თბილისთან ახლოს, ბეთანიიდან 4 კილომეტრში მრავალფუნქციური სასტუმრო, საცხოვრებელი და გამაჯანსაღებელი კომპლექსი მოეწყობა. ერთ ჰექტარამდე ტერიტორიის კურორტად გადაკეთებას შპს,“პანტიანი“ გეგმავს. Pantiani Mountain Resort-ის დასასვენებელი კომპლექსი თბილისიდან 20 კილომეტრით იქნება დაშორებული. როგორც კომპანიის დამფუძნებელმა ბექა ბიაშვილმა „კომერსანტს“ განუცხადა კომპლექსში მოეწყობა ტყე, სასტუმრო, კოტეჯები, მარანი, სპა და საქართველოში პირველი ნეპალური ყავახანა.
„ პანტიანი“ თბილისთან ძალიან ახლოს იქნება, ცენტრიდან დაშორებულია 20 კილომეტრით. აქ არის აბსოლუტურად განსხვავებული, უნიკალური კლიმატი.
„პანტიანი“ არის ფოთლოვანი და წიწვოვანი ხეების მიქსი, ამ ყველაფერს ავსებს ის, რომ ქვემო ქართლის მიკროკლიმატური ზონა რეალურად ამ ადგილს განასხვავებს სხვა დანარჩენი, თბილისთან ახლოს მყოფი ადგილებისგან.
ტერიტორია დიდი არ არის, თუმცა დასასვენებელი კურორტისთვის დიდი ზონაა - დაახლოებით 1 ჰექტარი ჯამში.
სასტუმრო იქნება 12 ნომრიანი და ტერიტორიაზე იქნება განთავსებული 13 კოტეჯი. ტერიტორიაზე იფუნქციონირებს გამასაჯანსაღებელი სპა - ცენტრი, ყავახანა , სადაც მოხდება ყოველ დილით ჰიმალაიდან გამოგზავნილი ორგანული ყავის მარცვლების დაფქვა. ეს ერთადერთია ადგილი იქნება, სადაც ნეპალური ყავის დისტრიბუცია და მოხალვა მოხდება. საქართველოში ნეპალური ყავა არც შემოდის. გარდა ამისა, იფუნქციონირებს ღვინის მარანი, სადაც წარმოდგენილი იქნება, რეგიონალური უნიკალური ჯიშის ღვინოები , იქნება საბავშვო სათამაშო მოედანი, ასევე საბავშვო გასართობი სივრცე, ტყე-პარკი , სადაც იქნება მოწყობილი რეკრეაცია. „პანტიანში“ ასევე ორი რესტორანი აშენდება, ერთი ძირითადი - ადმინისტრაციულ შენობაში, მეორე იქნება ღია ტიპის ტერასაზე მოწყობილი,“ - განმარტავს ბექა ბიაშვილი.
პირველი დეკემბრიდან კომპლექსში კოტეჯების გაყიდვები დაიწყება. პროექტის დასრულება იგეგმება 2022 წლის ზაფხულის დასაწყისში იგეგმება. პროექტი სრულად ქართული ინვესტიციით ხორციელდება, თუმცა დამფუძნებელი თანხების მოცულობაზე საუბრისგან თავს იკავებს.
მარიამ მორგოშია