მოსახლეობა სესხის დასაფარად 900 მლნ ლარით მეტს იხდის – "ბანკები წაუგებელ თამაშს თამაშობენ"

მოსახლეობა სესხის დასაფარად 900 მლნ ლარით მეტს იხდის – "ბანკები წაუგებელ თამაშს თამაშობენ"

access_time2016-11-15 19:30:50

 

ლარის კურსის მორიგმა დევალვაციამ მსესხებლების მდგომარეობა მკვეთრად დაამძიმა. როგორც "რეზონანსი" წერს, თუკი შარშან, ლარის გაუფასურების გამო, აღებული კრედიტის მომსახურების სანაცვლოდ მომხმარებელი 500 მილიონი ლარით ზედმეტს იხდიდა, წლეულს ეს თანხა, შესაძლოა, 900 მილიონს გაუტოლდეს.

 

 

ბანკები წაუგებელ თამაშს თამაშობენ, თუმცა ასეთი კაბალური რეჟიმი შეიძლება დიდხანს არც გაგრძელდეს და ბანკებმა ის ტოტი მოჭრან, რომელზეც სხედან. საუბარია იმ შემთხვევებზე, როცა ზემოგებაზე გასულ ბანკებს მომხმარებელი სესხს ვეღარ დაუბრუნებს. ამის პირველი მაცნე ისიცაა, რომ ვადაგადაცილებული სესხების რაოდენობა დღითი დღე იზრდება. გაცილებით მძიმე მდგომარეობაა მიკროსაფინანსოებში, რომელთაც კომერციული ბანკებისგან უარით გასტუმრებული მოქალაქეები აკითხავენ.

 

 

თუკი ლარის კურსი დღევანდელ კრიტიკულ ნიშნულს გასციდება და საბედისწერო ზღვარს (2.60-2.70-ს) მიაღწევს, ხალხი დოლარში აღებული ვალების გასტუმრებას დევალვირებული ლარით ვეღარ შეძლებს.

 

 

საბანკო სფეროს ექსპერტი ლია ელიავა "ბიზნეს-რეზონანსთან" საუბრისას აცხადებს, რომ ლარის კურსის ვარდნა უცხოურ ვალუტაში აღებული სესხების მომსახურებას აძვირებს, ვინაიდან მოსახლეობის დიდ ნაწილს შემოსავალი აქვს ლარში და არა დოლარში. შესაბამისად, დევალვაცია მოსახლეობის ჯიბიდან ზედმეტი თანხის ამოღების ძალზე ეფექტური საშუალებაა. ფაქტობრივად, იგი ამცირებს მოსახლეობის განკარგვად შემოსავალს, ანუ იმ ნაწილს, რომელიც რჩება ადამიანს პირადი მოხმარებისთვის.

 

 

"ლარის დევალვაცია დაბლა სწევს მოსახლეობის ცხოვრების დონეს. ამით იზღუდება ხარჯები და ეს ნიშნავს, რომ მთლიანად ვარდება მოთხოვნა ეკონომიკაში; ხოლო მოთხოვნის მკვეთრი შემცირება კი კრიზისის წინაპირობაა. ამიტომ გაუფასურება მოქმედებს არა მარტო სესხების საპროცენტო განაკვეთზე, არამედ მთლიანად ეკონომიკაზე და, მათ შორის, ბიზნეს აქტივობაზეც", - აღნიშნა ლია ელიავამ და შეკითხვის საპასუხოდ, თუ რამდენი მილიონი ლარით გაუძვირდათ მსესხებლებს კრედიტები წლის განმავლობაში, აცხადებს, რომ კონკრეტული ციფრები არ დაუთვლია და ამის ერთადერთი მიზეზია ლარის გამუდმებული ვარდნა. შეჩერდება თუ არა ეს პროცესი, ჯერ კიდევ გაურკვეველია. ამდენად, როდესაც მეტ-ნაკლებად დასტაბილურდება ლარი, მაშინ ექნება აზრი ზედმეტობის დათვლას.

 

 

რაც შეეხება დევალვაციით დაზარალებული მსესხებლების უფლებების დაცვას, ელიავა გამოსავალს იმაში ხედავს, რომ მთავრობამ და ეროვნულმა ბანკმა სავალუტო კურსი და საპროცენტო განაკვეთები მართვადი გახადოს. წინააღმდეგ შემთხვევში, ჩვენს ეკონომიკას ნულოვანი პერსპექტივა ექნება.

