$1,4 ტრილიონიანი ბრუნვით მსოფლიოში უმსხვილესი ნორვეგიის ეროვნული კეთილდღეობის ფონდის (NBIM) შემოსავალმა წლის პირველ ნახევარში 990 მლრდ კრონა, ანუ $111,9 მლრდ შეადგინა. გასულ წელს ამ ფონდმა თავისი აქტივების 3,4% – $21 მლრდ დაკარგა, რაც, ძირითადად, პანდემიის ფონზე განვითარებული კრიზისის გამო ფონდის აქციების ფასის ვარდნამ განაპირობა.
30 ივნისის მდგომარეობით, ფონდის აქტივების ფასმა 11,6 ტრლნ კრონა შეადგინა. აქედან 72,4% ინვესტირებული იყო აქციებში, 25,1% – ობლიგაციებში, 2,4% – უძრავ ქონებაში და 0,1% – კომპანიებში, რომლებიც ენერგიის განახლებადი წყაროების ინდუსტრიაში მუშაობენ.
ფონდის პორტფელში აქციების ფასი 14%–ით გაიზარდა. NBIM მსოფლიოს 69 ქვეყნიდან 9 000–ზე მეტი კომპანიის აქციებს ფლობს, რაც ბირჟებზე კოტირებადი აქციების ჯამური მოცულობის 1,5%–ს შეადგენს. „პირველი 6 თვის განმავლობაში აქციებში დაბანდებამ განსაკუთრებული დადებითი წვლილი შეიტანა შემოსავლის ზრდაში, განსაკუთრებით ენერგეტიკისა და საფინანსო სექტორებში დაბანდებამ. ენერგოკომპანიებში ინვესტირებამ ფონდს 19,5% მოუტანა“, – განაცხადა Norges Bank Investment Management-ის გენერალურმა დირექტორმა ნიკოლაი ტანგენმა.
ფონდის ტექნოლოგიური აქტივების ფასი ექვს თვეში 16,8%–ით არის გაზრდილი. ფონდის პორტფელში IT-კომპანიებს შორის ამერიკული ტექნოლოგიური გიგანტები დომინირებენ – Apple, Microsoft, Alphabet და Amazon.
ენერგიის განახლებადი წარმოების ინდუსტრიაში დაბანდებული ობლიგაციები საშუალოდ 2%–ით გაიაფდა, ხოლო უძრავ ქონებაში დაბანდებები 6 თვეში 4,6%–ით გაიზარდა.
ფონდი 1990 წელს შეიქმნა ნორვეგიის ნავთობისა და გაზის გაყიდვებიდან შემოსული თანხების ინვესტირების მიზნით. 2020 წლის ბოლოსთვის მან თავისი ყველა ის აქტივი გაყიდა, რომლებიც ნავთობის ძიება–მოპოვებასთან იყო დაკავშირებული. Bloomberg-ს ფონდის ხელმძღვანელის მოადგილემ ტრონდ გრანდემ უთხრა, რომ სანავთობო პორტფელის ღირებულება 2019 წელს დაახლოებით $6 მლრდ–ს შეადგენდა.
მიმდინარე წელს ფონდმა პირველად განახორციელა ინვესტიცია ენერგიის განახლებადი წყაროების სექტორში. ნორვეგიის პარლამენტმა ფონდს ამის უფლება ჯერ კიდევ 2019 წელს მისცა. ამის შემდეგ ფონდმა მიმზიდველი ობიექტების მოძიება და შესწავლა დაიწყო. ნორვეგიის სუვერენულმა ფონდმა აპრილში 1,4 მლრდ ევროდ შეიძინა Borssele-ს ქარის ელექტროსადგურის წილის 50%. ეს მსოფლიოში სიდიდით მეორე საზღვაო ქარის ელექტროსადგურია 752 მ/ვტ დადგმული სიმძლავრით.
rbc
პენსია
