„სესხის ამომღები კომპანიები განულებულ სესხებს თავიდან ითხოვენ“ - ამის შესახებ „კომერსანტს“ ადვოკატმა მარიკა არევაძემ განუცხადა. მისი თქმით, კვირის განმავლობაში უკვე მესამე შემთხვევა დაფიქსირდა, როდესაც მას დახმარებისთვის მიმართავენ.

 „გვახსოვს ყველას, რომ 2018 წლის დეკემბერში „ფონდმა ქართუმ“ პრობლემური აქტივების შეძენა გადაწყვიტა და მოსახლეობას სესხები გაუნუნლა. მონაცემები აღბეჭდილი იყო vali.ge-ზე, მაგრამ დღესდღეობით საიტი აღარ არსებობს. ცნობები დავალიანების არ ქონის შესახებ ამ ადამიანებს არ აქვთ, ანუ მტკიცებულება იმისა, რომ სასესხო ვალდებულება არ აქვთ.  მსესხებლებს არ ჰქონდათ იმის მოლოდინი, რომ შემდეგში ვინმე შეეხმიანებოდა. ან „ქართუ ფონდმა“ მოატყუა მომხმარებელი ან გამსესხებლები არიან არა კეთილსინდისიერები, რადგან „ქართუ ფონდასც“ მიჰყიდეს აქტივები და ამოიღებ კომპანიებსაც“, - აცხადებს მარიკა არევაძე.

მარიკა არევაძის თქმით, იმ მოქალაქეებს, რომლებსაც სესხის ამომღები კომპანიები დაუკავშირდნენ ამ ეტაპზე მედიასთან საუბარი არ სურთ. როგორც ადვოკატი ამბობს, ამ ადამიანებს, არ აქვთ ცნობა აღებული განულებული სესხების შესახებ, ამიტომ ადვოკატმა „ფონდ ქართუს“ კითხვები გაუგზავნა:

„პრობლემის გარკვევის მიზნით ქართუ ფონდს გარკვეული კითხვებით მივმართე. მაგალითად, რამდენი სესხის განულება მოხდა პროგრამის ფარგლებში, თითოეული კომპანიიდან რამდენი პრობლემური აქტივი იქნა შეძენილი, ვის უნდა მიმართონ პროგრამაში ჩართულმა პირებმა, რათა აიღონ განულებულ სესხებზე ცნობები დავალიანების არ ქონის შესახებ. გვაინტერესებს ამ სესხების შესახებ ინფორმაცია სად ინახება. გამსესხებლებთან მიდიან ადამიანები და ეუბნებიან, რომ „ქართუ ფონდში“ მივიდნენ, „ქართუ ფონდში“ მიდიან და გამსესხებლებისკენ ამისამართებენ. რაღაც წრე შეიკრა, საიდანაც ინფორმაციის ამოღება შეუძლებელი გახდა. მტკიცებულებების გარეშე ვერ ვისაუბრებ, ამიტომ გავგზავნე წერილი და ველოდები პასუხს“, განმარტავს მარიკა არევაძე.  

პრობლემების შესაძლო არსებობას აღიარებს პრობლემური აქტივების ბიურო. მარიკა არევაძის თქმით, ერთ-ერთ მოქალაქეს სწორედ პრობლემური აქტივების ბიუროდან დაურეკეს.  კომპანიის დირექტორი ნიკა ეზუგბაია „კომერსანტთან“ საუბარში აცხადებს, რომ შეუძლებელია, რომელიმე სესხის ამომღებმა კომპანიამ მომხმარებელს სესხის გადახდა ხელმეორედ, შეგნებულად  სთხოვოს.

„როდესაც სესხი იხურება, ჯერ იხურება პროგრამაში, შემდეგ იგზავნება კრედიტ ინფოში და ა.შ. რა თქმა უნდა, შეიძლება მოხდა ისეთი გამონაკლისი და ტექნიკური ხარვეზი, რომ თუნდაც ჩვენმა  კომპანიამ ან სხვა კომპანიამ უბრალოდ კლიენტს დაურეკა და  ამის შესახებ უთხრა. ეს შემთხვევითობაა. ჯერ არ ყოფილა ისეთი შემთხვევა, რომ კლიენტი მოსულიყო ან მისი წარმომადგენელი დაგვკავშირებოდა, აეხსნა რომ სესხი დახურულია და პრობლემა არ მოგვარებულიყო. ასეთი შემთხვევები ძალიან იშვიათია. ჩვენ შეგვიძლია შევამოწმოთ ის ქეისები, რომელიც ჩვენს კომპანიას ეხება, რის შემდეგაც გეტყვით ზუსტ მიზეზს თუ რა მოხდა, რომელიმე თანამშრომლის გულგრილობის საკითხი ხომ არ დგება, მართლა იყო დასარეკი თუ ტექნიკური ხარვეზი იყო. აბსურდია იმაზე საუბარი, რომ კომპანია ავალებს თავიანთ თანამშრომლებს ხელახლა დაურეკოს ადამიანს. ეს ჩვეულებრივი კანონის დარღვევაა და ამას არავინ იზამს. ყველა სესხი რომელიც ნულდება, იყიდება, გადაიყიდა თუ რაც მოხდება ყოველ კვარტალური ანგარიში ეროვნულ ბანკში, ჩაშლილად მიდის“-  განაცხადა ნიკა ეზუგბაიამ.   

საკითხზე სასუბროდ „კომერსანტი“ „ფონდ ქართუსაც“ დაუკავშირდა, რომლის ხელმძღვანელმა, ნიკოლოზ ჩხეტიანმა მედია ჰოლდინგის არც ზარს და არც შეტყობინებას არ უპასუხა.

როგორც ცნობილია, მთავრობამ 2018 წლის დეკემბერში, სესხების განულება დააანონსა. მაშინ გაჟღერდა, რომ აღნიშნული გადაწყვეტილება შეეხებოდა ყველა იმ პირს, რომელსაც 2000 ლარამდე, გაპრობლემებული სესხი ჰქონდა. სესხების განულება ე.წ. შავ სიაში არსებულ 600,000 მსესხებელს შეეხო, რომელთაც ერთ წელზე უფრო მეტად ვადაგადაცილებული სესხები ჰქონდათ. მთავრობისა და “ქართუს” ინფორმაციით, ამ სესხების პორტფელის ღირებულება 1.5 მილიარდი ლარი იყო.

ბაჩო ადამია