 

 

ექსპერტის თქმით, დღესდღეობით ეროვნულ ბანკში აღარ არის გიორგი ქადაგიძე, მაგრამ სხვა დანარჩენი "ქადაგიძეები" ისევ ადგილზე რჩებიან. ამდენად, ზემოთ ჩამოთვლილ მიზეზთა გამო სესხების გაძვირება არ უნდა გაგვიკვირდეს.


 

 

სტატისტიკოსი სოსო არჩვაძე სესხების გაძვირებას ორმაგ პრობლემას უკავშირებს, რომელიც, როგორც წესი, იშვიათად ემთხვევა ერთმანეთს. ეს გახლავთ ლარის დევალვაცია და ინფლაცია, რაც გამოწვეულია იმით, რომ საქართველოში შიდა სამომხმარებელო ბაზრის 70% დამოკიდებულია იმპორტზე.

 

 

შესაბამისად, ლარის კურსის დაცემას წესით უნდა მოჰყვეს ფასების საერთო დონის მატება, მაგრამ ჩვენთან თითქმის სამწლიანი პაუზის შემდეგ პირველად დაფიქსირდა წლიური დეფლაცია. შარშანდელ ოქტომბერთან შედარებით, მიმდინარე წლის ოქტომბრის თვეში ფასების საერთო დონე არათუ არ გაზრდილა, არამედ, პირიქით, 0.2%-ით შემცირდა. ამას თავისი ახსნა აქვს. კერძოდ, მოსახლეობის ხარჯები შეიძლება მიმართული იყოს როგორც კაპიტალური ხარჯების დასაფინანსებლად (საქონლის შესაძენად, მშენებლობისთვის ან ძვირადღირებული ნივთის შესაძენად), ასევე ადრე აღებული ფინანსური ვალდებულებების გასასტუმრებლად. მარტივად რომ ვთქვათ, საბანკო კრედიტის დასაფარად.

 

 

"რადგანაც კრედიტების დიდი ნაწილი უცხოურ ვალუტაშია (კერძოდ, ამერიკულ დოლარშია) გაცემული, რა თქმა უნდა, ლარის კურსის დაცემა პირდაპირ გავლენას ახდენს იმ საპროცენტო განაკვეთზე, რასაც მოსახლეობა იხდის ვალის გასასტუმრებლად. ამ დროს შემოსავლის ძირითადი წყარო საქართველოში დასაქმებულთათვის გაიცემა ლარში. ამიტომ, რომ ავიღოთ ბოლო ოთხი წლის (2012-16) პერიოდი, 2012 წელს, თუკი მარტო პროცენტის სახით მომსახურებაზე მიემართებოდა შინამეურნეობათა, საშუალოდ, ერთი თვის ფულადი შემოსავლის დაახლოებით 40%, 2016 წელს უკვე ფულადი შემოსავლის 80% მიდის სესხის მომსახურებაზე. ამდენად, სახსრების სულ უფრო დიდი ნაწილი, რომელსაც ადამიანი საქონლის შესაძენად უნდა იყენებდეს, მიემართება არა სამომხმარებლო ბაზარზე, არამედ საბანკო ვალდებულებების გასასტუმრებლად.

 

 

ამ შემთხვევაში ბანკები თამაშობენ წაუგებელ თამაშს. თუ კურსი დაეცემა, ისინი მაინც მოგებას ნახავენ. უცხოურ ვალუტაში არსებული მათი აქტივების ნაწილის საფასური ეროვნულ ვალუტაში კიდევ უფრო გაიზრდება", - აცხადებს სოსო არჩვაძე.

 

 

ხელისუფლებაც მაინცდამაინც არ იკლავს თავს არსებული კურსის გამყარებაზე. მართალია, ოფიციალურად "კანონით სახელმწიფო ბიუჯეტის შესახებ" 2016 წელს ლარის კურსი უნდა ყოფილიყო 2,40, მაგრამ ახლა ათი თვის საშუალო მაჩვენებელი არის 2,32. წლის ბოლო ეს მაჩვენებელი კიდევ უფრო მაღალი იქნება.

