გასულ წელს საქართველოს მთავრობამ მასშტაბური საპრივატიზაციო პროგრამა „100 საინვესტიციო შეთავაზება ბიზნესს” დაიწყო. ხელისუფლების წარმომადგენლები აცხადებდნენ, რომ ეს იყო პროექტი, რომელიც საქართველოს ეკონომიკას სჭირდებოდა. მთავრობის მეთაური ამბობდა, რომ  სწრაფი ეკონომიკური ზრდისთვის, საჭირო იყო სახელმწიფო საკუთრებაში არსებული აქტივების ეკონომიკურ ბრუნვაში ჩართვა. ითქვა ისიც, რომ პროექტის ფარგლებში წარმოდგენილი იყო ქვეყნის მასშტაბით არსებული, საინვესტიციოდ მიმზიდველი უძრავი ქონების ნუსხა, თუმცა ეკონომიკის ექსპერტები მიიჩნევდნენ, რომ მთავრობამ რეალურად მნიშვნელოვან ობიექტები თავისთვის დაიტოვა.

ძალიან მალე პროგრამა „100 საინვესტიციო შეთავაზება ბიზნესს“ გაფართოვდა და მის ფარგლებში ახალი კომპონენტი სასარგებლო წიაღისეულის მოპოვების ლიცენზიების აუქციონი დაიწყო. როგორც შემდგომში ეკონომიკის მინისტრისგან გახდა ცნობილი აუქციონზე გამოტანილი 100 წიაღისეულის ობიექტიდან 60 წარმატებით გაიყიდა, შედეგად 60 სხვადასხვა საბადოზე, ინვესტორებმა მინიმუმ 20 მლნ ლარის ინვესტიციის ვალდებულება აიღეს.

ქონების მართვის სააგენტოდან გამოთხოვილი ინფორმაციის მიხედვით, პროგრამა „100 საინვესტიციო შეთავაზება ბიზნესს“ ფარგლებში ამ ეტაპზე 53 უძრავი ქონება გაყიდულია, რომელთა ჯამური საწყისი საპრივატიზებო ღირებულება 38 777 700 ლარს შეადგენდა, ხოლო პრივატიზებიდან მიღებულმა შემოსავალმა 51 764 700 ლარი შეადგინა. როგორც უწყებაში განმარტავენ, სააგენტო მუდმივად მუშაობს საინვესტიციო შეთავაზებების მიმართულებით და პროგრამის ფარგლებში შექმნილ ინტერაქტიულ რუკას პერიოდულად დაემატება კომერციულად საინტერესოო შეთავაზებები.

„კომერსანტი“ დაინტერესდა ქვეყანაში შექმნილი რთული ეკონომიკური მდგომარეობის დროს შეიძლება თუ არა იყოს ეკონომიკის სტიმულირების ერთ-ერთი მიმართულება იმ ობიექტების გასხვისება, რომელიც ახლა სახელმწიფოს კუთვნილებაშია.

საკითხზე ეკონომიკის დოქტორი ირაკლი მაკალათია საუბრობს. მისი თქმით, შექმნილი მდგომარეობიდან გამომდინარე, საინვესტიციო გარემო ახლა ძალიან დაბალ დონეზე, ინტერესი მცირე, ამიტომ ძალიან ძნელია ისეთი ობიექტების აუქციონზე გამოტანა, რომლითაც ინვესტორებს დაინტერესება იქნება შესაძლებელი. თუმცა, ეკონომიკის დოქტორი ამბობს იმასაც, რომ თუ ეკონომიკის სამინისტრო ისეთი მიმართულებებს აირჩევს, რომელზეც მეტი ინტერესი იქნება შენარჩუნებული, იგივე სასოფლო-სამეურნეო მიმართულებით, ინვესტორების დაინტერესება შესაძლებელია. ირაკლი მაკალათიას განცხადებით, საქართველოს მთავრობამ აუქციონზე ისეთი ობიექტები უნდა გამოიტანოს, რომლებსაც საინვესტიციო მიმზიდველობა ექნება. მისივე თქმით, რიყის დოქები,როდესაც არ უნდა გამოიტანონ აუქციონზე მაინც არ გაიყიდება.

„საქართველოს მთავრობამ არ გააჩერა წიაღის მოპოვება, რადგან  როგორც ჩანს მოთხოვნა ბაზარზე არსებობს.შესაბამისად,წიაღის მოპოვების კუთხით თუ გააგრძელებენ პროგრამას და ბიზნესს მეტ ობიექტს შესთავაზებენ,ცხადია ეს უკეთესი იქნება ეკონომიკისთვის . თუმცა,მთავარი პრობლემა აქ არის ის, რომ გამოაქვთ ისეთი ობიექტები,რომელიც საინვესტიციოდ დიდად მიმზიდველი არ არის. ქონება, რომელსაც ოქროს ფასი ადევს ისევ სახელმწიფო ბალანსზეა შენახული და დაკონსერვებული. ასეთი ობიექტები კრიზისამდეც უნდა შეეტანათ სიაში, თუმცა, ახლაც რომ შეიტანონ კარგი იქნება. რეალურად, რასაც ოქროს ფასი აქვს უნდა გამოიტანონ, ამით ბიუჯეტსაც შეავსებენ, ბიზნესს აქტივობასაც გაზრდიან და მიღებული შემოსავალი ანტიკრიზისულ პერიოდში შეეხიდებათ. რამდენად გაამართლებს არ ვიცი მაგრამ ცდა აუცილებელია.  პრობლემაა ასევე  ის, რომ წიაღის მიმართულებით რა ობიექტებიც გამოაქვთ აუქციონზე,რელურად გამოაქვთ ლიცენზიის პირობებით. ინვესტორისთვის ლიცენზიით ობიექტის აღება საინტერესო არ არის, რადგან მაინც დროებითი საკუთრებაა. “,- განმარტავს ირაკლი მაკალათია.

ბაჩო ადამია