COVID-19-ის პანდემიის გამო ქვეყანაში შექმნილი მძიმე ეკონომიკური მდგომარეობის საპასუხოდ საქართველოს მთავრობამ პარლამენტში „2020 წლის სახელმწიფო ბიუჯეტის შესახებ“ კანონის ცვლილების პროექტი წარადგინა. ანტიკრიზისული ბიუჯეტის მიხედვით, მთავრობა გეგმავს დამატებით აღებული საშინაო ვალიდან 600 მლნ ლარი კომერციული ბანკების სადეპოზიტო სერთიფიკატებში განათავსოს.
„თავისუფლებისა და დემოკრატიის ფონდის“ აღმასრულებელი დირექტორი ანა გოგოლაძე მიიჩნევს, რომ აღნიშნული გადაწყვეტილება, ფაქტობრივად, ბანკების სახელმწიფო ბიუჯეტიდან სუბსიდირებაა. მთავრობა ცალსახად ითავსებს ეროვნული ბანკის ფუნქციას - მიაწოდოს ბანკებს ლიკვიდობა. მისი განმარტებით, მაშინ როდესაც მთავრობის ვალი დაშვებულ ზღვარს უახლოვდება და ქვეყნის ფისკალური სისტემა გაცილებით მოწყვლადი ხდება მომავალში მოსალოდნელი ეკონომიკური შოკების წინააღდეგ, მთავრობამ არ უნდა დაასუბსიდიროს ბანკები და არ უნდა შეითავსოს ეროვნული ბანკის ფუნქცია, რაც ბანკებისთვის გრძელვადიანი ლიკვიდობის მიწოდებაში გამოიხატება.
„აქ საინტერესო არის ის, რომ ეკონომიკის სამინისტროს განმარტებით, რომელიც ჩვენ გამოვითხოვეთ, აღნიშნულია რომ დაახლოებით მილიარდნახევარი საბიუჯეტო დახმარებებისთვის შემოდის, დანარჩენი მილიარდნახევარი კი კერძო სექტორის დასახმარებლად, რომელიც ბიუჯეტში არ აისახება და კომერციული ბანკების და სხვა მსხვილი ბიზნესების დაფინანსება მოხდება, ეს ძალიან საინტერესო ფაქტია. თუ ეკონომიკის სამინისტროს განცხადებით, ეს თანხები კომერციული ბანკების დასახმარებლად ისედაც გამოყოფილია, რომ მათ ლიკვიდურობის პრობლემა არ შეემნათ, მაშინ რატომ დგება საჭიროება, რომ მთავრობამ ეროვნული ბანკის მოვალეობა შეითავსოს და კიდევ დამატებით 600 მლნ ლარი კომერციულ ბანკებზე გადაასესხოს. მთავრობა ცალსახად ითავსებს ეროვნული ბანკის ფუნქციას - მიაწოდოს ბანკებს ლიკვიდობა. თან აქ საინტერესოა თუ რამდენ პროცენტში ხდება ბანკებისთვის ამ თანხის მიცემა ან თვითონ მთავრობას რამდენ პროცენტად აქვს აღებული ეს 600 მლნ. ანუ პროცენტებში რა სხვაობას იღებენ. ძალიან საეჭვო გარიგებაა, რადგან არ გვაქვს ინფორმაცია ამ დეტალების შესახებ. ბანკების სუბსიდირებაზე უარის თქმით, მთავრობას 600 მლნ ლარით ნაკლები საშინაო ვალის აღება შეუძლია“, - განაცხადა ანა გოგოლაძემ.
აღსანიშნავია, რომ 2020 წელს საქართველოს მთავრობა 8 მლრდ ლარზე მეტ ვალს აიღებს, მაგრამ ამავე დროს ერთ მლრდ ლარის ადრე აღებულ ვალს დაფარავს. შედეგად, მთავრობის ვალი 7 მლრდ ლარით გაიზრდება, საიდანაც 1.8 მლრდ ლარი საშინაო ვალი, ხოლო 5.2 მლრდ საგარეო ვალი იქნება.
ნინო თამაზაშვილი