რა დაგიშავეს ექიმებმა? ამ კითხვით მიმართავს მოქალაქე მარიკა კუბლაშვილი დევნილთა, შრომის, ჯანმრთელობისა და სოციალური დაცვის სამინისტროს. ახალგაზრდა ქალი ვიდეო მიმართვაში იმ პრობლემაზე საუბრობს რომელიც ჯანდავის სექტორიაშია შექმილი. კოვიდ ტესტის ასაღებად მისულ კუბლაშვილს, ცხელების ცენტრში მედპერსონალი სამედიცინო ეკიპირების გარეშე დახვდა. მისი ვიდეო მიმართვიდან ირკვევა, რომ მოსახლეობა საფრთხის ქვეშაა, რადგან შესაძლებელია COVID პოზიტიური დაუდგენელი შემთხვევები ეპიდემიის გავრცელებას უწყობდნენ ხელს.  „რას აკეთებდით 5 თვე? რაზე ფიქრობთ ახლა? სად არის რეგულაციების შესრულება? რატომ არ უფრთხილდებით ექიმებს?“ ეს ის კითხვები რომელიც მარიკა კუბლაშვილს ტიკარაძის უწყებასთან აქვს.

„კომერსანტი“ გთავაზობთ მოქალაქის მიერ გავრცელებულ მიმართვას:

„მინდა გამოვეხმაურო იმ პროცესებს რაც პანდემიასთან დაკავშირებით ქვეყანაში ხდება. მეხუთე დღეა ავად ვარ და მხოლოდ დღეს ჩავაბარე Covid ტესტი, სწორედ ამ თემაზე მინდა კომენტარის გაკეთება თუ როგორ მიმდინარეობს ეს პროცედურა. დაახლოებით 3 დღე ველოდე 112-ს, სანამ შესაბამის ცხელების ცენტრში გადამამისამართებდნენ, დღეს მივედი ჩასაბარებლად.

შევედი შენობაში, სადაც რეგისტრატურაში მიმითითეს რომ მესამე სართულზე ხდებოდა ტესტების ჩაბარება, ვისარგებლე ლიფტით. მესამე სართულის რეგისტრატურასთან დამხვდა სხვადასხვა პაციენტების რიგი, მათ შორის ბავშვების, მაშინვე აღვნიშნე რომ Covid-ის ტესტის ჩასაბარებლად ვიყავი, რამაც აჟიოტაჟი გამოიწვია. ჩემი რიგის მოსვლის შემდეგ მივუახლოვდი რეგისტრატორს, რომელსაც მხოლოდ პლასტიკატის ფარი იცავდა, სხვა დამცავი საშუალებებით აღჭურვილი არ ყოფილა, მომთხოვა პირადობის მოწმობა, რომელიც არ მივაწოდე და მისივე უსაფრთხოების გამო მონაცემები შორიდან დავანახე. რეგისტრატორმა იქვე, გვერდით არსებულ კაბინეტზე მიმითითა, რომელთანაც ასევე იყო კოვიდ ტესტის ასაღებად მისული პაციენტების რიგი, რომლებიც სხვა პაციენტების გვერდით, ერთ სივრცეში იდგნენ. არავითარი სპეციალური ეკიპირება არც ექიმს და არც ექთანს, როგორიც უცხოეთის საავადმყოფოების კადრებში გვინახავს, არ ჰქონიათ, ეცვათ ერთჯერადი ხალათები, ეკეთათ პირბადე და ფარი, არ ჰქონდა თმები დაფარული. აქ ჩნდება კიდევ ერთი პრობლემა და მე მივმართავ ჯანდაცვის სამინისტროს, რა დაგიშავათ ექიმებმა? რატომ რისკავთ მათ ჯანმრთელობას, რომელთა რაოდენობა ამ კრიტიკულ სიტუაციაში ისედაც არასაკმარისია?

გარდა ამისა, ხაზგასმით მინდა აღვნიშნო, რომ ექიმი მოვიდა საკმაოდ ახლოს და გულდასმით გამსინჯა, ეს მათ პროფესიონალიზმსა და მონდომებაზე მეტყველებს, თუმცა რა დაგიშავათ ამ ხალხმა თუ ასე არ უფრთხილდებით? საბოლოო ჯამში ამიღეს ტესტი, მომცეს რჩევები. ჯანდაცვის სამინისტროს რომელსაც უამრავი თანხა აქვს ჩარიცხული, ვეკითხები, როგორ უნდა იყოს პაციენტების ნაკადი ისე მოწყობილი რომ საფრთხე არ შეექმნას ექიმს და სხვა პაციენტებს? პაციენტი, რომელიც სავარაუდოდ არის კოვიდინფიცირებული ასე უნდა დადიოდეს მთელ კლინიკაში და სხვა პაციენტებთან ერთად იყოს ერთ სივრცეში? ასევე ექიმების დაცვა, რომლებსაც უამრავ დაინფიცირებულთან აქვთ დღის განმავლობაში ურთიერთობა, არ უნდა იყოს 100%-იანი? ვკითხულობ რა აკეთა ჯანდაცვის სამინისტრომ, რომელსაც საერთაშორისო ორგანიზაციებისგან უამრავი თანხა ჩაერიცხა, 5 თვის განმავლობაში? რა აკეთა იმ თვე ნახევარში როცა დაგვსვეს კარანტინში, დაანგრიეს ეკონომიკა, თითქოს იმისთვის რომ მომზადებულიყვნენ პანდემიისთვის? აშკარაა რომ ისინი მზად არ არიან და ჩვენ სამწუხაროდ ძალიან მძიმე შედეგებს მივიღებთ, რომელიც იმის ბრალი კი არ იქნება, რომ ხალხი რეგულაციებს არ იცავს, რითიც ახლა აპელირებენ, არამედ იმის, რომ თვითონ ასე უდგებიან საკითხს“, - ამბობს მარიკა კუბლაშვილმა.