„მოსალოდნელზე კარგი მონაცემების გათვალისწინებით ოპტიმისტურ სცენარში 10.6%-იან ზრდას ვპროგნოზირებთ 2022 წლისთვის“, — აღნიშნულია Galt&Taggart-ის ყოველკვირეულ მიმოხილვაში.

„საქსტატის წინასწარი მონაცემებით, 2022 წლის მაისში საქართველოს რეალური მშპ-ის წლიურმა ზრდამ 11.6% შეადგინა, რაც მოსალოდნელზე კარგი მაჩვენებელია გასული წლის მაღალი ბაზიდან გამომდინარე (2021 წლის მაისში რეალური მშპ-ის ზრდა 25.8% იყო). ჯამურად, 2022 წლის პირველ 5 თვეში საქართველოს ეკონომიკა წლიურად 11.2%-ით გაიზარდა. შესაბამისად, მოსალოდნელზე კარგი მონაცემების გათვალისწინებით ოპტიმისტურ სცენარში 10.6%-იან ზრდას ვპროგნოზირებთ 2022 წლისთვის. მაისში ზრდა დაფიქსირდა ტრანსპორტის, სასტუმროები და რესტორნების, ელექტროენერგიის, დამამუშავებელი და სამთომოპოვებითი მრეწველობის და მშენებლობის დარგებში. დანახარჯების მხრიდან, ეკონომიკურ ზრდას, ძირითადად, მოთხოვნის კომპონენტი განაპირობებდა ძლიერი ფულადი გზავნილების, გაუმჯობესებული ტურიზმის შემოსავლებისა და დაკრედიტების ზრდის არხებით“, — ნათქვამია მიმოხილვაში.

„თიბისი კაპიტალიც“ ცვლის 2022 წლის ეკონომიკური ზრდის მოლოდინს 10%-ზე უფრო მაღალი მაჩვენებლით, რადგან თვლიან რომ ეკონომიკური აქტივობა მნიშვნელოვნად გაზრდილია.

„მაისის ეკონომიკის ზრდის წინასწარი შეფასება კვლავ ძლიერ ეკონომიკურ აქტივობაზე მიუთითებს. „თიბისი“ კაპიტალი ცვლის 2022 წლის მოლოდინს დაახლოებით 10%-დან, 10%-ზე უფრო მეტის მიმართულებით“, — აღნიშნულია თიბისი კაპიტალის ყოველკვირეულ განახლებაში მთავარი ეკონომისტისგან.