„დღეიდან „თბილისი მოლი“ გაიხსნა და დილის 10 საათიდან მომხმარებლების ძალიან დიდი ნაკადი შეინიშნება, ჩვენს მოლოდინებსაც კი გადააჭარბა“, - ამის შესახებ „კომერსანტს“ „თბილისი მოლის“ კომერციული დეპარტამენტის ხელმძღვანელმა ნატა გოგოლაძემ განუცხადა.
ნატა გოგოლაძის ინფორმაციით, „თბილისი მოლმა“ მუშაობა სრული დატვირთვით განაახლა და არც ერთი მაღაზია არ დახურულა.
„ყველაფერი ძალიან მშვიდ ვითარებაში მიმდინარეობს, მაქსიმალურად ვიცავთ არსებულ რეგულაციებს. რაც ყველაზე მნიშვნელოვანია, არც ერთი მაღაზია არ დახურულა, რადგან ჩვენ მათ თავიდანვე ხელი შევუწყვეთ და იჯარის გადასახადისგან გავათავისუფლეთ. დღეს უკვე ხალხის საკმაოდ დიდი ნაკადია, ვიმედოვნებთ, რომ მომავალშიც ასე გაგრძელდება და მაღაზიებს პრობლემა არ შეექმნებათ“, - აღნიშნავს ნატა გოგოლაძე.
აღსანიშნავია, რომ დღეიდან საქართველოში გაიხსნა ყველა სახის მაღაზია. მუშაობა განაახლეს ბაზრობებმა და სავაჭრო მოლებმა, რომლებმაც სპეციალური რეკომენდაციების მიხედვით უნდა იხელმძღვანელონ. მოლის სივრცეში ნიღბის გარეშე მომხმარებლის დაშვება აკრძალულია, ამასთან ხდება ვიზიტორთა ნაკადის კონტორლიც.
ნინო თამაზაშვილი