„ჩვენ ყველამ ერთად უნდა ვიმუშაოთ პრობლემების გამოსასწორებლად, რადგან მსოფლიოში ბევრი ადგილია, სადაც ინვესტორები ინვესტიციას ჩადებენ.“ - ასე გამოეხმაურა ჟურნალისტებთან საუბრისას აშშ-ს სავაჭრო პალატის თავმჯდომარე მაიკლ ქაუგილი ამერიკელი კონგრესმენების მიერ გიორგი გახარიასთვის გამოგზავნილი წერილის შინაარსს.
ოთხი ამერიკელი კონგრესმენის მიერ წერილში გამოხატური შეშფოთება „დაპირებულ დემოკრატიულ რეფორმებზე უარისა და ანაკლიის ღრმაწყლოვანი პორტის პროექტის პოლარიზაციის გამო“ აშშ-ს სავაჭრო პალატის თავმჯდომარის აზრით საყურადღებოა. ქაუგილი აღნიშნავს, რომ ანაკლიის პროექტის მნიშვნელობა დიდია, ამასთანავე ქვეყნისთვის აუცილებელია დღის წესრიგში იდგეს კანონის უზენაესობა, რათა არსებული შეშფოთებები საქართველოს საინვესტიციო გარემოს მიმართ აღარ არსებობდეს.
„ანაკლიის საკითხზე არ ვისაუბრებ, თუმცა როგორც კონგრესმენებისთვის ასევე ჩემთვისაც ეს საკითხი მნიშვნელოვანია. ინფორმირებული ვარ კონგრესმენების წერილის შესახებაც. ფაქტია, რომ არ არსებობდეს გარკვეული შეშფოთებები, მაშინ ინვესტორთა საბჭოს არსებობა საჭირო არ იქნებოდა. რა თქმა უნდა, დღის წესრიგში დგას კანონის უზენაესობა და ის ვითარება, რაც პარლამენტშია. ვიმედოვნებ, რომ ოპოზიციას, მმართველ გუნდსა და არასამთავრობო ორგანიზაციებს შორის კონსენსუსი შედგება.“ - ამბობს მაიკლ ქაუგილი.
ამერიკელების წერილს გამოეხმაურა საქართველო-ევროპის ბიზნეს საბჭოს გენერალური მდივანი ზვიად ჭუმბურიძეც, რომელმაც აღნიშნა, რომ აუცილებელია სათანადოდ იქნას აღქმული სტრატეგიული პარტნიორის გზავნილი, რაც ქვეყნის განვითარების საწყისი წერტილი შეიძლება გახდეს.
„ხელისუფლებას და არამარტო მათ, მოსმენის კულტურა უნდა გვქონდეს. თუ გვინდა, რომ ეს ქვეყანა განვითარდეს, ჩვენს სტრატეგიულ პარტნიორებს, ამერიკელებს, ევროკავშირსა და ევროპელებს უნდა მოვუსმინოთ, გავიზიაროთ მათი წინადადებები და შესაბამისად, უნდა მივყვეთ იმ რეგულაციებსა და სამოქმედო გეგმებს, რომელიც ქვეყანას ამ ვითარებიდან გამოიყვანს.“ - აღნიშნა ზვიად ჭუმბურიძემ.
ეკონომიკისა და მდგრადი განვითარების მინისტრის მოადგილემ კი დღეს ჟურნალისტებტან განაცხადა, რომ ყველაფერი გაკეთდება იმისათვის, რომ ანაკლიის პროექტი ახალ პარტნიორებთან ერთად შედგეს.
მარიამ მორგოშია