 

 

"ახლა დაგისახელებთ ციფრს, რომელიც ქართულ მედიაში პირველად უნდა გაჟღერდეს. იმისათვის, რომ წლის განმავლობაში ლარის კურსის 2.40 მივიღოთ, საჭირო იქნება, რომ ბოლო ორ თვეში, ანუ ნოემბერ-დეკემბერში (ნოემბერი უკვე დაწყებულია) ლარის საშუალო კურსი დაახლოებით 2.76 გვქონდეს. ამ დროს რას ნიშნავს ხელისუფლების განცხადებები, რომ ლარის კურსი გაწონასწორებულია?! რა პერიოდთან მიმართებით ამბობენ ამას? ფაქტი ის არის, რომ ლარის მუდმივი რყევა ჩვენს ეკონომიკაზე ახდენს გავლენას და ბიზნესმენი, ინვესტორი თუ რიგითი მომხმარებელი არ არის დარწმუნებული, რომ მეორე დღეს ლარი არ გაიქცევა, ანუ მკვეთრად არ შეიცვლება ეროვნული ვალუტის კურსი", - ამბობს არჩვაძე.

 

 

სტატისტიკოსის გაანგარიშებით, თუკი შარშან განმავლობაში ხალხს 500 მილიონით ზედმეტის გადახდა უწევდა კრედიტებში, ამჯერად, სულ მცირე, 900 მილიონი ლარის გადახდა მოუწევთ მარტო სასხის პროცენტის დასაფარად.

 

 

 

"საზოგადოება და ბანკების" ხელმძღვანელი გიორგი კეპულაძე "ბიზნეს-რეზონანსთან" საუბრისას აცხადებს, რომ საბანკო კრედიტების წილი საქართველოში ძალზე მაღალია. პირველ რიგში, ეს პრობლემებს უქმნის იმ ადამიანებს, რომელთა შემოსავალიც ლარშია, მაგრამ ყოველთვიური შენატანი შეაქვთ უცხოურ ვალუტაში. ამ ადამიანებისთვის ლარის ყოველი გაუფასურება ზრდის სესხის მომსახურებას, რაც დამატებითი პრობლემაა ქართული ეკონომიკისთვისაც, რადგან ჩვენ საკმაოდ მაღალი დოლარიზაცია გვაქვს, თითქმის 70%.

 

 

 

"გამოსავალი ორგვარია: სესხის რესტრუქტურიზაცია და ცოტა ხნით ვალის გახანგრძლივება. სწორედ ამ მეთოდით უნდა მოხდეს ყოველთვიური გადასახადის შემცირება. მიუხედავად იმისა, რომ, საბოლოო ჯამში, გადასახდელი თანხა იზრდება, თუკი მსესხებელს ყოველთვიური შენატანი შეუმცირდება, მაშინ ის უფრო ადვილად მოახერხებს სესხის მომსახურებას.

 

 

ერთ-ერთი გამოსავალია, ასევე, ლარში ან იმ ვალუტაში სესხის გადატანა, რომელშიც გვაქვს შემოსავალი. კონკრეტულად გამიჭირდება იმის თქმა, თუ რამდენით ზედმეტის გადახდა მოუწევთ ადამიანებს საბანკო სესხის დასაფარად. ასე დროს უნდა დავთვალოთ, რამდენი სესხია დოლარში გაცემული, რა ვადიანობით, ყოველთვიური შენატანი რამდენია. ეს ძალზე ინდივიდუალურია. თუმცა, ჩვენ რომ ავიღოთ ის კურსი, რაც ლარის გაუფასურების დაწყებამდე არსებობდა, გამოდის, რომ ერთ ადამიანს ყოველ ას დოლარზე 75 ლარით გაუძვირდა სესხი, რაც ათასდოლარიანი სესხის შემთხვევაში, 750 ლარს ნიშნავს. მსესხებელმა ყოველ ას დოლარზე 75 ლარი უნდა მოაკლოს სხვა რამეს, რათა მოემსახუროს ამ სესხს და შეძლოს მისი ყოველთვიური დაფარვა. ეს დაკლებული თანხა ბანკებისა და მომხმარებლებისგან ჯაჭვური რეაქციით გადაეცემა და აკლდება ჩვენს ეკონომიკას", - აღნიშნა გიორგი კეპულაძემ.

 

 

 



The Wall Street Journal: ნავთობი სწრაფად ძვირდება

The Wall Street Journal: ნავთობი სწრაფად ძვირდება
access_time2021-03-08 20:30:41
OPEC+-მა ახალ შეთანხმებას მიაღწია, რომელიც მოკლევადიან პერიოდში ნავთობის ბაზარზე მნიშვნელოვან გავლენას მოახდენს - ალიანსის ქვეყნები მოპოვების მაჩვენებელს უცვლელად დატოვებენ. გამონაკლისის სახით, რუსეთს და ყაზახეთს ჯამური მოპოვების დღე-ღამეში 150 000 ბარელით გაზრდის უფლება მიეცა.შესაბამისად, პადნემიამდელ პერიოდთან შედარებით მოპოვების შემცირდება 6,9 მლნ. ბარელი იქნება, მაშინ, როდესაც აპრილში ეს მაჩვენებელ 9 მლნ.-ს...

