მსუბუქი ავტომობილების რეექსპორტი 35.1%-ით $133 მლნ-დან $97 მლნ-მდე შემცირდა. როგორც პროცენტულად, ასევე რიცხობრივად ეს ყველაზე დიდი ვარდნაა. თუ არ ჩავთვლით მომსახურების ექსპორტს, გასულ წელსაც ყველაზე დიდი $330 მლნ-იანი დანაკარგი აღნიშნულმა ინდუსტრიამ განიცადა.
რეგიონში ეკონომიკური მდგომარეობის გაუარესების შედეგად 2020 წელს ავტომობილებზე მოთხოვნა მკვეთრად შემცირდა, პროცესი დღემდე გრძელდება. პრობლემები ქართველ ავტოიმპორტიორებსაც ექმნებათ, რომლებიც მოგებაზე ვეღარ გადიან და პერიოდულად სახელმწიფოსგან განბაჟების ვადის გადაწევას ითხოვენ, რადგან განბაჟების საფასურის გადახდის შემდეგ მის საზღვარგარეთ გაყიდვას ეკონომიკურად აზრი ეკარგება. 2020 წლის 1-ელ მაისამდე შემოყვანილი ავტომობილების განბაჟების ვადა მიმდინარე წლის 31 მაისს იწურება.
მსუბუქი ავტომობილების რეექსპორტი, როგორც ბიზნესი 2005 წლიდან ამოქმედდა, როდესაც 1 წელიწადში ბაზარი 373%-ით $18 მლნ-მდე გაიზარდა. მან $100 მლნ-ს პირველად 2008 წელს გადააჭარბა, 2013 წელს კი $704 მლნ-ს მიაღწია. აზერბაიჯანის მიერ 2006 წლამდე გამოშვებული ავტომობილების იმპორტის აკრძალვამ, რასაც ნავთობზე ფასების ვარდნის შედეგად ამ ქვეყანაში გამოწვეული ეკონომიკური პრობლემებიც დაერთო მოთხოვნა საქართველოდან შეტანილ ავტომობილებზე მკვეთრად შემცირდა. პარალელურად სომხეთი ევრაზიულ კავშირში გაწევრიანდა, რამაც არარუსული ავტომობილები გააძვირა, შედეგად 2015-2016 წლებში ბრუნვა 4-ჯერ $171 მლნ-მდე შემცირდა. ბაზარი 2017 წლიდან გამოცოცხლდა, 2019 წელს ავტომობილების რეექსპორტმა $733 მლნ-ს მიაღწია, 2020-ში კი $404 მლნ-მდე შემცირდა.