„ჩვენი ეკონომიკის პირობებში ბევრი რამის სუბსიდირება შეიძლება ვერ მოვახერხოთ ტურისტების წასახალისებლად, თუმცა დარწმუნებული ვარ, რომ შეიძლება ისეთი გამოსავლის მონახვა, რათა საქართველო იყოს ერთ-ერთი პირველი ტურისტული მიმართულება. მნიშვნელოვანია ამისათვის კერძო სექტორთან აქტიური კომუნიკაცია.“ - ამის შესახებ „კომერსანტთან“ ტურიზმის დეპარტამენტის ყოფილმა უფროსმა მაია სიდამონიძემ განაცხადა.

ევროპის ქვეყნების უმეტესობა COVID-19-ით ყველაზე მეტად დაზარალებული ტურიზმის  სტიმულირების გეგმაზე უკვე მუშაობს.  ქვეყნები საჰაერო მიმოსვლის გახსნასა და სანიტარული კორიდორების შემუშავებას იწყებენ. საბერძნეთმა ევროკავშირთან ერთად მიმოსვლის ახალი წესები შეიმუშავა, სიცილიის მთავრობა ტურისტების მოსაზიდად ვიზიტორების ხარჯების ნაწილს დაფარავს.

როგორ უნდა დაუბრუნდეს ქართული ტურიზმი პირვანდელ ნიშნულს და რას უნდა ითვალისწინებდეს დარგის სტიმულირების პაკეტი? მაია სიდამონიძე მიიჩნევს, რომ მიმდინარე საკარანტინო რეჟიმის პირობებშიც კი აუცილებელია სხვა ქვეყნების მაგალითები საქართველოს მთავრობის მიერაც დროულად იყოს გათვალისწინებული და ჩვენი ქვეყანა ძალიან სწრაფად ჩაერთოს გეგმის შემუშავების პროცესებში, რომელშიც ტურიზმის ყველა ქვედარგი ჩაერთვება და არა მხოლოდ სასტუმროები.

„უკვე უნდა დავიწყოთ  მზადება, თუ როგორ გამოვალთ ამ კრიზისიდან.  უნდა გვქონდეს კონკრეტული გეგმა. რა თქმა უნდა, ვირუსი არ დამარცხებულა, მაგრამ ჩვენ უნდა ვიცოდეთ ამ სიტუაციაში როგორ ვიცხოვროთ.ბევრი ქვეყნის მიერ უკვე ხდება სანიტარული კორიდორების და ახალი წესების გაცნობა. უნდა ვიცოდეთ უსაფრთხოების კუთხით რა სანიტარული ნორმები დაწესდება, რომ მზად ვიყოთ ტექნიკურად და ადამიანების დატრენინგებაც შევძლოთ.

ასევე მნიშვნელოვანია, რომელ ბაზრებზე გავაკეთებთ აქცენტს. სავარაუდოდ, თავდაპირველი სამიზნე დაბალრისკიანი ქვეყნები იქნება, შიდა ტურიზმით დაიწყება, მერე მეზობელი ქვეყნებით გაგრძელდება. ხორვატია ზაფხულში საჰაერო მიომოსვლას ხსნის, ამისთვის კი მნიშვნელოვანია სხვა ქვეყნებთან აქტიური მოლაპარაკება. გერმანიამ ევროპას მოუწოდა, რომ ერთად დაგეგმონ ტურისტული მიმოსვლის განახლება. ფაქტობრივად, ჩვენ ამ პროცესში უკვე უნდა ვიყოთ და მალევე გამოვიღვიძოთ.ტურიზმის ინდუსტრია იმდენად კომპლექსური და მრავლისმომცველია, რომ  აბსოლუტურად ყველა მოთამაშის ინტერესები უნდა იყოს გათვალისწინებული - ისინი ვინც სესხის პირობებში ბინებს აქირავებდნენ ტურისტული ბიზნესისთვის, გიდები რომლებიც შეიძლება მცირე მეწარმეები არიან მაგრამ შემოსავალი  ჰქონდათ, მძღოლები ტურისტული სააგენტოები, შემომყვანი ტურ-ოპერატორები - ჩვენ არ  უნდა ვილაპარაკოთ მხოლოდ ერთი სექტორის ჭრილში.“- განმარტავს სიდამონიძე.

რა ელოდება ტურიზმის სექტორს მომავალი ერთი წლის განმავლობაში?  ტურიზმის სპეციალისტის მოლოდინი ამასთან დაკავშირებით, მცირე მოთხოვნის გამო ბევრი კომპანიის გაკოტრება და ტურიზმის ბაზრიდან გასვლაა.

„ვირუსის დამარცხების შემდეგ მინიმუმ ერთ წელი ჩვენ ნამდვილად ვერ აღვდგებით. ბევრი კომპანია გაკოტრდება და ეს რეალური სურათია. მაგრამ ჩვენ უნდა ვიცოდეთ სად ვართ დღეს და სად გვინდა ვიყოთ, ამისათვის  დღესვე დავიწყოთ მოქმედება. ამ სფეროში ბევრს მოგვიწევს ბიზნეს მოდელის შეცვლა.  მაქვს მოლოდინი, რომ  ბევრი კომპანია შეიძლება გამოეთიშოს ინდუსტრიას, რადგან ერთი წელი შემოსავლებზე საუბარი ზედმეტია.  დაფიქსირდება ზედმეტი მიწოდება და ნაკლები მოთხოვნა, რაც განაპირობებს იმას, რომ ბევრი ბიზნესი თამაშგარეთ რჩება.ჩვენ გვაქვს ბევრი საერთაშორისო მაგალითი და შეგვძლია იგივე ტიპის ინიციატივები გვქონდეს. ერთერთი მნიშვნელოვანი წინაპირობა საჰაერო მიმოსვლის აღდგენაა და სწორედ ამ აღდგენის სტრატეგია დროულად უნდა იყოს შემუშავებული.“ - განმარტავს სიდამონიძე

რამდენიმე დღის წინ, ეკონომიკის მინისტრმა ნათია თურნავამ განაცხადა, რომ ტურიზმი, მისი კრიტიკული მდგომარეობიდან გამომდინარე დახმარების ცალკე პაკეტს საჭიროებს, რომელიც უახლოეს მომავალში იქნება წარდგენილი.

„ჩვენ ტურიზმისთვის ცალკე დახმარების პაკეტს ვამზადებთ, ცალკე ღონისძიებებს, ეს ნაწილობრივ იქნება პოსტკრიზისული გეგმის შემადგენელი ნაწილი და ამაზე ძალიან მალე ვისაუბრებთ“, – განაცხადა ნათია თურნავამ.

მარიამ მორგოშია