„სწორი და ერთადერთი გზა ანაკლიის პორტის კერძო მეპატრონის ხელში გადასვლა, მისი აქციებად ქცევა და შესაბამისად, ამ გზით, არა თუ 120 მილიონის, არამედ, 1 მილიარდი დოლარის მოზიდვაა,“-ამის შესახებ რადიო „კომერსანტის“ გადაცემაში „პროფესიონალები“ „ეკონომიკური ტრანსფორმაციის ცენტრის პრეზიდენტმა“, რამაზ გერლიანმა ისაუბრა და მთავრობის მხრიდან „ანაკლიის განვითარების კონსორციუმთან“ ხელშეკრულების შეწყვეტა შეაფასა.მისი თქმით, მთავრობა და ანაკლიის კონსორციუმი ბოლო პერიოდში ანაკლიის პორტთან დაკავშირებით ე.წ „პინგ-პონგს“ თამაშობდნენ,ხდებოდა ბრალდებების აქეთ-იქით გადასროლა.
კერძოდ, მთავრობის პოზიციაა, რომ კონსორციუმმა ნაკისრი ვალდებულებები ვერ შეასრულა,ხოლო კონსორციუმი აღნიშნავს,რომ ხელი შეეშალა ნაკისრი ვალდებულებების შესრულებაში.
გერლიანის ინფორმაციით, ეს ისეთი პროექტია,რომელმაც ნებისმიერი მთავრობის ცვლილების დროს შეიძლება წარმოიშვას პოლიტიკური ინტერესები და ყველა მთავრობა შეეცდება რაღაც მიზეზებით,რომ თავისი გავლენები გაზარდოს.მისი თქმით, მთავრობის მხრიდან შეცდომა დაშვებულია დასაწყისშივე, ფინანსების მოძიების მეთოდოლოგიურ ნაწილში.
„პირველ ეტაპზე, უნდა გამოშვებულ იქნას აქციები, პირობითად „სააქციო საზოგადოება ანაკლია“ , ამ აქციებს გადასცემენ მოქალაქეებს და ნაწილი გაიყიდება,როგორც ადგილობრივ, ისე საერთაშორისო დონეზე. მოქალაქეებს უნდა მიეცეთ საშუალება, გახდნენ ამ პორტის თანამესაკუთრეები. ამ ტიპის მიდგომა ეკონომიკურ ფუნდამენტს შესძენს პორტს. რაც უფრო მეტად იზრდება მესაკუთრეთა რაოდენობა, სანდოობაც უფრო მაღალია . წინააღმდეგ შემთხვევაში, ეს დავა კიდევ უფრო გაჭიანურდება, აქ არ არის მნიშვნელოვანი ვინ არის მართალი, მნიშვნელოვანია ის,რომ ჩვენი ქვეყნის დრო იკარგება.
თუ გვინდა,რომ პოლიტიკური სპეკულაციებისგან გავათავისუფლოთ ანაკლიის პორტი, მას უნდა ჰყავდეს ბევრი მესაკუთრე, როგორც ადგილობრივი, ისე საერთაშორისო,“- ამბობს რამაზ გერლიანი.
„ეკონომიკური ტრანსფორმაციის ცენტრის“ დამფუძნებელი, მათე გარდავა ანაკლიის პორტის კერძო საკუთრებად ფორმირებასა და მის დივერსიფიცირებაზე საუბრობს. მისი ინფორმაცით, როდესაც მთავრობამ განაცხადა,რომ პორტი სახელმწიფოს საკუთრება იქნებოდა, დამანგრეველი იყო.
„მამუკა ხაზარაძემ იცოდა,რომ ასეთ ვითარებაში ფინანსების მოზიდვა რთული იქნებოდა, მაგრამ მაინც მოჰკიდა ხელი. უნდა ვაღიაროთ,რომ ამ კაცმა გამოვალინა დიდი უნარები. ვინაიდან, არ შეიძლება,რომ სახელმწიფოს საკუთრებაში დარჩენილი აქტივით, შენ წარმატებას მიაღწიო. საბოლოოდ, მაინც ისე მოხდა რომ პროექტი ვერ დაფინანსდა, მთავრობა კი თავისივე გაფუჭებულ საქმეს აბრალებს ამ ჯგუფს, ძალიან დასანანია ისიც,რომ ამ უნარების მქონე ადამიანების დისკრედიტაცია ხდება,- ამბობს მათე გარდავა.
მისივე განცხადებით,აუცილებელია შეიქმნას სააქციო საზოგადოება, ანუ საქართველოც იმ გზით წავიდეს, რა გზითაც ყველა განვითარებული ქვეყანა წავიდა.
„აშშ, ავსტრია, მათ ეს გზა გაიარეს. სააქციო საზოგადოების შექმნით კაპიტალში გადაგვაქვს ის ქონება,რომელიც პორტს აქვს, საუბარია ძვირადღირებულ მიწებზე, იგივე აკვატორიაზეც. უნდა გაჩნდეს კაპიტალი, ამის შემდეგ, სახელმწიფომ აქციების 10-15% უნდა მისცეს მოქალაქეებს უფასოდ, მიჰყიდოს ინვესტორებს, დაიწყოს კერძო საკუთრებად ფორმირება და როცა საქმე ამ კონდიციამდე მიდის, ბევრად უფრო მარტივია უკვე ინვესტორის მოზიდვა. მე მაინც მგონია,რომ მთავრობას უნდა ამ პროექტის განხორციელება, თუმცა უნდა კომუნისტური მეთოდით. როდესაც ეუბნები,რომ გეშლება, ჰგონიათ რომ მისი მტერი ხარ, როცა ათასჯერ არ გამოვიდა, უნდა დაფიქრდე და ერთხელ მაინც გადადგა სწორი ნაბიჯი,- აღნიშნავს მათე გარდავა.
ნათია კეკენაძე