მოსკოვის განცხადებით, საქართველოსთან ავიამომისვლის აღდგენის პირობები ჯერ არ შესრულებულა. ამ პირობებს შორის რუსული მხარე რუსოფობული კამპანიის შეწყვეტასა და რუსი ტურისტებისთვის ნებისმიერი შესაძლო საფრთხის აღმოფხვრას ასახელებს. შესაბამისი განცხადებები საგარეო საქმეთა მინისტრის მოადგილემ ანდრეი რუდენკომ დღეს ჟურნალისტ მიხეილ გუსმანისთვის მიცემულ ინერვიუში გააკეთა.
“კარგადაა ცნობილი, რატომ მოგვიწია გასული წლის ზაფხულში ფრენების აკრძალვა. ეს იძულებითი ზომა იყო, იგი დროებითია. მისი გაუქმების პირობები ასევე კარგადაა ცნობილი: ამ ქვეყანაში ვითარების სტაბილიზება, რუსოფობული კამპანიის შეწყვეტა, რუსი ტურისტებისთვის ყოველგვარი საფრთხის აღმოფხვრა. ეს პირობები ჯერ-ჯერობით შესრულებული არ არის. როგორც კი ისინი შესრულდება, რუსეთი ავიამიმოსვლის აღდგენას არ დააყოვნებს, – აღნიშნა დიპლომატმა.
გარდა ამისა, მისი თქმით, “საქართველოში საპარლამენტო არჩევნების მოახლოება ზემოქმედებს შიდა ვითარებაზე უსაფრთხოების თვალსაზრისით”.
სამწუხაროდ, გარკვეული ძალები საქართველოში არ არიან დაინტერესებულები რუსეთთან ურთიერთობების გაუმჯობესებით და ანტირუსულ რიტორიკას იყენებენ. ასევე სამწუხაროდ, ეს არ იძლევა იმის თქმის საფუძველს, რომ ამ პირობებში ჩვენი ტურისტების უსაფრთხოება იქნება უზრუნველყოფილი. ამდენად, მოვუწოდებ ჩვენს მოქალაქეებს, ჯერ-ჯერობით არ იჩქარონ საქართველოსკენ საგზურების ყიდვა. ველით, რომ თბილისი შესაბამის დასკვნებს გამოიტანს და სამომავლოდ მოსკოვთან ურთიერთობებს უფრო პრაგმატულად ააგებს, თავად საქართველოში პოლიტიკური პროცესების მიუხედავად. მზად ვართ საქართველოსთან ურთიერთსასარგებლო პარტნიორობის საფუძველზე ურთიერთობების განსავითარებლად და დაინტერესებულები ვართ იმით, რომ ჩვენი ურთიერთობა გამოვიდეს ჩიხიდან, რომელშიც ჩვენი ბრალეულობით არ აღმოჩენილა, – განაცხადა რუდენკომ.
• რუსეთმა საქართველოსთან ავიამიმოსვლა გასული წლის 8 ივლისს “გავრილოვის ღამისა” და შემდგომი მოვლენების მოტივით შეწყვიტა.
• საქართველოს ამ დროისთვის სახმელეთო საზღვრები ჩაკეტილი აქვს, ხოლო საჰაერო გზით შემოსვლის უფლება მხოლოდ ხუთი ევროპული ქვეყნის მოქალაქეებს აქვთ.
accentnews.ge