კორონავირუსით ინფიცირების მკვეთრად ზრდის გამო ორშაბათიდან, 25 ოქტომბრიდან მოსკოვში შეზღუდვები წესდება, ხოლო ხუთშაბათიდან მორიგი ლოქდაუნის გამოცხადებას აპირებენ.

მოსკოვის მერის სერგეი სობიანინის განკარგულებით, 60 წელზე მეტი ასაკისა და ქრონიკული დაავადებების მქონე მოქალაქეებს საცხოვრებელი ადგილის დატოვება ეზღუდებათ. ეს განკარგულებს 4 თვე იქნება ძალაში - 2022 წლის 22 თებერვლამდე.

გარდა ამისა, სობიანინი თავის განკარგულებაში რეკომენდაციას უწევს დამსაქმებლებს, თანამშრომლების 30% დისტანციურ რეჟიმში გადაიყვანონ.

ამასობაში, რუსეთში სურსათზე სამომხმარებლო ფასების მკვეთრი ზრდის გამო ეკონომიკის უმაღლესი სკოლის ეკონომიკური კვლევების ფონდის „განვითარების ცენტრი“ მთავარი ეკონომისტი ვალერი მირონოვი სასურსათო ტალონების შემოღებას წინასწარმეტყველებს.

მისი თქმით, მოსახლეობის გაჭირვებულ ფენას ტალონები უნდა დაურიგდეთ და არა ფული, რომელიც შეიძლება არა სურსათზე, არამედ სხვა პროდუქტზე დახარჯონ.
„ჩვენი შიდა კონიუნქტურა საგარეო ბაზრებზეა დამოკიდებული. იქ ეკონომიკის მხარდაჭერა ცენტრალური ბანკების მიერ საფინანსო აქტივების შეძენისა და ეკონომიკაში ფულის გაშვებით ხდება. ამის გამო თითქმის ყველა პროდუქტი ძვირდება, მათ შორის სურსათი“, - აცხადებს ექსპერტი.

რუსეთის ეკონომიკის სამინისტროს კვლევის თანახმად, ბოლო წლის განმავლობაში ქვეყანაში ყველაზე მეტად ბოსტნეული და ხორცი გაძვირდა.

რაც შეეხება ეპიდვითარებას, ბოლო პერიოდში რუსეთში ყოველდღიურად, საშუალოდ, კოვიდინფიცირების 35 000 ახალი შემთხვევა ფიქსირდება და სიკვდილიანობა 1 000-ის ფარგლებშია.