მედიაჰოლდინგ „კომერსანტის“ მმართველი პარტნიორი გიორგი აბაშიშვილი რადიო „კომერსანტზე“ თავის რუბრიკაში – „ბიზნეს ინსაიდერის ბრიფინგი“ მსოფლიო ეკონომიკის მნიშვნელოვან ამბებს მოგვითხრობს.

ენერგეტიკული უსაფრთხოება

Business Insider: ევროკავშირი რუსულ ნავთობზე ემბარგოს დაწესებას გეგმავს, მაგრამ პუტინის მოკავშირე უნგრეთი უკან იხევს.

FT: გერმანია აცხადებს, რომ ევროკავშირის მომხმარებლები უნდა მოემზადონ დიდი ეკონომიკური დარტყმისა და ენერგომატარებლებზე მაღალი ფასებისთვის, რადგან ბერლინმა განაცხადა, რომ მზადაა მხარი დაუჭიროს რუსული ნავთობის ემბარგოს, რათა მოსკოვი დაისაჯოს უკრაინასთან ომის გამო. „ევროპა მზად უნდა იყოს, გაუძლოს რუსული ნედლი ნავთობის გამოყენების შემცირების შემდგომ მოვლენებს“, - თქვა რობერტ ჰაბეკმა, გერმანიის ეკონომიკის მინისტრმა და ვიცეკანცლერმა. მან ასევე აღნიშნა, რომ ეს ნაბიჯი სათანადოდ უნდა იყოს მომზადებული და უნდა გათვალისწინებულ იქნას ევროკავშირის ზოგიერთი ქვეყნის მაღალი დამოკიდებულება რუსეთის მიწოდებაზე. ”ჩვენ საკუთარ თავს ზიანს მივაყენებთ, ეს ცხადია”, - თქვა მან ევროკავშირის ენერგეტიკის მინისტრების საგანგებო შეხვედრის წინ, რომელზეც რუსულ ნავთობზე ემბარგოს დაწესების საკითხს განიხილავენ.

CNN Night Cup: გერმანიის შანტაჟი არ შეიძლება... ჩვენ არ ვიცვლებით, რადგან პუტინს რუბლი სჭირდება ომისთვის.

გერმანიის ფინანსთა მინისტრმა კრისტიან ლინდნერმა ორშაბათს განუცხადა CNN-ს, რომ გერმანია მხარს დაუჭერს ევროპაში რუსული ნავთობის აკრძალვას და რომ ქვეყანა არ დაუშვებს რუსეთის პრეზიდენტის ვლადიმირ პუტინის ულტიმატუმს ენერგიის საფასურის რუბლებში გადახდის შესახებ.

Bloomberg: იტალიამ დაამტკიცა 14 მილიარდი ევროს (15 მილიარდი დოლარი) დახმარების პაკეტი, რომელიც ფოკუსირებულია ენერგეტიკაზე. პრემიერ-მინისტრმა მარიო დრაგიმ განაცხადა, რომ ქვეყანა მზად არის შეამსუბუქოს დამოკიდებულება რუსულ გაზზე.

Bloomberg: ევროკავშირი დათანხმდა უფრო დეტალური მითითებების გაცემას იმის შესახებ, თუ რისი გაკეთება შეუძლიათ კომპანიებს და რისი არ შეუძლიათ სანქციებისა და ახალი წესების პირობებში, ვლადიმირ პუტინის მოთხოვნებთან დაკავშირებით. საჭიროება წარმოიქმნა მას შემდგომ, რაც ცალკეულმა კომპანიებმა გააკეთეს განცხადებები რუბლში გადახდებთან დაკავშირებით.

ატლანტიკური საბჭოს ანალიზი: უკვე არსებული რესურსები გარკვეულწილად დაეხმარება ევროკავშირს რუსულ გაზზე დამოკიდებულებისგან თავის დაღწევაში. თუმცა, მიუხედავად იმისა, რომ ჩვენ ვხედავთ გარკვეულ მნიშვნელოვან პროგრესს მიმდინარე წელს, 2023 და 2024 უფრო სავარაუდოა, რომ კონსოლიდაციის წლები იქნება.

