2021 წელთან შედარებით, წელს შხამ-ქიმიკატების ფასი 40-50%-ით, ზოგ შემთხვევაში 100%-ითაც კი არის გაზრდილი. ფერმერების შეფასებით, წლევანდელ მოსავლიანობას სერიოზული საფრთხე ემუქრება და განსაკუთრებით მცირე საოჯახო მეურნეობებს გაუჭირდებათ. არ არის გამორიცხული, მიწის დამუშავებისთვის გლეხებს სახელმწიფოს დახმარება დასჭირდეთ.
სიღნაღელი ფერმერი მიხეილ ყანდაშვილი ,,კომერსანტთან“ ამბობს, რომ შხამ-ქიმიკატების შეძენა, მუშახელის დაქირავება, რიგი სასოფლო-სამეურნეო სამუშაოების შესრულება მაღალ ხარჯს მოითხოვს, რისი გაწევის შესაძლებლობა მცირე და საშუალო ფერმერების დიდ ნაწილს არ ექნება და შეიძლება დარგის სუბსიდია გახდეს საჭირო.
,,მსხვილი ფერმერები თავს როგორმე გავიტანთ, მაგრამ გლეხებს მიწის დამუშავება ძალიან გაუჭირდებათ. ჩემს შემთხვევაში, ხარჯი 100-150%-ით მეზრდება. აქედან შხამ-ქიმიკატების წილი 80-100%-ა, არის სხვა ტიპის ხარჯიც, რომლის გაწევა ფერმერების უმეტესობისთვის ნამდვილად იქნება სირთულე და შეიძლება სუბსიდია დასჭირდეთ. წინააღმდეგ შემთხვევაში, მოსავლიანობას დიდი საფრთხე დაემუქრება. როგორც არ უნდა იყოს, ხარჯის ზრდა ფასებზეც აისახება. ერთ-ერთი რთული წელი გველის, აგროსექტორში ზომები დროულად თუ არ იქნა მიღებული, სხვა სფეროებშიც შექმნის პრობლემას და განსაკუთრებით სამომხმარებლო ბაზრისთვის იქნება მძიმე, ქართული პროდუქტი გაძვირდება“, - ამბობს ,,კომერსანტთან“ მიხეილ ყანდაშვილი.
აგროწარმოების ხარჯის ზრდაზე საუბრობს ანალიტიკოსი ნიკა შენგელიაც, რომლის შეფასებითაც, ყველა იმ ქვეყანაში, საიდანაც შხამ-ქიმიკატები შემოდის, ფასები კატასტროფულად გაზრდილია და როგორც მოსავლის, ასევე სამეწარმეო ხარჯს მნიშვნელოვნად გაზრდის.
,,აგრარული პროდუქტის მოვლა-მოყვანის ხარჯი ძვირდება, რაც გლობალური პრობლემაა. სოფლის მეურნეობას ერთ-ერთი რთული წელი ელის. შხამ-ქიმიკატებზე ფასები მომატებულია, რაც იმის პირობაა, რომ გაზაფხულსა და ზაფხულში ადგილობრივი პროდუქცია იაფი ნამდვილად ვერ იქნება“, - ამბობს შენგელია.
მისი შეფასებით, ინფლაცია აპრილიდან შემცირდება, მაგრამ ეს პროცესი ფასების ზრდას ვერ შეაჩერებს.
,,გაზაფხულზე, განსაკუთრებით აპრილიდან, ინფლაციის მაჩვენებლის დაწევა შესაძლებელია, მაგრამ მაღალი ფასები დარჩება წინა წლის ანალოგიურ პერიოდთან შედარებით. ის, რომ ეკონომიკური ზრდა 10,6% იყო, მოსახლეობის კეთილდღეობისთვის არანაირ ნიშნებს არ შეიცავს და ძირითადად ჩვენი ემიგრანტების დამსახურებაა, რომლებმაც 2021 წელს 7 მილიარდზე მეტი გადმორიცხეს ტრანზაქციების სახით საქართველოში“, - განმარტავს ანალიტიკოსი ,,კომერსანტთან“.
ნიკა შენგელიას ინფორმაციით, შხამ-ქიმიკატების იმპორტი ძირითადად თურქეთიდან, უკრაინიდან, რუსეთიდან და ევროპის რამდენიმე ქვეყნიდან ხორციელდება, ფასები კი ყველა ბაზარზე გაზრდილია, რის გავლენაც მალე ქართულ ბაზარსაც დაეტყობა.
ფერმერების ინფორმაციით, 1000-1500 კვ/მ მიწის დამუშავებას სულ მცირე , 600 ლარი სჭირდება, შხამ-ქიმიკატების გაძვირება კი გლეხის ხარჯს, სულ მცირე 1000 ლარამდე გაზრდის, რის საშუალებაც ბევრ ოჯახს არ ექნება.
მარი ჩიტაია