წარმოიდგინეთ, მრავალსართულიანი ოფისები, საცხოვრებელი სახლები, სადაც აივნები დაფარულია ფოთლოვანი ხეებით, სურნელოვანი ბალახებითა და ბუნებრივი ბუჩქებით, რომლის ტოტებიც დღითიდღე იზრდება და მის გარშემო ყველაფერი სუფთა ჰაერით გაჟღენთილია. ეს ალბათ წარმოუდგენლად ჟღერს, თუმცა არქიტექტორმა სტეფანო ბოიერიმ ეს რეალობად აქცია და მსგავსი ვერტიკალური ტყეების ნახვა უკვე არაერთ ქალაქშია შესაძლებელი, მათ შორის, პარიზში, მილანში, შანხაიში, აინდჰოვენში, ტირანაში.
,,ვერტიკალური ტყეები იტალიელი არქიტექტორის, სტეფანო ბოიერის და მასთან ერთად სხვა არქიტექტორების მიერ არის დაპროექტებული და დედაქალაქებში ტყის მასივების აღდგენას ემსახურება. ეს არის მისი ყველაზე ეფექტიანი გზა კლიმატურ ცვლილებებთან საბრძოლველად ურბანულ პირობებში. მისი დახმარებით, ბუნების რეგენერაცია და ურბანული ბიომრავალფეროვნების მიღწევა ქალაქის ტერიტორიის ვრცელ ფართობზე განაშენიანების გარეშე ხდება. მწვანე ცათამბჯენები ხელს უწყობს ჟანგბადის წარმოქმნას, მტვრის ნაწილაკებისა და CO2-ის შესრუტვას, ზრდის ბიომრავალფეროვნებას. ეკოლოგიური არქიტექტურის მიზანი შენობების გარემოზე უარყოფითი ზეგავლენის მინიმუმამდე დაყვანაა.
ცნობისთვის, ევროპის რეკონსტრუქციისა და განვითარების ბანკი (EBRD) მწვანე ქალაქებისთვის დაფინანსებას ზრდის. თანხის მოცულობა დაგეგმილი 1 მლრდ ევროდან 2023 წლის ბოლოსთვის 1.9 მლრდ ევრომდე გაიზრდება. EBRD-ის მწვანე ქალაქების კომპაქტში 49 ქალაქი მოიზარება, მათ შორის თბილისიც, რომელიც კომპაქტს 2016 წელს შეუერთდა. კომპაქტის მიზანია დაეხმაროს ქალაქებს ურბანული გამოწვევების მიგნებასა და მათთან გამკლავებაში. ინვესტიციები მოიცავს შენობებში ენერგოეფექტურობის გაუმჯობესებას, მწვანე ურბანული მობილობის მხარდაჭერას, ნარჩენების მართვას და ქალაქის სერვისების დიჯიტალიზაციას.
მწვანე არქიტექტურის ნიმუშები მსოფლიოს სხვადასხვა ქალაქებში ნახეთ ფოტოკოლაჟში:
ნიდერლანდები, ქალაქი აინდჰოვენი
საფრანგეთი, პარიზი
ჩინეთი, ქალაქი ლიუჟოუ.
ჩინეთი, შანხაი.
იტალია, მილანი.
ალბანეთი, ტირანა.
წყარო: npg.ge და ბიზნესპარტნიორი