ჩინეთის სახალხო რესპუბლიკის ლიდერის, სი ძინპინის ამასწინანდელმა ვიზიტმა მოსკოვში და რუსეთის პრეზიდენტ ვლადიმირ პუტინთან მისმა შეხვედრამ შეამცირა მოსკოვის მიერ ბირთვული იარაღის გამოყენების ალბათობა. ამის შესახებ ევროკავშირის საგარეო ურთიერთობების უწყების ხელმძღვანელმა ჟოზეპ ბორელმა განაცხადა.
ბორელის თქმით სიმ ძალიან ნათლად გააგებინა პუტინს, რომ რუსეთმა უკრაინის წინააღმდეგ ბირთვული იარაღი
არ უნდა გამოიყენოს.
მისივე თქმით ჩინეთის ლიდერს სურს, მინიმუმამდე დაიყვანოს იმის რისკი, რომ დაკავშირებული იყოს უკრაინაში რუსეთის შეჭრასთან. ევროკავშირის საგარეო-პოლიტიკური უწყების ხელმძღვანელმა აღნიშნა, რომ ჩინეთი სრულად არ უჭერს მხარს რუსეთს და ჯერჯერობით არ არის იმის არავითარი ნიშანი, რომ პეკინი მოსკოვს იარაღს უგზავნიდა.
როგორც financial times - წერს ევროკავშირის ლიდერები ცდილობენ, სი ძინპინი დაარწმუნონ, მოლაპარაკებები გამართოს უკრაინის პრეზიდენტს ვოლოდიმირ ზელენსკისთან. გაზეთის თანამოსაუბრის თქმით, ბრიუსელი მოითხოვს, რომ ჩინეთმა მოისმინოს არა მხოლოდ რუსეთის, არამედ უკრაინის პოზიციაც.
მოსკოვში სი ძინპინის ვიზიტის მზადების ფონზე დასავლეთის მედიასაშუალებები წერდნენ, რომ ჩინეთის ლიდერი პუტინთან შეხვედრის შემდეგ უკრაინის პრეზიდენტთან მოლაპარაკებას გეგმავდა. ზელენსკისთან სის შეხვედრის მზადების შესახებ საუბრობდა უკრაინის პრეზიდენტის ოფისის ხელმძღვანელის მრჩეველი მიხაილო პოდოლიაკი.
ვოლოდიმირ ზელენსკი ახლახან იაპონიის გამოცემა The Yomiuri Shimbun-ისთვის მიცემულ ინტერვიუში სკეპტიკურად მიუდგა ჩინეთის ინიციატივებს რუსეთსა და უკრაინას შორის კონფლიქტის მოგვარების საკითხში და აღნიშნა, რომ კიევს პეკინისგან არ მიუღია წინადადება, რომ ის შუამავლის როლში გამოვა ან შეხვედრას გამართავს უკრაინის ლიდერთან. „მაგრამ მე დიპლომატიური არხებით მივაწოდე პირდაპირი ინფორმაცია, რომ მსურს ჩინეთის ლიდერთან ლაპარაკი,“ თქვა ვოლოდიმირ ზელენსკიმ.
სი ძინპინი 20-22 მარტს იმყოფებოდა რუსეთში სახელმწიფო ვიზიტით. ვიზიტის ფარგლებში გაიმართა მისი არაფორმალური მოლაპარაკებები ვლადიმირ პუტინთან. 21 მარტს სიმ ოფიციალური შეხვედრები გამართა რუსეთის ხელისუფლების წარმომადგენლებთან.