მსოფლიოში კორონავირუსის ეპიდემიის ზრდასთან ერთად იზრდება კრიზისი საფინანსო ბაზრებზე.ხუთშაბათს უოლ სტრიტმა უზარმაზარი დანაკარგი განიცადა. Dow Jones-ი 1200 პუნქტით, ანუ 4,4%-ით დაეცა, რაც ამ საფინანსო ინდექსის არსებობის ისტორიაში ყველაზე დიდი ვარდნაა ერთი დღის განმავლობაში. S&P 500 დაეცა 4,4%-ით, Nasdaq-ი კი - 4.6%-ით.

მანამდე სერიოზული ვარდნა შეინიშნებოდა ევროპისა და აზიის საფინანსო ბაზრებზე.

ბოლო რამდენიმე დღის განმავლობაში საფინანსო ინდექსები 10%-ზე მეტით დაეცა მათ უკანასკნელ უმაღლეს მაჩვენებელთან შედარებით.მსოფლიო მასშტაბით საფინანსო ბაზრებმა კრიზისის განმავლობაში ექვს დღეში 3,6 ტრილიონი დოლარის დანაკარგი განიცადა.

სპეციალისტები გამოთქვამენ შიშს, რომ კორონავირუსის გავრცელებით მიყენებულმა ზარალმა შეიძლება 2008 წლის საფინანსო კრიზისის მასშტაბები მიიღოს.

ჩინეთში, საიდანაც დაიწყო კორონავირუსის გავრცელება, დაავადების გავრცელების ტემპმა იკლო. დღეისთვის ჩინეთში რეგისტრირებულია 78 ათასზე მეტი შემთხვევა, გარდაიცვალა 2800 ადამიანი.

დღეისთვის კორონავირუსი ჩინეთის გარდა მსოფლიოს 55 ქვეყანაშია დაფიქსირებული, აღრიცხულია დაავადების 4200 შემთხვევა, გარდაიცვალა 70 ადამიანი.

რადიო „თავისუფლება“