Focus: ევროკავშირის ერთიანობა ვაქცინაციას ეწირება

Focus: ევროკავშირის ერთიანობა ვაქცინაციას ეწირება
access_time2021-03-08 19:00:31
ევროკავშირის ერთიანი ვაქცინაციის ფრონტი, არასაიმედოობის გამო, იშლება - სულ უფრო ხშირად სხვადასხვა ქვეყნები ინიციატივას საკუთარ თავზე იღებენ. ეს არა მხოლოდ ვაქცინაციის პრობლემებთან, არამედ ევროკავშირში ძალის ახალი ცენტრების გამოჩენასთანაცაა დაკავშირებული.კერძოდ, ავსტრია და დანია ისრაელთან ე.წ.  სავაქცინო ალიანსის შექმნას გეგმავენ. ევროკავშირის რეაქცია ამ დემარშზე მოზომილი იყო - ევროკომისიის წარმომადგენლის ერიკ მამერის თქმით, „ევროკავშირის...

"კომენდანტის გადაწევის შემთხვევაში შეიძლება რესტორნებს რამე ეშველოს" - გურამ ბაღდოშვილი

access_time2021-03-08 14:30:54
სარესტორნო ქსელ „ჩვენის“ დამფუძნებელი, გურამ ბაღდოშვილი „ბიზნესპარტნიორთან“ რესტორნების შიდა სივრცეებში მუშაობის დღეიდან განახლებას ეხმაურება და აცხადებს, რომ შიდა სივრცეებისთვის გამკაცრებული რეგულაციები ისეთია, რომ შესაძლოა რესტორნების ნაწილი არც გაიხსნას.   „ზოგიერთ რესტორანს შიდა სივრცის ნაწილი ძალიან მცირე აქვს, აქედან გამომდინარე მგონია გახსნა არ უღირს. წარმოიდგინეთ, თუ 50 კვადრატული მეტრის ფართი გაქვს, სულ 5-6 ადამიანის მასპინძლობა შეგიძლია,“ - აცხადებს...

ეკვადორი, სომხეთი, კენია - სად ვყიდით და ვყიდულობთ ცოცხალ ყვავილებს

ეკვადორი, სომხეთი, კენია - სად ვყიდით და ვყიდულობთ ცოცხალ ყვავილებს
access_time2021-03-08 16:00:00
საქართველოდან ცოცხალი ყვავილების ექსპორტი გაიზარდა, ქვეყანაში იმპორტი კი შემცირდა. კერძოდ, სტატისტიკის ეროვნული სამსახურის მონაცემებით, 2020 წელს საქართველოდან 39 870 აშშ დოლარის ცოცხალი ყვავილები გავიდა, ხოლო 2019 წელს - 28 830 აშშ დოლარის. რაც შეეხება იმპორტს, 2019 წელს საქართველომ 2,531 მლნ დოლარის ყვავილები შეიძინა, ხოლო 2020 წელს - 1,518 მლნ აშშ დოლარის. „ბიზნესპრესნიუსი“ დაინტერესდა, სად ვყიდით და ვყიდულობთ ცოცხალ...

როგორი იქნება გერმანიაში ლეგალურად დასაქმებულების ანაზღაურება?!

როგორი იქნება გერმანიაში ლეგალურად დასაქმებულების ანაზღაურება?!
access_time2021-03-08 12:28:25
საზღვარგარეთ დროებითი დასაქმების მსურველი საქართველოს მოქალაქეებისთვის სარეგისტრაციო პორტალი მიმდინარე წლის 15 თებერვალს ამოქმედდა და გერმანიაში სოფლის მეურნეობის სექტორში, სეზონურ სამუშაოზე ლეგალური დასაქმების მიზნით, საქართველოს 95 000-ზე მეტი მოქალაქე უკვე დარეგისტრირდა.როდის და რა პირობებით შეძლებენ საქართველოს მოქალაქეები გერმანიაში დასაქმებას, როგორია შერჩევის კრიტერიუმები და კიდევ რომელი ქვეყნების დამატება მოხდება...


მსგავსი სიახლეები

up