Businessweek: უკრაინის წინააღმდეგ რუსეთის შეიარაღებული აგრესიის ფონზე ნახშირზე მოთხოვნა იზრდება. მზარდი ფასები ცუდი ინფორმაციაა მომხმარებლებისა და კლიმატისთვის.

ომის მიმდინარე შედეგები

FT: ქარის ტურბინების მსოფლიოში უმსხვილესმა მწარმოებელმა დაადასტურა უკრაინაში რუსეთის ომის ნეგატიური გავლენა ინდუსტრიაზე, რადგან მან დააფიქსირა მოსალოდნელზე მეტი ზარალი და შეამცირა მოგება, მიუხედავად ზოგადად მზარდი მოთხოვნისა. Vestas-მა, ტურბინების დანიურმა მწარმოებელმა, ორშაბათს განაცხადა, რომ შემოსავალი პირველ კვარტალში 27 პროცენტით გაიზარდა 2,5 მილიარდი ევრომდე, მაგრამ ის ასევე სოლიდურ საოპერაციო ზარალს განიცდიდა. ქარის ტურბინების მწარმოებლები მაინც ბევრს იბრძვიან მეტი შემოსავლის გენერირებისათვის, მიუხედავად იმისა, რომ მოთხოვნა იზრდება, რადგან დასავლური ქვეყნები ცდილობენ უარი თქვან რუსეთის ნავთობსა და გაზზე.

გეორგიევა ტვიტერზე: ომი უკრაინაში არის სერიოზული უკანდახევა ევროპის COVID19-ისგან არასრული გამოჯანმრთელების გზაზე. რეგიონს სჭირდება ლტოლვილების მხარდაჭერა, უკრაინას ჭირდება აღდგენა, ევროპა უნდა გაუმკლავდეს ენერგიის მაღალ ფასებს და გააძლიეროს ენერგოუსაფრთხოება და ამასთან, განაგრძოს ეკონომიკური ზრდა.

Business Insider: რუსმა ჯარისკაცებმა John Deere-ის დილერს 5 მილიონი დოლარის ღირებულების სასოფლო–სამეურნეო ტექნიკა მოპარეს, თუმცა კომპანიამ დისტანციურად უზრუნველყო ტექნიკის გათიშვა.

ევროკავშირი და ინდოეთი

FT: გერმანიის კანცლერმა ოლაფ შოლცმა, მიიწვია ინდოეთის პრემიერ მინისტრი ნარენდრა მოდი, როგორც სპეციალური სტუმარი G7-ის ლიდერების სამიტზე, რომელიც მომავალ თვეში გაიმართება. ევროპა ცდილობს, ნიუ დელი დააშოროს რუსეთთან დიდი ხნის ალიანსს. ჯერჯერობით, მოდის არ სურდა მოსკოვის წინააღმდეგ გამოსულიყო. ინდოეთის პრემიერი განაგრძობს ევროპაში ვიზიტს – დღეს დანიას ეწვევა და სამიტში მიიღებს მონაწილეობას.

ატლანტიკური საბჭო: ევროკავშირსა და ინდოეთს უზარმაზარ შესაძლებლობები აქვს, რათა მნიშვნელოვნად განაახლონ თავიანთი ურთიერთობების პროფილი, განსაკუთრებით იმ შემთხვევაში, თუ ამით ნიუ დელის რუსეთისა და ჩინეთის ეკონომიკებისაგან დისტანცირება დაჩქარდება.

აშშ

FT: ორშაბათს აშშ-ის 10-წლიანი სახაზინო ობლიგაციების საპროცენტო განაკვეთმა 3 პროცენტი შეადგინა – პირველად სამ წელზე მეტი ხნის განმავლობაში. სამთავრობო ობლიგაციებზე სარგებელი მნიშვნელოვან გავლენას ახდენს ეკონომიკაზე, იპოთეკის განაკვეთებზე და კომპანიების სესხის ხარჯებზე.

Bloomberg: ბაიდენის ადმინისტრაცია 3 მილიარდ აშშ დოლარს დახარჯავს ელექტრომობილებისა და ენერგიის დამზოგველი მოწინავე ტექნოლოგიების ბატარეების შიდა წარმოების მხარდასაჭერად.