2016 წლიდან 2020 წლის ნოემბრამდე სახელმწიფომ სულ 13.695 მლრდ ლარის ტენდერი გამოაცხადა, რომლის 33%-იც გამარტივებული წესით ჩატარდა. ინფორმაციას „საერთაშორისო გამჭვირვალობა საქართველოს“ კვლევაზე დაყრდნობით ანალიტიკური პორტალი bihub.ge ავრცელებს.

ყველაზე დიდი შემსყიდველი 1.76 მლრდ ლარით საავტომობილო გზების დეპარტამენტი აღმოჩნდა. 649 მლნ-ით მეორე ადგილზე თბილისის მერიაა, სამეულს კი 400 მლნ ლარით საქართველოს მუნიციპალური განვითარების ფონდი ასრულებს. დანარჩენ შემსყიდველებშიც ინფრასტრუქტურულ მიმართულება ლიდერის პოზიცია უკავია: გარდაბნის თბოსადგური: 390 მლნ ლარი, საგანმანათლებლო და სამენციერო ინფრასტრუქტურის განვითარების სააგენტო - 356 მლნ ლარი, საქართველოს რკინიგზა - 251 მლნ, თბილისის განვითარების ფონდი - 240 მლნ, თბილისის სატრანსპორტო კომპანია - 215 მლნ, საქართველოს გაზის ტრანსპორტირების კომპანია - 181 მლნ.

ტენდერებში გამარჯვებულებს შორის უმრავლესობა უცხოური კომპანია ან უცხოური კომპანიის წარმომადგენლობაა. პირველ ადგილზე 372 მლნ ლარით ჩინური ტიანძინის საინჟინრო კორპორაციაა, მეორეზე 239 მლნ ლარით ელიზაროვ ვლადიმირი, მესამეზე 222 მლნ ლარით რომპეტროლი. ათეულსი ასევე მოხვდნენ: ჯეო გრუპი - 217 მლნ ლარი, ნიუ როად - 192 მლნ, იუჯითი - 177 მლნ, ანაგი - 176 მლნ, საბა კოსტრქშენი - 174 მლნ და ენსისი - 170 მლნ.

უშუალოდ საავტომობილო გზების დეპარტამენტის მიერ გამოცხადებულ ტენდერებში ბოლო 5 წელიწადში 175 მლნ ლარის შესყიდვა შპს ნიუ როადს-ს აქვს მოგებული. 114 მლნ ლარით მეორე ადგილზე ჯეო გრუპია, მესამეზე 64 მლნ ლარით - არალი. ჯამში 60 მლნ ლარზე მეტის ტენდერი მოგებული აქვტ ასევე ჯავახავტოგზასა და სახელმწიფო სამშენებლო კომპანიას, 50 მლნ ლარზე მეტი: ინსტიტუ იგჰ-ს, ცეკურს, მამისონს, იბოლიას და ენსისის. 40 მლნ ლარზე მეტი: შპს ფერსა და სგზაო სამშენებლო კომპანია სერპანტინს.

13.7 მლრდ ლარიდან 10 მილიარდზე მეტი მთლიან ან ნაწილობრივ სამშენებლო სამუშაოებზე და სამოქალაქო მშენებლობებზე დაიხარჯა, 1 მილიარდ ლარამდე შენობების დასრულების სამუშაოებზე, 640 მლნ ლარი საინჟინრო მომსახურებაზე. 

ტენდერებით დაგროვილმა თანხამ 2016 წლიდან დღემდე 1.5 მლრდ ლარს გადააჭარბა, გადახარჯვამ კი 62 მლნ ლარი შეადგინა.

გიორგი ელიზბარაშვილი