 წლისთვის შინამეურნეობების 100%-ს უნდა ჰქონდეს 100 მეგაბიტ წამის ინტერნეტთან წვდომა, ხოლო ბიზნესებს კი 1 გიგაბიტ წამის სიჩქარის ინტერნეტთან უნდა ჰქონდეთ წვდომა.
როგორც ჩანს, ხელისუფლების წარმომადგენლებმა წინასაარჩევნოდ კვლავ გაიხსენეს ოთხი წლის განმავლობაში მივიწყებული პროექტი. პროექტი, რომელიც ქვეყნისთვის უმნიშვნელოვანესია და იმედია ამჯერად მაინც მოხერხდება მისი განხორციელება და დაპირება – კვლავ დაპირებად არ დარჩება. ვინაიდან, დაუშვებელია 21 საუკუნის საქართველოში ინტერნეტი ჯერ კიდევ ხელმიუწვდომელ, ფუფუნების საგნად რჩებოდეს. ფაქტია, რომ ქვეყნის რეგიონების დიდ ნაწილში ოპტიკურ–ბოჭკოვანი ქსელი დღემდე არ არსებობს და მოსახლეობა ვერ ახერხებს ინტერნეტით სარგებლობას. ინტერნეტის დაფარვა საქართველოს რეგიონებში ძირითადად 60%–ს ქვემოთაა, რაც ნამდვილად კატასტროფული მაჩვენებელია.
ერთადერთი რაც პროექტის განხორციელებაში კვლავ ბუნდოვანებას აჩენს მისთვის საჭირო ფინანსებია, ვინაიდან დღემდე საჯაროდ არ გაცხადებულა თუ რა დაჯდება მეორედ გაცოცხლებული „საყოველთაო ინტერნეტიზაციის პროექტი“ და დააფინანსებს თუ არა მას სრულად მსოფლიო ბანკი, რომელსაც მთავრობა ამ პროექტის დაფინანსების ერთ-ერთ მთავარ წყაროდ განიხილავს.
bfm.ge
ინტერნეტიზაცია
