კორონავირუსის პირველი შემთხვევის დადასტურებიდან ერთი თვეზე მეტი გავიდა. ქვეყანაში უმკაცრესი ზომებია მიღებული, საქართველოს ეკონომიკა კი დიდი და მნიშვნელოვანი პრობლემის წინაშე დგას. მიუხედავად იმისა, რომ საქართველოს მთავრობა ცდილობს ეკონომიკური აქტივობები ბოლომდე არ შეზღუდოს, ბიზნესის დიდი ნაწილი გაჩერებულია და ელოდება როდის წარადგენს გიორგი გახარიას გუნდი დოკუმენტს, რომელიც ეკონომიკურ შოკს შეუმსუბუქებს.
ეკონომიკური საქმიანობა შეაჩერა და საქართველოს მთავრობის გადაწყვეტილებას ყოველდღე ელოდება ბიზნესმენი ბეჟან წაქაძე. დეველოპერული კომპანია „ჯი დი ჯი ჯგუფის“ დამფუძნებელი გვიყვება, რომ 4 აქტიური მშენებლობა ჰქონდა, რომელთა კონსერვაცია ბიზნესმენმა რამდენიმე დღის წინ დაიწყო.
„არ ვიცი რა იქნება, ყოველდღე ველოდები რას იტყვის საქართველოს მთავრობა. მეც დავიწყე ანტიკრიზისული გეგმის შემუშავება ჩემს კომპანიებში, რათა რაღაცები დავალაგო, მაგრამ გეტყვით რომ იოლი საქმე არ არის, მით უმეტეს რთულია ჩვენისთანა ქვეყნისთვის შეიმუშავო ისეთი დოკუმენტი, რომელიც უდიდეს ზიანს მინიმუმამდე შეამცირებს. მთავარია ხარისხიანი ანტიკრიზისული გეგმა შემუშავდეს, ყველაფერი იყოს გათვალისწინებული და გააზრებული. თუმცა, მგონია, რომ ანტიკრიზისული გეგმა უახლოეს დღეებში მზად იქნება“, - ამბობს ბეჟან წაქაძე.
ბიზნესმენი აცხადებს, რომ შემოსავლების სამსახურიდან დაუკავშირდნენ და ტურისტულ სექტორს ქონების გადასახადის გადავადება შესთავაზეს, მაგრამ სასტუმროების გარდა როგორც თვითონ აცხადებს საკუთრებაში კიდევ ორი კლინიკა აქვს, რომელთა შემთხვევაშიც ქონების გადასახადს იხდის.
„ორი თვეა სარეაბილიტაციო ცენტრი დავხურეთ, თუმცა,მეორე კლინიკაში,რომელიც მარიჯანზე მდებარეობს, ამ დრომდე ღიაა, იქედან გამომდინარე, რომ შეიძლება ქვეყანას დასჭირდეს. ადგილზე რჩებიან მორიგე ექიმებიც, თუმცა პაციენტებს არ იღებენ. კლინიკები იჯარით მაქვს გაცემული და დავით ტატიშვილის კლინიკა მართავს, თუმცა ამ დროისთვის იჯარის გადასახადი გავუჩერე, რადგან ვერ მუშაობს ადამიანი და როგორ უნდა გადამიხადოს? ჩემი კომპანიების შემთხვევაში ხელფასებს ამ თვეში ჩვეულებრივად გავცემ, მიუხედავად იმისა, რომ პერსონალი 20 დღეა არ მუშაობს. ვაპირებ ხელფასები მომდევნო თვეშიც გადავუხადო, რამდენი ხანსაც შევძლებ გადავიხდი, არ მინდა რომ გავათავისუფლო, რადგან კარგი თანამშრომლების შეკრება ძალიან რთულია“- აცხადებს ბეჟან წაქაძე.
ბიზნესმენი მიიჩნევს, რომ შეღავათი ისეთ კომპანიებზე უნდა გავრცელდეს, რომლებიც ხელფასებს გასცემენ. ბეჟან წაქაძის თქმით, საქართველოს მთავრობის მხრიდან სწორედ ეს იქნება ბიზნესის სტიმულირება. „ჯი დი ჯი ჯგუფის“ დამფუძნებელი შეღავათებს საგადასახადო და ბანკების კუთხით ელოდება.
„შეღავათი იყო დღგ-ს გადასახადის დაბრუნება ვნახოთ რა იქნება. ჩემი აზრით, საშემოსავლო გადასახადი უნდა გადაუვადონ იმ კომპანიებს, რომლებიც ხელფასებს გასცემენ. მოგების, საშემოსავლოს თუ დააბრუნებენ ძალიან ბევრი კომპანია და მათ შორის მეც მოგების გადასახადს არ ვიხდით. მას შემდეგ რაც ესტონური მოდელი ამოქმედდა, მოგების რეინვესტიციას ვაკეთებ და ბიზნესი განვითარებას ვცდილობ“, - განაცხადა ბეჟან წაქაძემ.
ბაჩო ადამია