რუსეთის ეკონომიკის მინისტრის მოადგილე, დიმიტრი ვოლვაჩი აცხადებს, რომ მათი მიზანია, შემცირდეს ოკუპირებული სოხუმისა და ცხინვალის დამოკიდებულება რუსულ დახმარებაზე მომდევნო 3 წლის განმავლობაში. ამის შესახებ ვოლვაჩმა რუსულ სახელისუფლებო მედია გამოცემა TASS-თან ინტერვიუში ისაუბრა. ის 9 მარტს აფხაზეთის მარიონეტული ხელისუფლების წარმომადგენლებს შეხვდა.

როგორც გამოცემა წერს, რუსეთის ფედერაციის ეკონომიკური განვითარების სამინისტრო იმედოვნებს, რომ უახლოეს მომავალში აფხაზეთი და ცხინვალის რეგიონი გადავლენ უფრო დამოუკიდებელ ეკონომიკურ ფორმატზე, რაც შეამცირებს დამოკიდებულებას რუსულ სუბსიდიებზე.

ამასთან, მინისტრის მოადგილის თქმით, მომდევნო წლებში შემცირდება რუსეთის თანადაფინანსების წილი სახელმწიფო სექტორში დასაქმებულთა ხელფასებზე.

სახელმწიფო სექტორში დასაქმებულთა ხელფასების ზრდის თვალსაზრისით რუსეთის თანადაფინანსების წილი თანდათან შემცირდება - 2022 წლის 85%-დან 2025 წლისთვის კი 15%-მდე, - ამბობს ვოლვაჩი.

მისივე თქმით, დახმარების პირველი ეტაპი დასრულებულია.

დახმარების პირველი ეტაპი, როცა შეგვიძლია უბრალოდ ფულის მიცემა, ინფრასტრუქტურის განვითარება, უკვე დასრულებულია. ყველაფერი, რისი მიღებაც შეგვეძლო ამ ეტაპიდან ეკონომიკური ზრდის კუთხით, მივიღეთ, - ამბობს ის.

ეკონომიკის მინისტრის მოადგილის აზრით, ოკუპირებულმა რეგიონებმა უნდა მოიზიდონ ინვესტიციები, გაამარტივონ რეგულაციები და გააუმჯობესონ საინვესტიციო კლიმატი, რათა გაზარდონ თავიანთი ბიუჯეტის შემოსავლები.

ყველა საუკეთესო [წესი] რაც რუსეთშია, იქ უნდა იყოს შეტანილი, რათა გარანტირებული იყოს ინვესტორის უფლებები - ამბობს ვოლვაჩი.

formulanews.ge